လက်ရှိဟာ ထိုင်ဝမ်အရေးနဲ့ ပတ်သတ်ပြီး နှစ်နိုင်ငံကြား သံတမန်ရေးရာ အငြင်းပွားမှု အရှိန်မြင့်တက်နေချိန် ဖြစ်ပါတယ်။
၂၅၊ နိုဝင်ဘာ။
ထိုင်ဝမ်အနီးရှိ ကျွန်းတကျွန်းပေါ်မှာ ပဲ့ထိန်းဒုံးကျည်တွေ တပ်ဆင်မယ့် ဂျပန်ရဲ့ အစီအစဉ်ဟာ ဒေသတွင်း တင်းမာမှုတွေကို ဖန်တီးဖို့နဲ့ စစ်ရေးထိပ်တိုက်တွေ့မှုကို ရန်စဖို့ ရည်ရွယ်ချက်ရှိရှိ ကြိုးပမ်းမှု တစ်ခုဖြစ်တယ်လို့
တရုတ်က နိုဝင်ဘာ ၂၄ရက်နေ့မှာ သတိပေးလိုက်ပါတယ်။
လက်ရှိဟာ ထိုင်ဝမ်အရေးနဲ့ ပတ်သတ်ပြီး နှစ်နိုင်ငံကြား သံတမန်ရေးရာ အငြင်းပွားမှု အရှိန်မြင့်တက်နေချိန် ဖြစ်ပါတယ်။
ဒီမိုကရေစီစနစ်နဲ့ အုပ်ချုပ်တဲ့ ထိုင်ဝမ်ကို တရုတ်က တိုက်ခိုက်လာခဲ့ရင် တိုကျိုဘက်က စစ်ရေးအရ တုံ့ပြန်နိုင်ကြောင်း ဂျပန်ဝန်ကြီးချုပ် ဆာနာအဲ တာကာအိချိက ပြောခဲ့တာကြောင့် နှစ်နိုင်ငံကြား အဆိုးရွားဆုံး သံတမန်ရေးရာ အကျပ်အတည်း ဖြစ်ပေါ်စေခဲ့ပါတယ်။
“ဂျပန်နိုင်ငံက လက်ယာယိမ်း အင်အားစုတွေဟာ ဂျပန်နဲ့ ဒေသတွင်းကို ကပ်ဘေးဆိုက်မယ့် လမ်းကြောင်းပေါ် ဦးတည်ခေါ်ဆောင်သွားနေကြတယ်”လို့ တရုတ်နိုင်ငံခြားရေးဝန်ကြီးဌာနရဲ့ ပြောခွင့်ရပုဂ္ဂိုလ် မော်နင်းက သတင်းစာရှင်းလင်းပွဲမှာ ပြောခဲ့ပါတယ်။
ဘေဂျင်းဟာ မိမိတို့ရဲ့ နိုင်ငံပိုင်နက် အချုပ်အခြာအာဏာကို ကာကွယ်စောင့်ရှောက်ဖို့ ဆုံးဖြတ်ချက် ခိုင်မာသလို စွမ်းဆောင်ရည်လည်း ရှိတယ်လို့ သူက ထပ်လောင်းပြောပါတယ်။
ထိုင်ဝမ်ရဲ့ အရှေ့ဘက်ကမ်းရိုးတန်းကနေ ၁၁၀ ကီလိုမီတာခန့်အကွာရှိ ယိုနာဂူနီကျွန်းပေါ်က စစ်အခြေစိုက်စခန်းတစ်ခုမှာ မြေပြင်ကနေ ဝေဟင်ပစ် တာလတ် ဒုံးကျည်တပ်ဖွဲ့တစ်ခုကို ဖြန့်ကြက်ချထားမယ့် အစီအစဉ်တွေဟာ ပုံမှန်အတိုင်း ရှေ့ဆက်တိုးတက်နေကြောင်း ဂျပန်ကာကွယ်ရေးဝန်ကြီး ရှင်းဂျီရို ကိုအစ်ဇူမီက တနင်္ဂနွေနေ့မှာ အသိပေးထားပါတယ်။
“ဒီလုပ်ရပ်ဟာ အလွန်အန္တရာယ်များပြီး အိမ်နီးချင်းနိုင်ငံတွေနဲ့ နိုင်ငံတကာအသိုင်းအဝိုင်းကြားမှာ စိုးရိမ်ပူပန်မှုကြီးကြီးမားမား မြင့်တက်စေတယ်”လို့ မော်နင်းက တနင်္လာနေ့က ပြောခဲ့ပြီး အထူးသဖြင့် ဝန်ကြီးချုပ် တာကာအိချိရဲ့ အရင်က ပြောစကားတွေကို ရည်ညွှန်းပြီး ပြောဆိုခဲ့တာ ဖြစ်ပါတယ်။
တရုတ်ဟာ ဂျပန်ဝန်ကြီးချုပ်ရဲ့ ပြောကြားချက်ကို နိုင်ငံပိုင်မီဒီယာတွေကနေတဆင့် ပြင်းထန်တဲ့ ဝေဖန်ရေးသားမှုတွေ၊ ဂျပန်ပင်လယ်စာ တင်သွင်းမှု ပိတ်ပင်တာတွေ၊ ဂျပန်ရုပ်ရှင်တွေ ပြသမှု ရပ်ဆိုင်းတာတွေနဲ့ ဂျပန်နိုင်ငံကို သွားရောက်လည်ပတ်တာတွေ မပြုကြဖို့ သူတို့ရဲ့ နိုင်ငံသားတွေကို သတိပေးတာတွေနဲ့ ပြန်လည် တုံ့ပြန်ခဲ့ပါတယ်။
နိုဝင်ဘာလလယ်က တရုတ်ဟာ ထိုင်ဝမ်ကိစ္စမှာ အင်အားသုံး ဝင်ရောက်စွက်ဖက်ရင် အကြီးအကျယ် ချေမှုန်းခံရမယ့် စစ်ရေးရှုံးနိမ့်မှုမျိုးနဲ့ ကြုံတွေ့ရလိမ့်မယ်လို့ တရုတ်ကာကွယ်ရေးဝန်ကြီးဌာနက ဂျပန်ကို သတိပေးခဲ့ပါတယ်။
ဘေကျင်းက တရုတ်တပြည်ထောင်တည်းမူဝါဒအရ ထိုင်ဝမ်ကို သူတို့ရဲ့ သင်းကွဲနယ်မြေအဖြစ် ရှုမြင်ထားပြီး အင်အားသုံး ထုံးချုပ်နိုင်မဲ့ နည်းလမ်းကို လက်ကိုင်ထားသလို ထိုင်ဝမ်အစိုးရကတော့ ထိုင်ဝမ်ပြည်သူတွေကသာ သူတို့ရဲ့ အနာဂတ်ကို ဆုံးဖြတ်နိုင်တယ်လို့ ပြောကြားထားပါတယ်။
Ref – Reuters