ပုသိမ် – ချောင်းသာလမ်းပေါ် သာပေါင်းမြို့နယ် သဲဖြူရွာအနီးဝန်းကျင်မှာ အာရက္ခတပ်တော်(AA)
ပူးပေါင်းတပ်ဖွဲ့နဲ့ စစ်ကော်မရှင်တပ်တို့ တိုက်ပွဲပြင်း ထန်နေသလိုရွှေသောင်ယံမြို့နယ်မကျီးဇင်ကျေးရွာအနီးမှာလည်း ထိတွေ့တိုက်ပွဲတွေ တဖန်ပြန်လည် ဖြစ်ပေါ်နေပါတယ်။ ဒီဧရိယာဟာ တိုက်ပွဲမရှိဘဲငြိမ်သက်နေခဲ့တာ ဆယ်လ၀န်းကျင် ရှိနေခဲ့တာပါ။
၂၄ နိုဝင်ဘာ။
“သာပေါင်းလေး(ရွာ)ဘက်က တိုက်ပွဲ သဲဖြူရွာဘက် ရောက်လာတာပါ၊ သာပေါင်းလေးဘက်မှာလည်း တိုက်ပွဲရှိ သေးတယ်။ သဲဖြူဘက်ကတော့ လက်နက်ကြီးသံ ပိုကြားရပါတယ်၊ လက်နက်ငယ် သံတွေလည်း အများကြီး ကြားကြတယ်ပြောတယ်။ ကျနော်တော့ နည်းနည်းဝေးလို့ လက်နက် ငယ်သံသိပ်မကြားရဘူး” လို့ သာပေါင်းမြို့နယ်မှ ဒေသခံသတင်းရင်းမြစ်တဦးက ပြောပါတယ်။
AA ပူးပေါင်းတပ်ဖွဲ့နဲ့ စစ်ကော်မရှင်တပ်တွေဟာ ပြီးခဲ့တဲ့ အောက်တိုဘာလနဲ့ အခုနို၀င်ဘာလထဲ သာပေါင်းမြို့နယ် သာပေါင်းလေးကျေးရွာနားတဝိုက် တိုက်ပွဲပြင်းပြင်းထန်ထန်ဖြစ်ပွားခဲ့ပြီး စစ်တပ်ဘက်က အကျအဆုံးများကာ ထိခိုက်ဒဏ်ရာရသူ ဆယ်ချီရှိခဲ့တယ်လို့ ဒေသခံစစ်ရေးသတင်းရင်းမြစ် တွေက ပြောထားကြပါတယ်။
အခုအခါမှာတော့သာပေါင်းလေးရွာနဲ့ ငါးမိုင်ဝန်း
ကျင်အကွာ၊ အနောက်တောင်တိုင်းစစ်ဌာနချုပ် (န တခ)တည်ရှိရာ ပုသိမ်မြို့နဲ့ ရှစ်မိုင်ဝန်းကျင်အကွာ သဲဖြူရွာအနီးမှာပါ တိုက်ပွဲတွေ ဆက်ဖြစ်လာတာဖြစ်ပါတယ်။ သဲဖြူရွာဟာ ပုသိမ်မြို့ကနေ ချောင်းသာကမ်းခြေသို့ သွားတဲ့လမ်းမအနီးမှာ တည်ရှိတာပါ။
ဒါ့အပြင် ပြီးခဲ့တဲ့ ဖေဖော်ဝါလကတည်းက ရပ်တန့် နေခဲ့တဲ့ ဂွကမ်းခြေနဲ့ တဆက်စပ်တည်းရှိ ရွှေသောင် ယံကမ်းခြေတိုက်ပွဲတွေဟာလည်း ပြန်လည်စတင်
လာခဲ့ပြီး ဂွမြို့နဲ့ ၁၅ မိုင်ဝန်းကျင်၊ ရွှေသောင်ယံကမ်းခြေနဲ့ ၁၅ မိုင်ဝန်းကျင်ရှိ မကျီးဇင်ရွာအနီးမှာ တိုက်ပွဲတွေဖြစ်နေတယ်လို့ သိရပါတယ်။
“နှစ်ရက်လောက်ရှိပြီ တိုက်ပွဲဖြစ်နေတာ၊ ရွာနားမှာဖြစ်နေတာပါ။ မကျီးဇင်ကနေ သာပေါင်းဘက် လမ်းတလျှောက်မှာလည်း ကိုယ့်ဘက်က သိမ်းထားတာတွေ ရှိတယ်လေ၊ အဲလို တစပ်တည်း တိုက်နေတာ။ စခန်းငယ်တွေပေ့ါ၊ လမ်းက စခန်းငယ်တွေကို ထိုး(တိုက်)နေတာပါ အခုက” လို့ AA နဲ့ နီးစပ်တဲ့ သတင်းရင်းမြစ်တဦးက ပြောပါတယ်။
AA ကတော့ အခုတိုက်ပွဲတွေနဲ့ပက်သက်ပြီး သီးသန့် ထုတ်ပြန်တာ မရှိသေးပါဘူး။
ရွှေသောင်ယံမြိ့နယ် မကျီးဇင်တဝိုက်မှာ တိုက်ပွဲတွေဖြစ်နေချိန် ရွှေသောင်ယံနဲ့ ဂွပင်လယ်ပြင်မှာ ရှိနေတဲ့ စစ်တပ်ရဲ့ ရေတပ်ကလည်း လူနေကျေးရွာတွေဆီ လက်နက်ကြီးနဲ့ အဆက်မပြတ်ပစ်ခတ်နေတယ်လို့ ဒေသခံတွေက ပြောပါတယ်။
“ဂွဘက်က ရွာတွေ ၊ ရွာအနားတွေမှာ ကျတယ်၊ မနေ့ကဆို အချက်နှစ်ဆယ်နီးပါးလောက် ပစ်တယ်။ မကျီးဇင်ဘက်ကိုလည်း ပစ်တယ်၊ အဲ့ဘက် မှာတော့ ဘယ်နေရာတွေကျလည်း မသိရဘူး” လို့ ဂွဒေသခံတဦးက ပြောပါတယ်။
AA နဲ့ ပူးပေါင်းတပ်ဖွဲ့ဟာ ပြီးခဲ့တဲ့၂၀၂၄ ခု ဒီဇင်ဘာ လအတွင်းမှာ ရိုးမအနောက်ဘက်ခြမ်း ရခိုင်ပြည် နယ် ဂွမြို့နယ် ကို အလုံးစုံသိမ်းပိုက်ခဲ့ပြီးနောက် ရိုးမအရှေ့ဘက်ခြမ်း ဧရာ၀တီတိုင်းအတွင်းက စစ် ကော်မရှင်တပ်စခန်းတွေကို ထိုးစစ်ဆင်တိုက်ခိုက်
လာခဲ့တာပါ။
ဂွကမ်းခြေအတိုင်း ရွှေသောင်ယံကမ်းခြေထိ၊ ရိုးမအရှေ့ဘက်ခြမ်း တောင်ခြေတလျှောက်နဲ့ ပုသိမ် – မုံရွာလမ်းဘေးတလျှောက်ရှိ စစ်ကော်မရှင်တပ်စခန်းတွေကို သိမ်းပိုက်နေခဲ့တာဖြစ်ပြီး ဂွကမ်းခြေတလျှောက်မှာတော့ ရွှေသောင်ယံအနီးက ဘောမိ၊ မကျီးဇင်ကျေးရွာတို့နဲ့ မကျီးဇင် – သာပေါင်းကြား ကျေးရွာတချို့ကို သိမ်းပိုက်နိုင်ခဲ့ပါတယ်။
ဒါ့အပြင် ငသိုင်းချောင်း၊မြောက်စမ်းအမြောက်တပ် အမတ(၃၄၄)အနီးဝန်းကျင်နဲ့ လေးမျက်နှာမြို့နယ် စက်စက်ယို အနီးတ၀ိုက်တ၀ိုက်ရှိ တပ်စခန်းတွေကိုလည်း AA ပူးပေါင်းတပ်က သိမ်းပိုက်ထားပြီး လက်ရှိမှာ သာပေါင်းနဲ့ ရွှေသောင်ယံမြို့နယ်တွေ အတွင်းမှာ တိုက်ပွဲတွေ ဆက်ရှိနေတာဖြစ်ပါတယ်။
ရိုးမအနောက်ဘက်ခြမ်း ရခိုင်ပြည်နယ်အတွင်းက မြို့နယ် ၁၄ ခုကို အလုံးစုံသိမ်းပိုက်ထိန်းချုပ်ထားတဲ့ AA ဟာ ရိုးမ အရှေ့ဘက်ခြမ်း ဧရာ၀တီတိုင်း ၊ မကွေးတိုင်း၊ ပဲခူးတိုင်းတို့အတွင်းရှိ စစ်တပ်စခန်းတွေကို ဒေသခံတော် လှန်ရေးတပ်ဖွဲ့တွေနဲ့ ပူးပေါင်းပြီး ဆက်လက် တိုက်ခိုက်နေတာ ဖြစ်ပါတယ်။
ဧရာ၀တီတိုင်းအတွင်း ရိုးမတောင်ခြေတလျှောက် ပုသိမ် – မုံရွာလမ်းမကြီးတလျှောက်တို့မှာ တိုက်ပွဲတွေ ဆက်လက်ပြင်းထန်လာနိုင်တယ်လို့ စစ်ရေးလေ့လာသူတွေက သုံးသပ်ထားကြပါတယ်။