“ဒါဟာ ရွေးကောက်ပွဲတစ်ခု ကျင်းပနေတာ မဟုတ်ပါဘူး။ ပြည်သူတွေရဲ့ အသံကို နှုတ်ပိတ်ပြီး သူတို့ရဲ့ အုပ်ချုပ်ရေး တရားဝင်ဖြစ်အောင် ပုံဖော်ဖန်တီးထားတဲ့ ဇာတ်ကွက်တစ်ခုသာ ဖြစ်ပါတယ်”လို့ သူက ပြောပါတယ်။
၂၄၊ နိုဝင်ဘာ။
မြန်မာ စစ်ကော်မရှင်က ကျင်းပဖို့ ပြင်ဆင်နေတဲ့ ရွေးကောက်ပွဲဟာ နိုင်ငံတကာက သတ်မှတ်ထားတဲ့အတိုင်း အတုအယောင် သက်သက်သာဖြစ်ပြီး အဆိုပါလုပ်ရပ်ကို ပြင်းထန်စွာ ကန့်ကွက်ရှုတ်ချဖို့ ဩစတြေးလျ အထက်လွှတ်တော်အမတ် ဒင်းစမစ်က ဩစတြေးလျအစိုးရကို တိုက်တွန်းလိုက်ပါတယ်။
နိုဝင်ဘာ ၂၂ ရက်နေ့က သူ့ရဲ့ Faebook မှာ ဖော်ပြထားတဲ့ ဗီဒီယိုဖိုင်အရ လက်ရှိမြန်မာနိုင်ငံအတွင်း ဖြစ်ပေါ်နေတဲ့ အခြေအနေတွေနဲ့ ပတ်သက်ပြီး ဒင်းစမစ်က လွှတ်တော်မှာ တင်ပြခဲ့တာပါ။
“ဒါဟာ ရွေးကောက်ပွဲတစ်ခု ကျင်းပနေတာ မဟုတ်ပါဘူး။ ပြည်သူတွေရဲ့ အသံကို နှုတ်ပိတ်ပြီး သူတို့ရဲ့ အုပ်ချုပ်ရေး တရားဝင်ဖြစ်အောင် ပုံဖော်ဖန်တီးထားတဲ့ ဇာတ်ကွက်တစ်ခုသာ ဖြစ်ပါတယ်”လို့ သူက ပြောပါတယ်။
လက်ရှိမှာ လွတ်လပ်တဲ့ သတင်းမီဒီယာတွေကို ဖိနှိပ်ထားတာတွေ၊ VPN သုံးစွဲခွင့် ပိတ်ပင်ထားတာတွေနဲ့ ပြည်သူတွေ လွတ်လပ်စွာ ပြောဆိုခွင့်မရှိတာတွေကြောင့် တိုင်းပြည်အခြေအနေ ပုံမှန်ရှိနေသယောင် ဖန်တီးထားပေမဲ့ စစ်မှန်တဲ့ ယှဉ်ပြိုင်မှု လုံးဝမရှိကြောင်း သူက သုံးသပ်ထားပါတယ်။
ဒါ့အပြင် နိုင်ငံတစ်ဝန်းရှိ လူဦးရေ ၃ ဒသမ ၆ သန်းခန့် အိုးအိမ်စွန့်ခွာ ထွက်ပြေးနေရပြီး ဒေသအများအပြားမှာ တိုက်ပွဲတွေ ပြင်းထန်နေချိန် တစ်နိုင်ငံလုံးအတိုင်းအတာဖြင့် ယုံကြည်လက်ခံနိုင်လောက်တဲ့ မဲပေးပွဲကျင်းပဖို့ မဖြစ်နိုင်ကြောင်း ဒင်းစမစ်က ထောက်ပြထားပါတယ်။
ဒါကြောင့် ဩစတြေးလျအစိုးရအနေနဲ့ အဆိုပါ အတုအယောင် ရွေးကောက်ပွဲကို ငြင်းပယ်ပြီး အဲဒီကတဆင့် ပေါ်ပေါက်လာမယ့် မည်သည့်အစိုးရကိုမျှ အသိအမှတ်မပြုဖို့ တိုက်တွန်းထားပါတယ်။
အဲဒီအစား မြန်မာ့ဖက်ဒရယ်ဒီမိုကရေစီ အနာဂတ်အတွက် ကြိုးပမ်းနေတဲ့ အမျိုးသားညီညွတ်ရေးအစိုးရ (NUG) နဲ့ အရပ်ဘက်အဖွဲ့အစည်းတွေကို အစားထိုး ထောက်ခံအားပေးသင့်တယ်လို့ အကြံပြုထားပါတယ်။
လူသားချင်းစာနာမှု အကူအညီတွေနဲ့ ပတ်သက်ပြီး စစ်ကော်မရှင်ကနေတဆင့် ပေးအပ်ခြင်းမပြုဘဲ နယ်စပ်ဖြတ်ကျော်လမ်းကြောင်းတွေကနေတဆင့် တိုးမြှင့်ပေးအပ်ဖို့နဲ့ ဩစတြေးလျနိုင်ငံသားတွေကိုပါ ထိခိုက်စေတဲ့ ဆိုက်ဘာငွေလိမ်ဂိုဏ်းတွေနဲ့ လူကုန်ကူးမှုကွန်ရက်တွေကို ဖြိုခွင်းဖို့ မဟာမိတ်တွေနဲ့ ပူးပေါင်းဆောင်ရွက်သင့်တယ်လို့ တိုက်တွန်းခဲ့ပါတယ်။
ဒါ့အပြင် တရုတ်ကွန်မြူနစ်ပါတီ (CCP) က စစ်ကော်မရှင်ကို စစ်ရေး၊ နည်းပညာနဲ့ ရေနက်ဆိပ်ကမ်းစီမံကိန်းတွေက တဆင့် ထောက်ခံမှု ပိုမိုနက်ရှိုင်းစွာ ပေးအပ်နေတာဟာ မြန်မာ့အရေးသာမက ဒေသတွင်းတည်ငြိမ်ရေးနဲ့ ဩစတြေးလျရဲ့ လုံခြုံရေးကိုပါ ခြိမ်းခြောက်နေကြောင်း ဒင်းစမစ်က သတိပေးပြောကြားထားပါတယ်။
“နှုတ်ဆိတ်နေခြင်းက ရာဇဝတ်မှုမှာ ကြံရာပါပတ်သက်ခြင်းပင် ဖြစ်ပါတယ်”လို့ သူက ပြောကြားပြီး အတုအယောင် ရွေးကောက်ပွဲဟာ နမူနာဆိုးတစ်ခု ဖြစ်မလာမီ ဩစတြေးလျအနေနဲ့ ပြတ်သားတဲ့ ယုံကြည်ချက်နဲ့အတူ အရေးယူဆောင်ရွက်ဖို့ တောင်းဆိုထားပါတယ်။
ပြီးခဲ့တဲ့က်ပိုင်းက ပြုလုပ်ခဲ့တဲ့ ကုလသမဂ္ဂဆိုင်ရာ အစည်းအဝေးနဲ့ သံတမန်ရေးရာ တွေ့ဆုံပွဲတွေမှာ အမေရိကန်ပြည်ထောင်စုက ရွေးကောက်ပွဲအစီအစဉ်ဟာ ဒီမိုကရေစီနည်းလမ်းမကျဘဲ စစ်အာဏာရှင်သက်တမ်းရှည်စေဖို့ ရည်ရွယ်ထားတာဖြစ်တယ်လို့ ဝေဖန်ခဲ့ပါတယ်။
ဒါ့အပြင် ပြင်သစ်နိုင်ငံကလည်း အားလုံးပါဝင်နိုင်မှုမရှိတဲ့ ရွေးကောက်ပွဲကို အသိအမှတ်ပြုမှာ မဟုတ်ကြောင်းနဲ့ ပြင်းထန်စွာ ကန့်ကွက်ကြောင်း မကြာသေးခင်က ထုတ်ပြန်ခဲ့ပါတယ်။