မဲရုံ စေတနာ့ဝန်ထမ်းတစ်ဦးမှာ ကိုဗစ်ရောဂါတွေ့

၁၆ ၊ နိုဝင်ဘာလ၊ ၂၀၂၀။

ဒီနေ့မနက်စာရင်းအရ ဖျာပုံမြို့က(၁)ဦးမှာကိုဗစ်ရောဂါတွေ့ရှိခဲ့တယ်လို့ ဖျာပုံဆေးရုံအုပ်ကြီး ဒေါက်တာ ဒေါ်ဇင်မာစိုးကပြောပါတယ်။

ဖျာပုံမြို့၊ အောက်ကွင်းကျေးရွာနေ အသက် (၂၆)နှစ်အရွယ် အမျိုးသမီးတစ်ဦးဖြစ်ပြီး ရွေးကောက်ပွဲနေ့က အောက်ကွင်းကျေးရွာ၊ အမက မဲရုံ(၂)မှာ စေတနာ့ဝန်ထမ်းအဖြစ် လုပ်ကိုင်ခဲ့သူဖြစ်တယ်လို့ ဆေးရုံအုပ်ကြီးက Delta News Agency ကိုပြောပါတယ်။

သူဟာ နိုဝင်ဘာလ (၁၅) ရက်နေ့လည်က အပြင်းဖျားပြီး အနံမရလို့ ဖျာပုံဆေးရုံကြီးမှာ RDTစနစ်နဲ့ စစ်ဆေးရာ ရောဂါတွေ့ရှိခဲ့တာ ဖြစ်ပါတယ်။

လက်ရှိဖျာပုံဆေးရုံမှာ တက်ရောက်ခဲ့တဲ့ ကိုဗစ်အတည်ပြုလူနာ(၁၁၂)ဦးရှိနေပြီဖြစ်ပါတယ်။ လူနာတွေထဲကမှ (၁၀၁)ဦးဟာ ရောဂါပျောက်ကင်းသွားလို့ ဆေးရုံက ဆင်းသွားပြီလို့သိရပါတယ်။