ဖလော်ရီဒါပြည်နယ်ကို ရောက်ရှိနေတဲ့ သမ္မတ ဒေါ်နယ်ထရမ့်ကတော့ သေနတ်သမားဟာ ၂၀၂၁ ခုနှစ်၊ စက်တင်ဘာလအတွင်း အမေရိကန်နိုင်ငံကို ဝင်ရောက်လာခဲ့တဲ့ အာဖဂန်နစ္စတန် နိုင်ငံသားတဦးဖြစ်တယ်လို့ ဆိုပါတယ်။
၂၇၊ နိုဝင်ဘာ။
အိမ်ဖြူတော်နဲ့ နှစ်ဘလောက်ကျော်ခန့်အကွာမှာ ဖြစ်ပွားခဲ့တဲ့ ပစ်ခတ်မှုအတွင်း ပြည်စောင့်တပ်ဖွဲ့ဝင် နှစ်ဦး ထိခိုက်ခဲ့ပြီး အသက်အန္တရာယ် စိုးရိမ်ရတယ်လို့ သိရပါတယ်။
မြို့တော်ဝန်ကတော့ အခု ဖြစ်စဉ်ဟာ ပစ်မှတ်ထားတိုက်ခိုက်မှု တခုဖြစ်တယ်လို့ သုံးနှုန်းပြောဆိုထားပါတယ်။
နိုဝင်ဘာလ ၂၆ရက်နေ့ မွန်းလွဲပိုင်းမှာ သံသယရှိသူတဦးဟာ အနောက်ဗာဂျီးနီးယားပြည်နယ်က ပြည်စောင့်တပ်ဖွဲ့ဝင် နှစ်ဦးကို စတင်ပစ်ခတ်ခဲ့တာပါ။
အဲဒီနောက် သေနတ်သံကို ကြားလိုက်ရတဲ့ အနီးနားက တခြားအစောင့်တပ်ဖွဲ့ဝင်တွေဟာ ပစ်ခတ်သူကို ဝင်ရောက်လုံးထွေး ဖမ်းဆီးခဲ့တယ်လို့ ရဲတပ်ဖွဲ့က ပြောပါတယ်။
ဖလော်ရီဒါပြည်နယ်ကို ရောက်ရှိနေတဲ့ သမ္မတ ဒေါ်နယ်ထရမ့်ကတော့ သေနတ်သမားဟာ ၂၀၂၁ ခုနှစ်၊ စက်တင်ဘာလအတွင်း အမေရိကန်နိုင်ငံကို ဝင်ရောက်လာခဲ့တဲ့ အာဖဂန်နစ္စတန် နိုင်ငံသားတဦးဖြစ်တယ်လို့ ဆိုပါတယ်။
ဒီလုပ်ရပ်ဟာ “မကောင်းဆိုးဝါးဆန်တဲ့ လုပ်ရပ်၊ မုန်းတီးမှုနဲ့ အကြမ်းဖက်မှု လုပ်ရပ်” ဖြစ်တဲ့အတွက် သံသယရှိသူအနေနဲ့ အပြင်းထန်ဆုံး အပြစ်ဒဏ်ကို ပြန်လည်ခံစားရမယ်လို့ သူက ကတိပြုခဲ့ပါတယ်။
သံသယရှိသူဟာ သေနတ်ဒဏ်ရာ လေးချက် ရရှိခဲ့ပြီး အသုံးပြုခဲ့တဲ့ လက်နက်နဲ့ တိုက်ခိုက်ရတဲ့ အကြောင်းအရင်းကို မသိရှိသေးဘူးလို့ ဆိုပါတယ်။
သတင်းထုတ်ပြန်ချက်မှာတော့ အဆိုပါ သံသယရှိသူကို “အာဖဂန်နစ္စတန်မှ ရာဇဝတ်မှုကျူးလွန်သူ နိုင်ငံခြားသား”လို့ သုံးနှုန်းထားပြီး သူရဲ့ လူဝင်မှုကြီးကြပ်ရေးဆိုင်ရာ နေထိုင်ခွင့်အခြေအနေနဲ့ ပတ်သက်လို့တော့ ရှင်းရှင်းလင်းလင်း မသိရသေးပါဘူး။
သမ္မတဟောင်း ဂျိုးဘိုင်ဒင်လက်ထက် ၂၀၂၁ ခုနှစ်မှာ အမေရိကန်တပ်တွေ အာဖဂန်ကနေ ဖရိုဖရဲ ဆုတ်ခွာခဲ့ပြီးနောက် အာဖဂန်နစ္စတန်နိုင်ငံသား သောင်းနဲ့ချီဟာ အထူးလူဝင်မှုကြီးကြပ်ရေး ကာကွယ်စောင့်ရှောက်မှုတွေနဲ့ အမေရိကန်ပြည်ထောင်စုဆီ ဝင်ရောက်လာခဲ့ကြပါတယ်။
“ဘိုင်ဒင်လက်ထက်က အာဖဂန်နစ္စတန်ကနေ ကျွန်တော်တို့ နိုင်ငံထဲ ဝင်လာတဲ့ နိုင်ငံခြားသားတိုင်းကို အခု ပြန်လည်စစ်ဆေးရပါတော့မယ်”လို့ သမ္မတထရမ့်က ဗုဒ္ဓဟူးနေ့ည တိုက်ရိုက်ထုတ်လွှင့်တဲ့ မိန့်ခွန်းမှာ ပြောခဲ့ပါတယ်။
အမေရိကန် နိုင်ငံသားဖြစ်ခွင့်နဲ့ လူဝင်မှုကြီးကြပ်ရေး ဝန်ဆောင်မှုဌာန (USCIS) က လူပုဂ္ဂိုလ် နောက်ကြောင်းရာဇဝင် စစ်ဆေးတဲ့ လုပ်ထုံးလုပ်နည်းတွေကို ပြန်လည်သုံးသပ်ဖို့ ရှိနေတာကြောင့် အာဖဂန်နိုင်ငံသားတွေရဲ့ လူဝင်မှုကြီးကြပ်ရေးဆိုင်ရာ လျှောက်ထားမှုအားလုံးကို ရပ်ဆိုင်းထားလိုက်ပါတယ်။
Ref – BBC