ဒေသခံတွေဟာ နေအိမ်ခေါင်မိုးတွေပေါ်မှာ ပိတ်မိနေခဲ့ကြပြီး ပြင်ပနဲ့ အဆက်အသွယ် ပြတ်တောက်ခဲ့ရပါတယ်။
၂၉၊ နိုဝင်ဘာ။
ရက်အတော်အကြာ ဖြစ်ပေါ်ခဲ့တဲ့ ရေကြီးရေလျှံမှုတွေကြောင့် အင်ဒိုနီးရှား၊ ထိုင်းနဲ့ မလေးရှားနိုင်ငံတွေမှာ သေဆုံးသူ ၃၀၀ ကျော် ရှိခဲ့ပြီဖြစ်တယ်လို့ အင်ဒိုနီးရှားအာဏာပိုင်တွေက နိုဝင်ဘာလ ၂၈ ရက်နေ့မှာ ပြောပါတယ်။
မိုးရာသီအတွင်း မိုးများတာနဲ့ အပူပိုင်းမုန်တိုင်းတို့ ပေါင်းစပ်သွားတဲ့အတွက် ဒီနိုင်ငံသုံးနိုင်ငံက ဒေသတွေမှာ ရေလွှမ်းမိုးမှုတွေ ဖြစ်ပေါ်စေခဲ့တာလို့ ဆိုပါတယ်။
ဒါကြောင့် ဒေသခံတွေဟာ နေအိမ်ခေါင်မိုးတွေပေါ်မှာ ပိတ်မိနေခဲ့ကြပြီး ပြင်ပနဲ့ အဆက်အသွယ် ပြတ်တောက်ခဲ့ရပါတယ်။
အင်ဒိုနီးရှားအာဏာပိုင်တွေဟာ ဆူမတြားကျွန်းရှိ ထိခိုက်မှုအဆိုးရွားဆုံး ဒေသတွေဆီ ရောက်ရှိနိုင်ဖို့ ရုန်းကန်ကြိုးပမ်းနေရပြီး ထိုင်းနိုင်ငံတောင်ပိုင်းမှာရှိတဲ့ ဆေးရုံတစ်ရုံမှာတော့ အလောင်းထားရှိရာနေရာ (ရင်ခွဲရုံ) ပြည့်လျှံသွားလို့ ရုပ်အလောင်းတွေ ထားရှိဖို့ အအေးခန်းကားတွေကို အသုံးပြုနေရတယ်လို့ ဆိုပါတယ်။
အင်ဒိုနီးရှားနိုင်ငံ၊ အနောက်ဆူမတြားပြည်နယ်မှာနေတဲ့ အသက် ၅၃ နှစ်အရွယ် မစ္စနီယာတီဆိုတဲ့ အမျိုးသမီးတဦးက အိမ်မှာကျန်နေခဲ့တဲ့ သူ့ခင်ပွန်းဆီ ပြန်ရောက်ဖို့အတွက် တရိပ်ရိပ်တက်လာနေတဲ့ ရေကြီးမှုကို အန်တုပြီး ကြောက်လန့်တကြား ရုန်းကန်ခဲ့ရပုံကို အခုလို ပြောပြပါတယ်။
သူက “ကျွန်မ လမ်းမပေါ်မှာ ရေလွှမ်းနေတာကို သတိထားမိလိုက်တယ်”လို့ မနက်ပိုင်း ဗလီမှာ ဝတ်ပြုဆုတောင်းပြီး ပြန်လာချိန် အခြေအနေကို ပြောပြပါတယ်။
အဲဒီနောက် “ကျွန်မ ယောကျာ်း ပြောပြဖို့ အိမ်ကို အမြန်ပြန်ပြေးခဲ့ပေမဲ့ ရေက ခါးလောက်အထိ ရောက်နေပါပြီ”လို့ သူက AFP သတင်းဌာနကို ပြောခဲ့ပြီး အိမ်ရောက်ချိန်မှာ ရေဟာ ရင်ဘတ်အထိ မြင့်တက်လာခဲ့တယ်လို့ ဆိုပါတယ်။
“မနေ့ညက ကျွန်မတို့ လုံးဝ အိပ်မပျော်ခဲ့ပါဘူး၊ ရေမျက်နှာပြင် အခြေအနေကိုပဲ စောင့်ကြည့်နေခဲ့ရပါတယ်”လို့ သူက ဆက်ပြောပါတယ်။
ဆူမတြားကျွန်းရှိ တာဝန်ရှိသူတွေရဲ့ အသိပေးချက်အရ ယခုသီတင်းပတ်အတွင်း ရေကြီးမှုနဲ့ မြေပြိုတွေကြောင့် အနည်းဆုံး လူ ၁၇၄ ဦး သေဆုံးခဲ့ပြီး ၈၀ နီးပါး ပျောက်ဆုံးနေတယ်လို့ သိရပါတယ်။
“လက်လှမ်းမမီနိုင်သေးတဲ့ နေရာတွေ ကျန်ရှိနေပါသေးတယ်။ အဲဒီလို သွားရောက်ဖို့ ခက်ခဲနေတဲ့ နေရာတွေမှာ ထိခိုက်သေဆုံးသူတွေ ရှိနေနိုင်ပါတယ်”လို့ အမျိုးသားသဘာဝဘေးအန္တရာယ် လျော့ပါးရေးအေဂျင်စီ (BNPB) အကြီးအကဲ ဆူဟာယန်တိုက ဆိုပါတယ်။
ရာသီဥတုပြောင်းလဲမှုဟာ မုန်တိုင်းရာသီကာလ ကြာရှည်တာ ၊ ရာသီဥတု ပြင်းထန်တာ အပါအဝင် မုန်တိုင်းဖြစ်ပေါ်မှု ပုံသဏ္ဌာန်တွေအပေါ် သက်ရောက်မှုရှိနေပြီး အဆိုပါအချက်တွေကြောင့် မိုးပိုများတာ ရုတ်တရက် ရေကြီးတာတွေနဲ့ လေပြင်းတိုက်ခတ်တာတွေကို ဖြစ်ပေါ်စေပါတယ်။
Ref – AFP