ကရင်ပြည်နယ်၊ ကော့ကရိတ်မြို့နယ်တွင်း တိုက်ပွဲ ဖြစ်နေပြီး အာရှလမ်းပိတ်ထားရတာကြောင့် မြဝတီမြို့ကနေ တဆင့် ထိုင်းကိုသွားရမယ့် MoU အလုပ်သမားတွေ အခက်တွေ့နေပြီး လတ်တလော သွားမရဖြစ်နေကြတယ်လို့ အလုပ်သမားတွေနဲ့ MoU အလုပ်သမားအရေး ကူညီ ပေးနေသူတွေကပြောပါတယ်။
“အိမ်ပြန်ရုံပဲ၊ လမ်းဖွင့်မှပြန်လွှတ်မှာပါ၊ စေလွှတ်စာရင်း ထဲမှာကိုက မြဝတီနဲ့လွှတ်တာပါ၊ ကော့သောင်းနဲ့လွှတ်ရင် လေယာဉ်နဲ့သွားလို့ရပါတယ်၊လေယာဉ်ခကလေးတွေထပ်ပေးရပါတယ်၊အလည(အလုပ်သမားညွှန်ကြားမှုဦးစီး ဌာန) က ကော့သောင်းကနေ စေလွှတ်ခွင့်ပြုမှပါ” လို့ MoU အလုပ်သမားအရေးဆောင်ရွက်ပေးနေသူတဦးက ပြောပါတယ်။
ကော့ကရိတ်မြို့နယ်အတွင်းမှာ KNLA ပူးပေါင်းတပ်တွေနဲ့ စစ်ကောင်စီပူးပေါင်းတပ်တွေ အခုလ ၁၆ရက် ကတည်းကစဖြစ်နေတဲ့တိုက်ပွဲဟာဆယ်ရက်ကျော်ကြာတဲ့ထိဆက်လက်ပြင်းထန်နေတာကြောင့် ကော့ကရိတ်-မြဝတီအာရှလမ်းမကြီးလည်း ပိတ်ထားရပြီး MoU နဲ့ ထိုင်းကို သွားရောက်အလုပ်လုပ်ကိုင်မယ့်အလုပ်သမားတွေကလည်းလမ်းကနေလှည့်ပြန်တာတွေလုပ်နေရတယ်လို့ ဆိုပါတယ်။
ထိုင်းနိုင်ငံသွားရောက်မယ့် အလုပ်သမားစေလွှတ်ခွင့်ကို အေဂျင်စီတွေကနေပြည်တော် အလုပ်သမားညွှန်ကြားရေးဦးစီးဌာနကိုစပြီးတင်ပြရကတည်းက ကော့သောင်းနဲ့ မြဝတီနှစ်နေရာခွဲတင်ပြရပြီးအလုပ်သမားညွှန်ကြားရေးဦးစီးဌာနကစေလွှတ်ခွင့်ရက်သတ်မှတ်ပေးမှတင်တဲ့ နေရာကနေ စေလွှတ်ရတာလို့ ဆိုပါတယ်။
ထိုင်းနိုင်ငံကိုသွားရောက်မယ့်MoU အလုပ်သမားတွေဟာ ရန်ကုန်ကနေနိုင်ငံကူးလက်မှတ်လုပ်ပြီး လာရောက်ကြရတာကြောင့်ကော့ကရိတ်ရောက်ပြီးမှလှည့်ပြန်ရ သူတွေရှိသလိုရန်ကုန်ကားဂိတ်ကနေပဲလှည့်ပြန်ရသူတွေလည်း ရှိတယ်လို့ MoU အလုပ်သမားတဦးက ပြောပြပါတယ်။
“အေးဂျင့်တွေက ဘယ်နေ့ဘယ်ရက်ထွက်မယ်ပြောတော့ ဪသူတို့ပိုင်လို့ပဲပေါ့ကိုယ်တွေကလည်း၊ကားဂိတ် အထိရောက်လာပြီးမှအထုပ်တွေအပိုးတွေနဲ့စားစရာ အကြော်အလှော်တွေနဲ့မသွားရသေးဘူးဆိုတော့ နယ်ကလာတဲ့သူတွေကတော့ ဒုက္ခ ရောက်တာ နည်းနည်းရှိတာပေါ့” လို့ ထိုင်းနိုင်ငံသွားရောက်အလုပ်လုပ်ကိုင်မယ့် MoU အလုပ်သမားတဦးက ပြောပြပါတယ်။
မြဝတီ-ကော့ကရိတ်အာရှလမ်းမှာကလည်း မနေ့က ဒီဇင်ဘာ၂၈ရက်နေ့ထိတိုက်ပွဲတွေဆက်လက်ပြင်းထန်နေပြီးတောင်ပေါ်လမ်းကိုပိတ်ထားရဆဲဖြစ်တာကြောင့် MoU အလုပ်သမားတွေအပြင်လမ်းကိုအသုံးပြုနေကြတဲ့ ခရီး သွားပြည်သူတွေ၊ ကုန်သည်တွေနဲ့ ကုန်ပစ္စည်းတချို့ပါ ပိတ်မိနေတဲ့အခြေအနေလည်းဖြစ်ပါတယ်။
လမ်းအသုံးပြုသူတချို့ကတော့အာရှလမ်းကိုရှောင်သွားလို့ရတဲ့မြဝတီ-ထို့ကော်ကိုး-ကျုံဒိုးလမ်းပိုင်းကနေ ဖြတ်သန်းသွားလာနေကြပေမယ့်လည်း အဲ့ဒီလမ်းပိုင်းကိုအသုံးပြုဖို့အတွက်ကိုလမ်းမှာရှိတဲ့ဂိတ်တွေကနေငွေကြေး တောင်းခံတာတွေရှိနေတာကြောင့်မဖြစ်မနေသွားရမယ့်သူတွေကလွဲလို့အများစုကအဲ့ဒီလမ်းပိုင်းကို မသုံးကြဘူး လို့လည်းသိရပါတယ်။
