လက်ဝဲအစွန်းရောက်တွေဟာ ဘိုင်ဒမ်ရဲ့ အမည်ကို လက်မှတ်ထိုးစက်နဲ့ အစားထိုး လက်မှတ်ထိုးကာ သမ္မတအာဏာကို လွှဲယူသွားခဲ့ကြတယ်လို့ ပြောဆိုခဲ့တာပါ။
၂၉၊ နိုဝင်ဘာ။
အမေရိကန်သမ္မတဟောင်း ဂျိုးဘိုင်ဒမ် လက်မှတ်ရေးထိုးခဲ့တဲ့ အမိန့်ညွှန်ကြားချက် အများစုကို ပယ်ဖျက်ဖို့ ရည်ရွယ်ထားကြောင်း သမ္မတဒေါ်နယ်ထရမ့်က ကြေညာလိုက်ပါတယ်။
ထရမ့်ရဲ့ ဆိုရှယ်မီဒီယာပေါ်မှာ ရေးသားချက်အရ ဘိုင်ဒမ်ဟာ အဆိုပါအမိန့်တွေကို ကိုယ်တိုင် လက်မှတ်ရေးထိုးခဲ့တာမဟုတ်ဘူးလို့ အထောက်အထားမရှိ ပြောဆိုထားပါတယ်။
လက်ဝဲအစွန်းရောက်တွေဟာ ဘိုင်ဒမ်ရဲ့ အမည်ကို လက်မှတ်ထိုးစက်နဲ့ အစားထိုး လက်မှတ်ထိုးကာ သမ္မတအာဏာကို လွှဲယူသွားခဲ့ကြတယ်လို့ ပြောဆိုခဲ့တာပါ။
အဆိုပါ Autopen ခေါ် လက်မှတ်ထိုးစက်ဟာ အမေရိကန် သမ္မတ အဆက်ဆက် သုံးစွဲလေ့ရှိတဲ့ စက်ပစ္စည်းတခု ဖြစ်ပါတယ်။
“အမေရိကန်သမ္မတက တိတိကျကျ ခွင့်ပြုချက်မပေးထားပါက လက်မှတ်ထိုးစက်ကို အသုံးပြုခွင့် မရှိပါ”လို့ ထရမ့်က ပြောကြားခဲ့ပါတယ်။ ဘိုင်ဒင်ရဲ့ ခွင့်ပြုချက်မပါဘဲ တခြားလူတွေက ဘိုင်ဒမ်အစား ဒီစက်ကို သုံးခဲ့တဲ့အတွက် အမိန့်ညွှန်ကြားချက်အားလုံးရဲ့ ၉၂ ရာခိုင်နှုန်းလောက်ဟာ တရားမဝင်တော့ဘူးလို့လည်း သူက ဆိုပါတယ်။
“ဂျိုးဘိုင်ဒမ်ဟာ ဒီလက်မှတ်ထိုးစက် လုပ်ငန်းစဉ်မှာ ပါဝင်ပတ်သက်ခဲ့ခြင်း မရှိပါဘူး။
တကယ်လို့ ပါဝင်ခဲ့တယ်လို့ သူပြောရင်တော့ ကျမ်းကျိန်လိမ်လည်မှုနဲ့ တရားစွဲခံရပါလိမ့်မယ်”လို့ ထရမ့်က ပြောခဲ့ပါတယ်။
ဘိုင်ဒမ်ဟာ သမ္မတသက်တမ်းကုန်ဆုံးခါနီးမှာ စိတ်ရှုပ်ထွေးဝေဝါးနေပြီး ဆုံးဖြတ်ချက်ချသူ မဟုတ်တော့ကြောင်း ထရမ့်က ထပ်တလဲလဲ စွပ်စွဲခဲ့ပါတယ်။
အမေရိကန် သမ္မတတဦးဟာ ဥပဒေကြမ်းတစ်ခုကို လက်နဲ့ ကိုယ်တိုင်လက်မှတ်ထိုးဖို့ မလိုအပ်ဘဲ တာဝန်ရှိသူတစ်ဦးကို “ဥပမာအားဖြင့် လက်မှတ်ထိုးစက်ကို အသုံးပြု၍ သမ္မတ၏လက်မှတ်ကို ရေးထိုးရန်” ညွှန်ကြားနိုင်ကြောင်း ၂၀၀၅ ခုနှစ်မှာ တရားရေးဌာနက ထုတ်ပြန်ခဲ့ဖူးပါတယ်။
ထရမ့်ကိုယ်တိုင်လည်း အဆိုပါလုပ်ငန်းစဉ်ကို အသုံးပြုခဲ့ဖူးပြီး လက်မှတ်ထိုးစက်ကို အသုံးပြုခဲ့ဖူးပါတယ်။