ဆန်ဈေး စပါးဈေး တက်လာပေမယ့် လယ်နည်းနည်းပဲ လုပ်တဲ့ လယ်သမား ငယ်လေးတွေ အနေနဲ့ အဆင်မပြေ ပါဘူး။ ရာသီဥတုနဲ့ ပိုးပွားကြောင့် စိုက်စရိတ် မကျေတဲ့အပြင် ကြွေးကျေအောင် မဆပ်နိုင်ဖြစ်ရတယ်။
၂၄၊နိုဝင်ဘာလ။
ဧရာဝတီတိုင်း အတွင်းက အဓိက အကျဆုံးဖြစ်တဲ့ ပုသိမ်၊ မြောင်းမြ၊ ဖျာပုံ ဒေသတွေ အတွင်းမှာ ဆန်ဈေးနဲ့ စပါးဈေးတွေ အနည်းငယ် ပြန်တက်လာနေပေမယ့် လယ်သမားငယ်တွေအနေနဲ့ ပိုပြီးအခက်တွေ့နေပါတယ်။
“ဆန်စပါးက အကြမ်းရော အချောရော ဈေးထိုးကျသွားတာကနေ ရုတ်တရက် ပြန်ထိုးတက်လာတာ။ အတက်အကျ ကြမ်းလွန်းတယ်၊တခါမှ ဒီလိုအဖြစ်မျိုး မရှိခဲ့ဘူး။ ကျဈေးတက်ဈေးကလည်း ကွာဟလွန်းတယ်။ လှောင်တဲ့သူတွေ လက်ထဲစပါး အဟောင်းမရှိတော့ဘူး။ပြတ်နေပြီ စပါးအသစ် မိုးစပါးကလည်း အထွက်နည်းတော့ အဝယ်လိုက်တယ်။ ရန်ကုန်၊ ပြည် ဟင်္သာတ နဲ့ အထက်ဖက်က ဝယ်လက်ကလည်း ဆင်းလာတော့ ဈေးက အရမ်းမြောက်နေတာပေါ့” လို့ ပုသိမ်မြို့ခံ ဆန်၊စပါး ကုန်သည်တဦးက DNAကို ပြောပါတယ်။
ပြီးခဲ့တဲ့ မိုးဦးကျ ကာလကနေ အောက်တိုဘာ လကုန်အထိ စပါးအကြမ်းတွေဖြစ်တဲ့ မိုးရေဆင်း၊ဆင်းသုခ၊မနော သုခ စတဲ့ စပါးကြမ်းတွေဟာ တင်းတရာကို ကျပ် ၈ သိန်းကျော် ဝန်းကျင်အထိ ထိုးကျသွားရာ အခု တင်းတရာကို ကျပ် ၁၃ သိန်း ကျော် မြင့်တက်လာပါတယ်။ ရက်၉၀ ၊ ဖန်သီးသုခ ၊ ပခန်း၊ စတဲ့ စပါးအကြမ်းတွေ ကတော့ တင်းတရာကို ကျပ် ၁၂ သိန်း အထိထိုးကျသွားရာက အခု တင်းတရာကို ကျပ် သိန်း ၂၀ ဝန်းကျင်အထိ ဖြစ်လာပါတယ်။
စပါးအကြမ်းဈေးတွေ တက်လာသလို စပါးအချောတွေ ဖြစ်တဲ့ ပေါ်ဆန်းရင် ၊ ဖျာပုံ ပေါ်ဆန်း ၊ဧရာဝတီ ပေါ် ဆန်းမွှေး နဲ့ ဧရာဝတီရွှေဘိုပေါ်ဆန်း လို့ခေါ်တဲ့ ရေကြည်မြို့နယ်ထွက် ရေကြည်ပေါ်ဆန်း စပါးဈေးတွေလည်း ပြန်တက်လာပါတယ်။ အမြင့်ဆုံး ပေါ်ဆန်းစပါး ဈေးနှုန်း ဟာ တင်းတရာကို ၃၆ သိန်းအထိ ရှိလာပါတယ်။
“ဆန်ဈေး စပါးဈေး တက်လာပေမယ့် လယ်နည်းနည်းပဲ လုပ်တဲ့ လယ်သမား ငယ်လေးတွေ အနေနဲ့ အဆင်မပြေ ပါဘူး။ ရာသီဥတုနဲ့ ပိုးပွားကြောင့် စိုက်စရိတ် မကျေတဲ့အပြင် ကြွေးကျေအောင် မဆပ်နိုင်ဖြစ်ရတယ်။ စပါးထွက် ကောင်းပြီး သဘာဝဘေး အထိနဲတဲ့ ဆောင်းသီးနှံ၊နွေစပါး ဆက်စိုက်ဖို့ တောင်မလွယ်ဘူး။မိုးစပါးက လယ်များများ လုပ်နိုင်သူတွေအနေနဲ့ မျှချေကြောင့် အထိမနာပေမယ့် နည်းနည်းပဲ လုပ်နိုင်သူတွေ အဖို့တော့ နလန် မထူနိုင်ဘူး” လို့ ကန်ကြီး ထောင့် မြို့နယ် ကတောင်သူ ဦးလှကြိုင် က ဆိုပါတယ်။
မိုးစပါး တဧက စိုက်ပျိုးပါက မျိုးစပါး နဲ့ သွင်းအားစု စိုက်ပျိုးစရိတ် ရင်းနှီးငွေ ကျပ် ၅သိန်း အနည်းဆုံး ဖြစ်ပါတယ်။ တဧက ပျှမ်းမျှ စပါးထွက်နှုန်းမှာ တင်း ၆၀ ဝန်းကျင်သာ ထွက်ရှိပါတယ်။ စပါးဖျက်ပိုး မကျအောင် ဆေးဝယ်သုံးရတာ ရွှေခရု ကိုက်တာကြောင့် ထပ်ခါထပ်ခါ ပြန်စိုက်ရတာ ၊ ရာသီဥတု သဘာဝဘေးကြောင့် စပါးထွက်ညံ့ပြီး ဆန်ကောင်း အရနည်းတာကြောင့် လယ်သမားတွေအဖို့ စပါးဈေးတက်ပေမယ့် အဆင်မပြေဘူး လို့ သူ (ဦးလှကြိုင်)က ဆက်ရှင်း ပြပါတယ်။
စပါးကြမ်း စပါးအချော ဈေးတွေ မြင့်တက်လာတာကြောင့် မိုးရေဆင်း ၊ဆင်းသုခ၊ မနောသုခ၊ ရက် ကိုးဆယ်၊ ပခန်း စတဲ့ ဆန်ကြမ်းက ၂၄ ပြည်ဝင်တအိတ်ကို ကျပ်၅၀၀၀ ကျော် ဈေးမြင့်တက်တာလာပြီး ဆန်ချောဖြစ်တဲ့ ပေါ် ဆန်းအုပ်စု နဲ့ တောင်ပျံ ဆန်တွေကလည်း ၂၄ ပြည်ဝင် တအိတ်ကို ကျပ် ၃၀၀၀၀ ဝန်းကျင် အထိဈေး တက်လာတာပါ။
ပုသိမ်မြို့ ဆင်ခြေဖုန်း ရပ်ကွက်မှာ နေထိုင်တဲ့ ကျောင်းဆရာ တဦးရဲ့ အိမ်ရှင်မက” ဆန်ဈေးတွေက ရုတ်တရက် ထိုး တက်သွားတာ လန့်စရာကြီး။ အစစအရာရာ ကုန်ဈေးနှုန်းတွေ တက်တယ် ဟင်းရွက် ကန်ဇွန်း တို့ ပင်လယ်ငါး သေးသေးတို့ ငါပိးရည်တို့စရာတွေ ဝယ်ချက်စားတာတောင် ယောင်္ကျားလစာနဲ့က မကာမိဘူး။သားကြီး ငါးကြီး ဟင်းစားချက်ဖို့ ဆိုတာမတွေးရဲဘူး” လို့ပြောပါတယ်။
လက်ရှိခြေအနေမှာ စပါးဟောင်းပြတ်သွားပြီး မိုးစပါး၊စပါးသစ်ကလည်း အထွက်နည်းတာကြောင့် ဆန်၊စပါး အကြမ်း အချော ရောင်းဝယ်ဈေးနှုန်းတွေ ထပ်တက်ဖွယ် ရှိနေပြီး နွေစပါး ပေါ်ချိန် မြန်မာလ တပို့တွဲလ
ကျော်မှသာ ဆန်စပါးဈေး ပြန်ကျလာနိုင်မယ်လို့ လုပ်သက်ရင့် ဆန်စက်လုပ်ငန်းရှင် အချို့က သုံးသပ်ပါတယ်။
ဧရာဝတီတိုင်း စိုက်ပျိုးရေး ဦးစီးဌာန ရဲ့ မှတ်တမ်းအရ ဧရာဝတီတိုင်းမှာ အသားတင်စိုက်ပျိုးမြေဧက ၄,၈၁၀,၀၄၄ ဧကရှိပြီး မိုးစပါး စိုက်ပျိုးဧက ၃၈ သိန်းနီး ပါး ၊ နွေစပါးဧက ၁၅ သိန်းကျော်ရှိတယ်လို့ သိရပါတယ်။