၁၊ ဇန်နဝါရီ၊၂ ၀၂၁ ။
ပုသိမ်မြို့မှာ ဒီနေ့(၁၄)ဦးမှာ ကိုဗစ်ရောဂါတွေ့ခဲ့တယ်လို့ ပုသိမ်ဆေးရုံအုပ်ကြီးဒေါက်တာသန်းမင်းထွဋ်ဆီကနေ သိရပါတယ်။
ပုသိမ်သစ္စာလမ်းက မနေ့ကလူနာ(၆၅၅)ရဲ့ အသက်(၁၂)နှစ်အရွယ်သား၊(၆၁)နှစ်အရွယ်မိခင်၊(၆၃)နှစ်အရွယ်ယောက္ခမ၊ လူနာ(၆၅၆)ရဲ့ခင်ပွန်းဖြစ်သူအသက်(၅၉)နှစ်ရှိ သစ်လုပ်ငန်းလက်ထောက်မန်နေဂျာ၊အသက်(၃၂)နှစ်အရွယ်သမီး၊ အသက်(၉)နှစ်အရွယ်မြေးဖြစ်သူအပါအဝင် မိသားစုတွေမှာ ကိုဗစ်ရောဂါတွေ့ခဲ့ပါတယ်။
ရွှေဘုံသာကမ်းနားလမ်းက နတ်ကနားစီးလုပ်ကိုင်တဲ့အသက်(၆၂)အရွယ်အမျိုးသားနဲ့ သူရဲ့အသက်(၅၄)နှစ်အရွယ်ညီမတို့ဟာ အနံပျောက်လို့လာပြရာက ရောဂါတွေ့ခဲ့ပါတယ်။ ထိတွေ့မိသူတွေကိုထပ်မံစစ်ဆေးခဲ့ရာမှာတော့ အတည်ပြုလူနာအမျိုးသားနဲ့ရွယ်တူ ဇနီးဖြစ်သူအပြင် အတူနေတပည့်တို့သုံးဦးမှာပါ ကိုဗစ်ရောဂါတွေ့ခဲ့ပါတယ်။
ကင်မလင်းကျွန်းစံပြ(၂)လမ်းက လူနာ(၆၃၇)ရဲ့အသက်(၆၃)နှစ်အရွယ်ယောက္ခမနဲ့ အသက်(၃၈)နှစ်အရွယ်သမီးဖြစ်သူ၊ အသက်(၁၄)နှစ်အရွယ်ညီဝမ်းကွဲတို့မှာလည်း ရောဂါတွေ့ခဲ့ပါတယ်။
လက်ရှိပုသိမ်မြို့မှာ ဆေးရုံတက်ရောက်ခဲ့တဲ့ ကိုဗစ်အတည်ပြုလူနာ(၇၂၉)ဦးရှိနေပြီဖြစ်ပါတယ်။ လူနာတွေထဲကမှ (၆၁၀)ဦးဟာ ရောဂါပျောက်ကင်းသွားလို့ ဆေးရုံကဆင်းသွားပြီလို့သိရပါတယ်။