၂၃ ၊ သြဂုတ်လ ၊ ၂၀၂၁ ။
ဧရာဝတီတိုင်းဒေသကြီး၊ ဖျာပုံခရိုင်အတွင်း မြို့နယ်(၄)မြို့နယ်က အုပ်ချုပ်ရေးမှူးတွေကို လုံခြုံရေးအထူးသတိထား သွားလာနေထိုင်ကြဖို့နဲ့ ပြန်ခုခံဖို့ လေးခွ၊ ဓားမြောင်တွေကိုင်ဆောင်ထားကြဖို့ ဖျာပုံခရိုင်စီမံကောင်စီက ညွှန်ကြားထားတယ်လို့ သိရပါတယ်။
ဖျာပုံခရိုင်အတွင်း ဘိုကလေးမြို့နယ်၊ ပတ္တမြားကုန်းကျေးရွာအုပ်စု အုပ်ချုပ်ရေးမှူး ဦးဝင်းကိုဆီကို ဘိုကလေးမြို့နယ် ပြည်သူ့ကာကွယ်ရေးတပ်ဖွဲ့ (PDF)က ကျည်ဆံတစ်တောင့်နဲ့ သတိပေးစာကို သြဂုတ်လ ၂၀ ရက်နေ့က ပို့ဆောင်ပြီးနောက်ပိုင်းအခုလိုညွှန်ကြားချက်ထွက်လာတာလို့ အုပ်ချုပ်ရေးမှူး အသိုင်းအဝိုင်းကနေ သိရပါတယ်။
ဒါ့အပြင် ဖျာပုံ၊ ဘိုကလေး၊ ကျိုက်လတ်နဲ့ ဒေးဒရဲမြို့နယ်အတွင်းမှာ စစ်ပညာသင်ကြားပြီး ပြန်လည်ရောက်ရှိလာတဲ့ ပြည်သူ့ကာကွယ်ရေးတပ်ဖွဲ့ (PDF) စာရင်းတွေပြုစုကာ အချိန်မီသတင်းပေးပို့ကြဖို့နဲ့ စောင့်ကြည့်ထားဖို့ ထပ်ဆင့်ညွှန်ကြားထားတယ်လို့လည်း သိရပါတယ်။
ဧရာဝတီတိုင်းအတွင်း သြဂုတ်လ ၁၉ရက်နေ့မှာ သာပေါင်းမြို့နယ်၊ ထန်းဇင်လှကျေးရွာ အုပ်ချုပ်ရေးမှူးဦးမြင့်စန်းနဲ့ သြဂုတ်လ ၂၀ရက်နေ့မှာ ဘိုကလေးမြို့နယ်၊ ပတ္တမြားကုန်းကျေးရွာအုပ်စု အုပ်ချုပ်ရေးမှူး ဦးဝင်းကိုတို့ဆီကို ကျည်ဆံတစ်တောင့်နဲ့အတူ သတိပေး စာပေးပို့တဲ့ ဖြစ်စဥ်တွေရှိခဲ့ပါတယ်။
