တကယ် စေတနာရှိလို့ မဟုတ်ပဲ ၅၀၅ တပ်ပြီး ဖမ်းလိုက်၊ ဟောခဏနေ လွှတ်လိုက်နဲ့ လူတွေကို ကစားနေတာ”
၂၉၊ နိုဝင်ဘာလ။
စစ်ကော်မရှင်က နိုင်ငံတော်အကြည်ညိုပျက်စေမှု ပုဒ်မ ၅၀၅ – က နဲ့ ဖမ်းဆီးထောင်ချ ခံထားရပြီး လွတ်ရက်စေ့ခါနီးတဲ့ သူတွေကို ခံဝန်ကတိတွေနဲ့ မနေ့က ပြန်လွှတ်ပေးခဲ့တဲ့ လွတ်/ငြိမ်း သက်သာမှာ ဧရာဝတီတိုင်းအတွင်းမှာရှိတဲ့ အကျဉ်းထောင်တွေ ကနေ နိုင်/ကျဉ်း ၁၃ ဦး လွတ်မြောက်ခဲ့ပါတယ်။
စစ်ကောင်စီဟာ ဒီလွတ်/ငြိမ်းနဲ့ ပတ်သက်လို့ ပြီးခဲ့တဲ့ နိုဝင်ဘာ ၂၆ ရက်နေ့ ညနေ ထုတ်ပြန်ခဲ့ပြီး လွတ်/ငြိမ်းထဲပါတဲ့ နိုင်/ကျဉ်း ၃၀၈၅ ဦးကို ၂၆ ညနေပိုင်းနဲ့ ၂၇ ရက်နေ့တွေမှာ အကျဉ်းထောင် အသီးသီးကနေ ပြန်လည်လွှတ်ပေးခဲ့တာ ဖြစ်ပါတယ်။
“ သူတို့က နိုင်ငံရေး အကျဉ်းသားတွေကို နိုင်ငံရေးကစားကွက်တွေအတွက် အသုံးချနေရုံ သက်သက်ပါပဲ။ အခုက နိုင်/ကျဉ်းလို့ပြောရင် အများစုက ၅၀၅ – က ကိုပဲ ပြေးမြင်ကြတာများတော့ ဒါတွေကို ဖြေလျော့ပေးတာ လွှတ်ပေးတာပေါ့။ ဒါဟာ နိုင်ငံတကာက စစ်တပ်ဟာ အပြုသဘောဆောင်တဲ့ လုပ်ရပ်တွေကို စပြီဆိုတာမျိုး မြင်စေဖို့အတွက် ရည်ရွယ်ချက် ရှိရှိကို နိုင်ငံရေးအကျဉ်းသားတွေကို ဓားစာခံအဖြစ် ဖမ်းလိုက် လွှတ်လိုက်လုပ်ပြီး နာမည်ကောင်းယူဖို့ လုပ်တာပါပဲ”လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM) တည်ထောင်သူ ကိုသိုက်ထွန်းဦးက ပြောပါတယ်။
ပုသိမ်ထောင်က ၈ ဦး၊ မအူပင်ထောင်က ၄ ဦး၊ ဟင်္သာတထောင်က ၁ ဦး လွတ်မြောက်ကြောင်း DNA က အတည်ပြုနိုင်ခဲ့ပါတယ်။ တ.က.သ ကျောင်းသားတဦးဖြစ်တဲ့ ကိုအောင်မင်းနိုင်(ခ) မဲကြီးဟာ ဟင်္သာတထောင်ကနေ ပြန်လည်လွတ်မြောက်လာခဲ့ပါတယ်။
ဧရာဝတီတိုင်းကနေ ပြန်လည်လွတ်မြောက်လာကြသူတွေထဲမှာ ရက်စေ့လွတ်ကာနီးသူတွေ ပါသလို သတင်းအထူးတပ်ဖွဲ့ – ပုသိမ် ဆိုတဲ့ လူမှုကွန်ရက် စာမျက်နှာကို Like ပြုလုပ်မိလို့ ဖမ်းဆီးခံထားရသူတွေလည်း ပါဝင်ပါတယ်။
“ ကျွန်မကတော့ မမျှော်ပါဘူး။ သားက တခြားအမှုတွေလည်း ပါနေတော့ မလွတ်လောက်ဘူးဆိုတာ သိပါတယ်။ လွတ်တဲ့သူတွေ အတွက်လည်း ဝမ်းသာပါတယ်။ ဒါပေမယ့် ဒါဟာ စစ်တပ်က နားလှည့်ပလှည့် လုပ်တဲ့ဟာပဲ ဆိုတာကို သိကြဖို့ သိစေချင်တာပဲ။ တကယ် စေတနာရှိလို့ မဟုတ်ပဲ ၅၀၅ တပ်ပြီး ဖမ်းလိုက်၊ ဟောခဏနေ လွှတ်လိုက်နဲ့ လူတွေကို ကစားနေတာ” လို့ မအူပင်မြို့နယ်မှာ နေထိုင်တဲ့ နိုင်/ကျဉ်းဟောင်း တဦးက ပြောပါတယ်။
သူဟာ လက်ရှိမှာ သားဖြစ်သူဟာ ၅၀၅-က အပါအဝင် အခြားသော အမှုတွေနဲ့ ထောင်ဒဏ်ကျခံနေရပြီး ကိုယ်တိုင်လည်း ၅၀၅(က) အပါအဝင် အခြားအမှုတခုနဲ့ ဖမ်းဆီးထောင်ချခံခဲ့ရပြီး လွတ်ရက်စေ့နဲ့ ပြန်လည်လွတ်မြောက်လာခဲ့သူ ဖြစ်ပါတယ်။
စစ်ကောင်စီဟာ ၅၀၅-က နဲ့ ထွက်ပြေးတိမ်းရှောင်နေသူ ၅၅၈၀ ဦးကိုလည်း အမှုပိတ်သိမ်းတယ်လို့ ကြေညာခဲ့ပါတယ်။