နိုင်ဂျာပြည်နယ်က ပုဂ္ဂလိက ကက်သလစ်ကျောင်းတစ်ကျောင်းကို သောကြာနေ့ မနက်အစောပိုင်းမှာ လက်နက်ကိုင် ဓားပြအဖွဲ့တစ်ဖွဲ့က ဝင်ရောက်စီးနင်းခဲ့ပါတယ်။
၂၂၊ နိုဝင်ဘာ။
အနောက်အာဖရိက နိုင်ငံတစ်ခုဖြစ်တဲ့ နိုင်ဂျီးရီးယားမှာ ခရစ်ယာန်ဘာသာဝင်တွေအပေါ် ကျူးလွန်တဲ့ အကြမ်းဖက်မှုတွေနဲ့ ပတ်သက်ပြီး ဒေါသအမျက်ထွက်မှုတွေ ကျယ်ကျယ်ပြန့်ပြန့် ဖြစ်ပေါ်နေပါတယ်။
နိုင်ဂျာပြည်နယ်က ပုဂ္ဂလိက ကက်သလစ်ကျောင်းတစ်ကျောင်းကို သောကြာနေ့ မနက်အစောပိုင်းမှာ လက်နက်ကိုင် ဓားပြအဖွဲ့တစ်ဖွဲ့က ဝင်ရောက်စီးနင်းခဲ့ပါတယ်။
အဆိုပါ စီးနင်းမှုမှာ ကျောင်းသား ရာပေါင်းများစွာကို ဓားပြအဖွဲ့က ပြန်ပေးဆွဲ ဖမ်းဆီးသွားတယ်လို့ ရဲတပ်ဖွဲ့က သတင်းထုတ်ပြန်ထားပါတယ်။
ဖြစ်စဉ်အတွင်း ကျောင်းသားတချို့ လွတ်မြောက်အောင် ထွက်ပြေးနိုင်ခဲ့ပေမဲ့ ကျောင်းသား ၂၁၅ ဦးနဲ့ ဆရာ/ဆရာမ ၁၂ ဦး ပြန်ပေးဆွဲ ဖမ်းဆီးခံခဲ့ရတယ်လို့ နိုင်ဂျီးရီးယား ခရစ်ယာန်အသင်းတော်
က ဆိုပါတယ်။
အဆိုပါ အသင်းတော်အနေနဲ့ ကလေးတွေ ဘေးကင်းကင်းနဲ့ ပြန်လည်လွတ်မြောက်လာဖို့အတွက် အစိုးရ၊ လုံခြုံရေးအဖွဲ့အစည်းတွေနဲ့ ပူးပေါင်းဆောင်ရွက်နေတယ်လို့ သိရပါတယ်။
အခုဖြစ်စဉ်အပေါ် နိုင်ဂျီးရီးယား နိုင်ဂျာပြည်နယ်အစိုးရက ရှုတ်ချထားသလို ပြည်နယ် ရဲတပ်ဖွဲ့ ကွပ်ကဲမှုဌာနချုပ်က သောကြာနေ့မှာ ထုတ်ပြန်ချက်တစ်စောင် ထုတ်ပြန်ခဲ့ထားပါတယ်။
အဆိုပါ ထုတ်ပြန်ချက်အတွင်း လုံခြုံရေးတပ်ဖွဲ့ဝင်တွေကို အခင်းဖြစ်ပွားရာ ဒေသဆီ စေလွှတ်ထားပြီး ပြန်ပေးဆွဲခံရတဲ့ ကျောင်းသားတွေကို ကယ်တင်နိုင်ဖို့အတွက် တောနင်းရှာဖွေမှုတွေ ပြုလုပ်နေတယ်လို့ ဖော်ပြထားပါတယ်။
နိုင်ဂျီးရီးယားနိုင်ငံရဲ့ မြို့တော် အဘူဂျာနဲ့ နယ်နိမိတ်ချင်းထိစပ်နေတဲ့ နိုင်ဂျာပြည်နယ်မှာ အခုလို ပြန်ပေးဆွဲမှု ဖြစ်ပွားခဲ့တာဟာ အခုသီတင်းပတ် အစောပိုင်းတုန်းက အိမ်နီးချင်း ကွာရာပြည်နယ်က ဘုရားကျောင်းတစ်ကျောင်းကို သေနတ်သမားတွေ ဝင်ရောက်တိုက်ခိုက်ခဲ့ပြီးနောက် ဆက်တိုက်ဆိုသလို ဖြစ်ပေါ်လာတာ ဖြစ်ပါတယ်။
အဆိုပါ ဘုရားကျောင်း တိုက်ခိုက်ခံရမှုအတွင်း လူနှစ်ဦးထက်မနည်း သေဆုံးခဲ့ရပြီး သင်းအုပ်ဆရာအပါအဝင် ဝတ်ပြုသူ အများအပြား ပြန်ပေးဆွဲခံခဲ့ရပါတယ်။
ဒါ့အပြင် ဒီသီတင်းပတ်ထဲမှာပဲ နိုင်ငံအနောက်မြောက်ပိုင်း ကက်ဘီပြည်နယ်က အစိုးရမိန်းကလေး အထက်တန်းကျောင်းကို လက်နက်ကိုင်အမျိုးသားတွေက ဝင်ရောက်စီးနင်းပြီး ကျောင်းသူ ၂၅ ဦးကို ပြန်ပေးဆွဲသွားခဲ့ပါတယ်။
အဲဒီတိုက်ခိုက်မှုအတွင်း ဒုကျောင်းအုပ်ဟာ သေနတ်နဲ့ ပစ်သတ်ခံခဲ့ရပါတယ်။
နိုင်ဂျီးရီးယားနိုင်ငံဟာ လက်ရှိအချိန်မှာ အကာအကွယ်မဲ့ အရပ်သားပြည်သူတွေကို ပစ်မှတ်ထားပြီး ငွေညှစ်ဖို့အတွက် အစုလိုက်အပြုံလိုက် ပြန်ပေးဆွဲမှုတွေ ကျူးလွန်နေတဲ့ လက်နက်ကိုင်အဖွဲ့တွေရဲ့ တိုက်ခိုက်မှုလှိုင်းဒဏ်နဲ့ ရင်ဆိုင်နေရတာ ဖြစ်ပါတယ်။
Ref – CNN