အကြမ်းဖက်စစ်တပ်က နှိပ်စက်ပြီးသတ်ခဲ့တဲ့ စစ်ရှောင်တွေကို ရိက္ခာပို့သူ လူငယ်တစ်ဦးရဲ့ ရုပ် အလောင်းကို ကယားပြည်နယ်၊ ဖရူဆိုမြို့နယ်၊ ဒေါညေခူကျေးရွာမှာ တွေ့ရှိခဲ့တယ်လို့ သိရပါတယ်။
ဒေါညေခူကျေးရွာမှာ ပြည်သူ့ကာကွယ်ရေးတပ်-ဒီးမော့ဆို (DMO-Local PDF)နဲ့ မဟာမိတ်တပ်ပေါင်းစုတို့ ဒီနေ့မှာ နယ်မြေရှင်းလင်းရေးလုပ်နေစဉ် အသက်(၂၅)နှစ် ဝန်းကျင်ရှိ အမျိုးသားတစ်ဦးရဲ့ ရုပ်အလောင်းကို တွေ့ရှိခဲ့ခြင်းဖြစ်ပြီး အချက်အလက်စုဆောင်းရေးအဖွဲ့က လိုက်လံစုံစမ်းရာ သေဆုံးသူဟာ စစ်ရှောင်တွေကို ရိက္ခာပို့နေတဲ့ မိုးဗြဲမြို့နယ်နေ မောင်ပါစကွားလယ်ဖြစ်ကြောင်း အတည်ပြုနိုင်ခဲ့တယ်လို့ ဒီမောဆိုPDF ကထုတ်ပြန်ပါတယ်။
မောင်ပါစကွားလယ်ကို အကြမ်းဖက်စစ်တပ်က ရက်စက်စွာပစ်ခတ်သတ်ဖြတ်ပြီး ပျောက်ကြားဝတ်စုံဝတ်ပေးကာ ရုပ်အလောင်းကို ပစ်ထားခဲ့ခြင်းဖြစ်ပါတယ်။
သူနဲ့အတူ ဆိုင်ကယ်တစ်စီးတည်း စီးလာပြီး လွတ်မြောက်ခဲ့သူကဧပြီလ(၅)ရက်နေ့ မနက်၈နာရီလောက်မှာ ဖရူဆိုမြို့နယ်၊ ဒေါညေခူ အရောက် စစ်တပ်ရဲ့ ဝိုင်းပစ်ခတ်ခြင်းခံရပြီး မောင်ပါစကွားလယ် က ဆိုင်ကယ်ပေါ်ကနေ လဲကျ ကျန်ခဲ့ခြင်းဖြစ်ကြောင်း ပြောပါတယ်။
‘အပစ်ခံရတော့ ကျွန်တော်ဆိုင်ကယ်ကိုအမြန်မောင်းပြေးတဲ့ချိန်မှာပဲ သူကဆိုင်ကယ်ပေါ်ကကျသွားတာ ကျွန်တော်လှည့်ကြည့်တော့ သူကလဲနေပြီ ။အဲဒါကြောင့်ကျွန်တော်လည်းဆက်ပြီးမောင်းပြေးလိုက်တာ။ အဲ့အချိန်မှာ ကင်းထောက်ရဲဘော်တွေတွေ့လိုက်တာစိတ်သက်သာရာရတာ၊ ဆိုင်ကယ်ဆီတိုင်ကီလည်း လက်နက်ကျည်ထိပြီးပေါက်သွားတယ်။
ကျွန်တော်ကတော့ ပေါင်မှာထိရှဒဏ်ရာပဲရတာ။ ကျွန်တော်တို့နှစ်ယောက်စလုံးက အရပ်ဝတ်နဲ့ပဲသွားတာ အခုအလောင်းပြန်ရတော့ ယူနီဖောင်းနဲ့ဖြစ်နေတယ်”လို့ သူကပြောပါတယ်။
အလားတူ ဖရူဆိုကနေတက်လာတဲ့ အမျိုးသားနှစ်ဦးကို လည်းအကြမ်းဖက်စစ်တပ်က ပစ်ခတ်သတ်ထားခဲ့ပေမဲ့ ဒီနေ့အချိန်ထိ အစအနမတွေ့ရသေးဘူးလို့ သိရပါတယ်။
ဒီးမော့ဆိုမြို့နယ်မှာ အကြမ်းဖက်စစ်တပ်ပစ်ခတ်လို့ သေဆုံးခဲ့တဲ့ အရပ်သားပြည်သူ ၁၀၆ဦးရှိပြီလို့ ဆိုပါတယ်။
