ဧပြီ ၁၃
လက်ရှိလှုပ်ခတ်သွားတဲ့ စစ်ကိုင်းငလျင်ဟာ ရှေ့ ပြေးငလျင်ဖြစ်နိုင်ပြီး ပိုမိုအားပြင်းတဲ့ ငလျင်တွေ ထပ်လာနိုင်တယ်ဆိုတဲ့ ခန့်မှန်းချက်ဟာအင်မတန်မှ မှားယွင်းနေလို့ မြန်မာနိုင်ငံ ငလျင်ပညာရှင်များအ သင်းရဲ့ ဒု-ဥက္ကဌဟောင်းဖြစ်သူ ငလျင်ပညာရှင် ဒေါက်တာမျိုးသန့်က DNA ကိုပြောပါတယ်။
ဒါနဲ့ပတ်သက်လို့ ဒေါက်တာမျိုးသန့်က “ ဒီခန့်မှန်းချက်ကို မဟုတ်ဘူးလို့ ပြောချင်ပါတယ်။ ခုငလျင် က အဓိက ငလျင်ပဲဖြစ်တယ်။ ဒါကို ပြည်သူတွေအနေနဲ့ သံသယဖြစ်စရာမရှိပါဘူး။ ဒါက ရှေ့ပြေးငလျင်ဖြစ်တယ်ဆိုတာ လုံးဝမဟုတ်ဘူး ဒါကသေ ချာပေါက် ပြောလို့ရတယ် ” လို့ ဆိုပါတယ်။
ပြီးခဲ့တဲ့ မတ်လ ၂၈ရက်နေ့က လှုပ်ခတ်သွားခဲ့တဲ့ ငလျင်နောက်ဆက်တွဲအဖြစ် ဆက်တိုက်လှုပ်နေတဲ့ ငလျင်တွေဟာ ပြင်းအားအရ နည်းသွားလိုက်၊ များလာလိုက်၊ စိတ်လိုက်၊ ကျဲလိုက်နဲ့ လှုပ်ခတ်နေတာမို့ နောက်ထပ် ငလျင် အကြီးကြီးလာနိုင်တယ်ဆိုတဲ့ ခန့်မှန်းချက်တွေဟာ လတ်တလော လူမှုကွန်ရက်စာမျက်နှာတွေပေါ်မှာ ပြန့်နှံ့နေပါတယ်။
ဒီခန့်မှန်းချက်ပို့စ်ရဲ့ အစ စကားစုဟာ “ငလျင်ရဲ့ ခုအခြေနေအရဆို ဒီတိုင်းတစ်ကယ်ဖြစ်နေပြီ” ဆိုတဲ့ ခေါင်းစဉ်ဖြစ်ပြီး လူမှုကွန်ရက် စာမျက်နှာတွေပေါ် မှာ အရှိန်နဲ့ပြန့်နှံ့နေပါတယ်။
“နောက်ဆက်တွဲငလျင်တွေက လာနေမယ် ပြီးတော့ကြာမှာပဲဖြစ်တယ်။ ကျွန်တော်တို့ ၂၀၁၂သပိတ်ကျင်း ငလျင်တောင်မှပဲ ၆ ဒဿမ ၈ နဲ့လှုပ်သွားတာ ငြိမ်ဖို့ နှစ်ချီပြီးကြာတယ်။ ခုငလျင်က ၇ ဒဿမ ၇ ဖြစ်တယ် ဆိုတော့ သူလည်း နှစ်ချီပြီးတော့ ကြာလိမ့်မယ် ” လို့ ဒေါက်တာမျိုးသန့်က ခန့်မှန်းထားပါတယ်။
မူရင်းရေးသားသူ ဘယ်သူမှန်းမသိရတဲ့ ဒီပို့စ်ဟာ ဧပြီ ၆ရက်နေ့ကစလို့ ဒီကနေ့အချိန်ထိ ပြန်လည်ဖြန့်ဝေသူပေါင်း သောင်းနဲ့ချီရှိလာနေတဲ့အထိ ပြန့်နှံ့နေတာဖြစ်ပြီး မျှဝေကြသူအများစုဟာလည်း စိုးရိမ် ထိတ်လန့်မှုတွေ ရှိနေကြပါတယ်။
ဒီခန့်မှန်းချက် ပြန့်နှံ့မှုတွေအပါအဝင် ငလျင်လှုပ်မှုကို လက်ရှိအချိန်ထိ ကြုံတွေ့နေရတဲ့ ဒေသတွေဟာ ဒီထက်ပြင်းတဲ့ ငလျင်လာနိုင်မလားဆိုတာကို စိုးရိမ် ကြောင့်ကြမှုတွေ ရှိလာနေကြပါတယ်။
“ ကျွန်မတို့မယ် ခုထိတောင် အိပ်ပျော်အောင် မအိပ် ရဲတဲ့ အခြေအနေမှာ ဒီလိုပို့စ်တွေက ပိုပြီးထိတ်လန့် စေတယ်။ တခါတခါ သေသွားလည်း အေးတာပဲဟယ်လို့ တွေးမိတဲ့အထိပဲ ” လို့ ငလျင်ကြောင့် အိမ် ပြိုသွားတဲ့ မန္တလေးမြို့ခံဖြစ်သူ မယဉ်မာလွင်က ဆိုပါတယ်။
–
ဒါကြောင့် DNA က ဒေါက်တာမျိုးသန့်နှင့် ဆက်သွယ်မေးမြန်းခဲ့ပြီး ဒီဆက်သွယ်မေးမြန်းမှုထဲမှာ ဘာကြောင့် ဒီလိုမျိုး ပုံမှန်မဟုတ်တဲ့ နောက်ဆက်တွဲငလျင်တွေ လှုပ်နေတာလဲ၊ ဒီထက်ပြင်းတဲ့ ငလျင် တွေ ရှိလာနိုင်သေးလား၊ ဆူနာမီဖြစ်နိုင်တဲ့ ငလျင် တွေကို ဘယ်ဒေသတွေက ဂရုစိုက်သင့်တာလဲ ဆိုတဲ့ မေးခွန်းတွေ ပါဝင်ပါတယ်။
ဒီမေးခွန်းအပေါ် ဒေါက်တာမျိုးသန့်ရဲ့ ဖြေကြားမှုတွေထဲက အရေးကြီးတဲ့ အချက်အလက်တွေကို ကောက်နုတ်ဖော်ပြလိုက်ပါတယ်။
∎ မေး – နောက်ဆက်တွဲငလျင်တွေက ဘာလို့ ခုချိန်ထိ မငြိမ်သေးတာလဲ။
∎ ဖြေ – နောက်ဆက်တွဲငလျင်တွေက လာနေမယ် ပြီးတော့ကြာမှာပဲဖြစ်တယ်။ ကျွန်တော်တို့ ၂၀၁၂ သပိတ်ကျင်း ငလျင်တောင်မှပဲ ၆ ဒဿမ ၈ နဲ့လှုပ် သွားတာ ငြိမ်ဖို့ နှစ်ချီပြီးကြာတယ်။ ခုငလျင်က ၇ ဒဿမ ၇ ဖြစ်တယ် ဆိုတော့ သူလည်း နှစ်ချီပြီးတော့ ကြာလိမ့်မယ်နောက်ဆက်တွဲငလျင်ဆိုတာက တဖြေးဖြေးနဲ့ကျဲသွားမယ် ပြီးတော့ မက်ဂနီကျူ့ နည်းသွားမယ်ပေါ့ ရက်စိတ်စိတ်လှုပ်ရာကနေ တ ဖြည်းဖြည်း ကျဲသွားမယ် နောက်ဆုံး ငြိမ်သက်သွားလိမ့်မယ်ပေါ့လေ။ ဒါက ယေဘုယျပြောလို့ရတယ်။
∎ မေး – ခုနောက်ဆက်တွဲ ငလျင်တွေ အင်အားက နည်းလိုက် များလိုက်ဖြစ်နေတာက ဘာကြောင့်လဲ။ ဒါက အန္တရာယ်ရှိနေတာလား။
∎ ဖြေ – သူက ပြတ်ရွေ့ အပိုင်းအသီးသီးမှာ ခုနက ကျွန်တော်ပြောလိုက်တဲ့ ၁၉၅၆ စစ်ကိုင်းငလျင်လှုပ်တဲ့ စစ်ကိုင်း စစ်ကမန့် (Segment) ဆိုတဲ့ စစ်ကိုင်းအပိုင်းရှိတယ်။ နောက် ၁၈၃၉ အင်းဝငလျင်လှုပ်ခဲ့တဲ့အပိုင်း မိထ္ထီလာ အပိုင်းဆိုတာရှိတယ်။ ကျွန် တော်တို့က အင်းဝ စစ်ကမန့်ဆိုပြီးတော့ သုံးတယ် ပေါ့နော်။ နောက်တခါ နေပြည်တော် အပိုင်းရှိတယ်။ နောက်တခါ ဆွာအပိုင်း။ နောက်တခါ ဖြူးအပိုင်းထိတောင် ပြောလို့ရတယ်။ ဆိုတော့ စစ်ကိုင်း စစ်ကမန့်လို့ပြောရင် လေးပိုင်းလောက်ကို သူသည်ပြတ် သွားတာဖြစ်တယ်။ အဲ့ဒီအပိုင်းတွေမှာ ခုနကပြောခဲ့တဲ့ ပြတ်ရွေ့တွေရဲ့ အားတွေက ယုတ်လျော့သွားတယ်ပေါ့။ ဆိုတော့ အဲ့ဒီနေရာတွေမှာ နောက်ဆက်တွဲငလျင်တွေက လှုပ်နေလိမ့်မယ်။ တခါတရံမှာ နောက်ဆက်တွဲငလျင်ရဲ့ နောက်ဆက်တွဲ ငလျင်ဆိုတာမျိုးလည်း ရှိတတ်တယ်။ ဥပမာဆိုပါစို့ ၇ ဒဿမ ၇ ရဲ့နောက်ဆက်တွဲ ငလျင်သည် ၆ ဒဿမ ၇ ဆိုရင် ဒီ ၆ ဒဿမ ၇ ရဲ့ နောက်ဆက်တွဲတွေကလည်း လာ တတ်တယ်။ ဆိုတော့ ပက်တမ်တွေက ပြတ်ရွေ့သွားတဲ့ ဝိသေသ လက္ခဏာတွေကြောင့် တခါတရံမှာ ပုံမှန်မဟုတ်တဲ့ နောက်ဆက်တွဲငလျင်မျိုးတွေ ဖြစ်နိုင်တယ်။ ဒီလိုတွေဖြစ်နေလို့မို့ ၇ ဒဿမ ၇ ဟာ ရှေ့ပြေးငလျင်ဆိုတာမျိုး ကောက်ချက်ဆွဲလို့မရဘူး။ လုံးဝမဖြစ်နိုင်ဘူး။
∎ မေး – စစ်ကိုင်းငလျင်ကြောင့် အခြားသောပြတ် ရွေ့တွေမှာပါ ငလျင်တွေလှုပ်လာနိုင်ချေရှိတယ်ဆိုတာကရော ဖြစ်နိုင်လား။
∎ ဖြေ – စစ်ကိုင်းပြတ်ရွေ့က အရှည် ကီလိုမီတာ ၁၂၀၀ လောက်ရှိတယ်။ ဘယ်ကစလည်းဆိုရင် က ပ္ပလီ ပင်လယ်ကွေ့ ပင်လယ်ထဲပေါ့နော် အဲ့ဒီကနေစတယ်။ သူက ဖြာထွက်ပြီးတော့ မြန်မာနိုင်ငံ မြောက် ပိုင်းကို ဖြတ်သွားတယ်ပေါ့နော်။ မြောက်ဘက် က ချင်ပြည်နယ်အထိရောက်သွားတယ်။ ကချင်ပြည်နယ်ဘက်ရောက်တဲ့ အခါမှာ ပြတ်ရွေ့က သုံးမွှာဖြာထွက်သွားတယ်။ ဒီလိုနည်းနဲ့ စစ်ကိုင်းပြတ်ရွေ့က အဆုံးသတ်သွားတယ်ပေါ့။ အစွန်းမှတ် ၂ မှတ်မှာ ခုနကပြောတဲ့ မြင်းမှီးပုံသဏ္ဏာန်ဖြာထွက်နေတဲ့ ပုံစံရှိတယ်။
တောင်ဘက်ကကျတော့ ပုံမှန်ပြတ်ရွေ့ ခေါ်တာပေါ့နော်။ သူက အန်ဒမန် ပင်လယ်က ဆွဲဆန့်နေတဲ့ဟာနဲ့ မြေထုချပ်တွေခွဲခွာနေတဲ့ အနားနဲ့သွားအဆုံးသတ်တာပေါ့။ ဆိုတော့ သူက ပုံမှန်ပြတ်ရွေ့တွေ ဖြစ် လေ့ ဖြစ်ထရှိတယ်။ မြောက်ဘက် အစွန်ဆုံးကကျတော့ အဲ့လိုမဟုတ်ဘူး သူက အိန္ဒိယနဲ့ ယူရေးရှား မြေထုချပ်နဲ့တိုက်တဲ့ အခါကျတော့သူက ကွန်ပယ်ရှင်နယ် မျက်နှာချင်းဆိုင်လာပြီးတော့ စုဆုံပြီးတော့တွန်းတဲ့ ပြတ်ရွေ့မျိုးတွေဖြစ်တယ်။ သူက ပြောင်းပြန်ပြတ်ရွေ့ဆန်တယ်။ ဆိုတော့ ဒီလိုနည်းတွေနဲ့ အဆုံးသတ်တာပေါ့။ ဒီတော့ ကပ္ပလီပင်လယ်ပြင် ကို ပြန်ကြည့်မယ်ဆိုရင် ပုံမှန်ပြတ်ရွေ့တွေ ဖြစ်တာကြောင့်မို့လို့ ပြင်းအားကြီးကြီးမားမားတွေ လှုပ်လေ့မရှိတတ်ဘူး။ ဆူနာမီဖြစ်နိုင်တဲ့ ၈ လောက်တွေ လှုပ်ဖို့ဆိုတာ မဖြစ်နိုင်ဘူး။ ပုံမှန်ပြတ်ရွေ့ ဖြစ်နေတာကြောင့်မို့လို့လည်း သိပ်ပြီးတော့ အန္တရာယ်မရှိဘူး။
ဒါပေမယ့် မြောက်ဘက်အဖျားမှာတော့ နည်းနည်း အန္တရာယ်ရှိတယ်။ စစ်ကိုင်းပြတ်ရွေ့သည် အိန္ဒိယ မြေထုချပ်နဲ့ ယူရေးရှားမြေထုချပ်နဲ့ တိုက်နေတဲ့ ဟီ မာလီယန် ထရပ်စ် ခေါ်တာပေါ့နော် အဲ့ဒါက အရှေ့အနောက် သွယ်တန်းနေတယ်။ မြန်မာ၊ အိန္ဒိယနဲ့ တရုတ်တို့ ဆုံတဲ့နေရာကနေပြီးတော့ အရှေ့ဘက်စွန်းကနေ အနောက်ဘက် ပါကစ္စတန်ထိ သူက ရောက်သွားတာ ဆိုတဲ့အခါကျတော့ အဲ့ဒီနေရာတွေက အန္တရာယ်များတယ်။ ၁၉၅၀ တုန်းက မြန်မာနိုင်ငံရဲ့ ထိပ်ဖျား မြောက်ဘက်ထိပ်မှာ ပြင်းအား ၈ ဒဿမ ၆ လားမသိဘူး လှုပ်ဖူးတယ်။ ဆိုတော့ ကပ္ပလီပင် လယ်ကွေ့ဘက်မှာတော့ အန္တရာယ်မရှိဘူး ဒါပေမယ့် မြောက်အစွန်းအဖျားကတော့ ၁၉၅၀ လောက် တုန်းက လှုပ်ခဲ့ဖူးတာရှိတယ်ပေါ့။
∎ မေး – ဒါဆို မုတ္တမကွေ့ဘက်မှာ ဆူနာမီ ငလျင်ဖြစ်နိုင်ချေ မရှိဘူးဆိုတဲ့ သဘောပေါ့။
∎ ဖြေ – ကပ္ပလီပင်လယ်ကွေ့က ဆူနာမီဖြစ်နိုင်တဲ့ ငလျင်တွေ လှုပ်လေ့လှုပ်ထမရှိဘူး။ သူ့ရဲ့ဘူမိဗေဒဖြစ်စဉ်အရ သူ့ရဲ့ဆွဲဆန့်အားက ဆန့်ကျင်ဘက်ကို ခွဲခွာသွားတာဆိုတော့ သူသည် ဆူနာမီဖြစ်စရာ ပတ် ဝန်းကျင်မဟုတ်ဘူး။
∎ မေး – ဒါဆို မြန်မာနိုင်ငံမှာ ဆူနာမီဖြစ်စေနိုင်တဲ့ ငလျင်တွေက လှုပ်နိုင်ချေ မရှိတာလား။ အရင်က
တော့ သက်ရောက်မှုတွေ ရှိခဲ့ဖူးတယ်ဆိုတော့လေ။
∎ ဖြေ – ဆူနာမီဖြစ်စေတဲ့ ငလျင်တွေက ဘယ်ဘက်
မှာလှုပ်မလဲဆိုတော့ ရခိုင်ပေါ့နော်။ ကမ်းရိုးတန်းဒေသကနေပြီးတော့ တောင်ဘက်ဆက်သွားလို့ရှိရင် အင်ဒိုနီးရှားရဲ့ ဆူမာတြားကျွန်း အဲ့ဒီနေရာတွေက ဆူနာမီဖြစ်နိုင်တဲ့ ငလျင်တွေလှုပ်လေ့လှုပ်ထရှိတယ်။
ကျွန်တော်တို့ အနီးစပ်ဆုံးက ၂၀၀၄ ပေါ့နော် ဆူမာတြားငလျင်လှုပ်တယ်။ ဆူနာမီဖြစ်တယ်။ မြန်မာနိုင်ငံ တနင်္သာရီ ကမ်းရိုးတန်းဒေသတွေ နောက်တခါ ဧရာဝတီမြစ်ဝကျွန်းပေါ် ကမ်းလွန်ဒေသတွေမှာ ဆူနာမီတွေထိတာပေါ့။
နောက်မြန်မာနိုင်ငံမှာကျတော့ ၁၇၆၂ တုန်းက အာရကန် ငလျင်ဆိုပြီးတဲ့အခါကျတော့ ရခိုင်ကန်းရိုးတန်းဒေသမှာ လှုပ်ခဲ့တာပေါ့။ အိန္ဒိယမြေထုချပ်က ဗမာမြေထုချပ်ရဲ့ အောက်ကိုစိုက်ဝင်နေတာ ဒါကြောင့်မို့လို့ ပင်လယ်ကမ်းစပ်တွေမှာ ငလျင်လှုပ်ခဲ့မယ်ဆိုလို့ရှိရင် သူကလည်းပဲ တွန်းတင်တဲ့ပြတ်ရွေ့ဖြစ်တာကြောင့် ပြင်းအားများပြီဆိုလို့ရှိရင် ဆူနာမီဖြစ်တဲ့ ငလျင်တွေ လှုပ်နိုင်တယ်ပေါ့။