၈၊ အောက်တိုဘာလ၊ ၂၀၂၁။
ရခိုင်ပြည်နယ်ဝန်ကြီးချုပ် ဦးညီပုကို အကြမ်းဖက် စစ်အုပ်စုက ၅၀၅(ခ)နဲ့ တရားစွဲဆိုထားတဲ့အမှုနဲ့ ပက်သက်ပြီး ထောင်ဒဏ် (၂)နှစ်ချမှတ်လိုက်တယ်လို့ သိရပါတယ်။
ဒီကနေ့ အောက်တိုဘာလ ၈ရက်နေ့ မနက်ပိုင်းမှာ စစ်တွေအကျဉ်းထောင်တွင်း အထူးတရားရုံးကနေ အမိန့်ချလိုက်တာလို့ ဒေသတွင်း သတင်းဌာနတွေမှာ ဖော်ပြထားပါတယ်။
အကြမ်းဖက်စစ်အုပ်စု အာဏာသိမ်းယူလိုက်တဲ့နေ့မှာ ဖမ်းဆီးခံရပြီးနောက် စစ်အုပ်စုက ပြန်လည်လွှတ်ပေးချိန်မှာ ဝန်ကြီးချုပ် ဦးညီပုဟာ စစ်အာဏာသိမ်းမှုကို လက်မခံဘူးလို့ ပြောဆိုချက်နဲ့ ပက်သက်ပြီး ဆူပူအောင်လှုံဆော်တယ်ဆိုကာ နောက်ထပ်တစ်ကြိမ် ထပ်မံဖမ်းဆီးခံရတာဖြစ်ပြီး ပုဒ်မ ၅၀၅(ခ)နဲ့ တရားစွဲဆိုခဲ့တာပါ။
လက်ရှိ အမိန့်ချမှတ်လိုက်တဲ့ အမှုဟာ ၅၀၅(ခ)နဲ့ တရားစွဲဆိုထားတဲ့ အမှုတစ်ခုသာရှိသေးပြီး ဝန်ကြီးချုပ်ဦးညီပုကို အခုချိန်ထိ သက်သေမပြနိုင်သေးတဲ့ အဂတိအမှု ၃မှုကိုလည်း ထပ်မံစွဲဆိုထားတာ ရှိပါသေးတယ်။
အကြမ်းဖက်စစ်အုပ်စုဟာ အာဏာသိမ်းယူပြီးနောက်ပိုင်းမှာ တိုင်းနဲ့ပြည်နယ်ဝန်ကြီးချုပ် ဝန်ကြီးတွေနဲ့ လွှတ်တော်ဥက္ကဌ၊ဒုဥက္ကဌတွေ အကြောင်းမဲ့ဖမ်းဆီးထားပြီး မကွေးတိုင်းဝန်ကြီးချုပ် ဒေါက်တာအောင်မိုးညို၊ ကရင်ပြည်နယ်ဝန်ကြီးချုပ် နန်းခင်ထွေးမြင့်နဲ့ ရခိုင်ပြည်နယ်ဝန်ကြီးချုပ် ဦးညီပုတို့ကို ပုဒ်မ ၅၀၅(ခ) တရားစွဲဆိုပြီး ထောင်ဒဏ်(၂)နှစ်စီ ချမှတ်ထားခဲ့ပါတယ်။