မလက္ကာရေလက်ကြားမှာဖြစ်ပေါ်နေတဲ့ လေဖိအားနည်းရပ်ဝန်းဟာ မုန်တိုင်းငယ်အဆင့်ကို ရောက်ရှိလာနိုင်ပြီး ဒီသက်ရောက်မှုကြောင့် မြစ်ဝကျွန်းပေါ် ကမ်းရိုးတန်း အပါအဝင် မြန်မာ့ကမ်းလွန်ပင်လယ်ပြင်မှာ မိုးသက်လေပြင်းကျရောက်နိုင်ချေရှိတယ် လို့ မိုးဇလ ပညာရှင်တွေက ခန့်မှန်းထားကြပါတယ်။
၂၄၊ နိုဝင်ဘာလ။
မြန်မာနိုင်ငံ မိုးဇလ ဌာနကတော့ မိုးသက်လေပြင်းကျချိန် မြေပြင်၊ ရေပြင်လေဟာ တနာရီကို ၃၅ မိုင်နူန်းထိ တိုက်ခတ်နိုင်ပြီး လှိုင်းအမြင့် ၁၁ ပေထိ ရှိနိုင်တယ်လို့ ထုတ်ပြန်ထားပါတယ်။
ကမ်းလွန်ပင်လယ်ပြင်မှာ မိုးသက်လေပြင်းကျနိုင် ပေမယ့် ဧရာဝတီတိုင်း ကုန်းတွင်းပိုင်းတွေမှာတော့ မိုးရွာသွန်းဖို့ မရှိဘူးလို့ သိရပါတယ်။
“ဒီသက်ရောက်မှုက ကချင်ပြည်နယ် မြောက်ဖျားပိုင်းမှာတော့ မိုးအနည်းငယ် ရွာသွန်းနိုင်ပေမယ့် ဧရာဝတီတိုင်းအပါအဝင် ကျန်ပြည်နယ် တိုင်းဒေသတွေမှာ မိုးရွာဖို့တော့ မရှိသေးပါဘူး ” လို့ မိုးဇလ ပညာရှင် ဦးဝင်းနိုင်က ပြောပါတယ်။
မလက္ကာရေလက်ကြားမှာ ဖြစ်ပေါ်နေတဲ့ လေဖိအားနည်းရပ်ဝန်းဟာ ဒီကနေ့ နိုဝင်ဘာ ၂၄ ရက်နေ့မှာတော့ မုန်တိုင်းငယ်အဆင့်ကို ပြောင်းလဲလာနိုင်ပြီး အရှေ့ဖိလစ်ပိုင်ပင်လယ်မှာ ဖြစ်ပေါ်နေတဲ့ လေဖိ အားနည်းရပ်ဝန်းဟာလည်းတောင်တရုတ်ပင်လယ် အတွင်းကို ရွေ့လျားလာပြီးနောက် နိုဝင်ဘာ ၂၈ ရက်မှာ တိုင်ဖုန်းမုန်တိုင်းအဖြစ် ပြောင်းလဲလာနိုင်တယ်လို့ မိုးဇလ ပညာရှင်တွေက ခန့်မှန်းထားကြပါတယ်။
လတ်တလော ခန့်မှန်းတွက်ချက်မှုတွေအရတော့ ဒီမုန်တိုင်းနှစ်ခုစလုံးဟာ မြန်မာနိုင်ငံအပေါ် ကြီးမားတဲ့ သက်ရောက်မှုတွေ မရှိနိုင်သေးဘူးလို့ မိုးဇလ ပညာရှင်တွေက တွက်ချက်ထားပါတယ်။