လက်ရှိကာလဟာ စစ်အာဏာရှင်တော်လှန်ရေးကာလဖြစ်တာနဲ့အညီ သတင်းတွေမှာ တော်လှန်ရေးနဲ့ ဆက်စပ်ဖြစ်စဥ်တွေ ဖုံးလွှမ်းနေပါတယ်။ ဒါပေမယ့် တခြားလူမှု၊စီးပွား၊အားကစားနဲ့မိုးလေဝသဆိုင် ရာ ထူးခြားသတင်းတွေလည်း ရှိနေတတ်တာလည်း ဖြစ်ပါတယ်။ ဒါကြောင့်တပတ်တာသတင်းတွေအနက် ထူးခြားတဲ့သတင်းဖြစ်ရပ်တွေကို DNAက အနှစ်ချုပ်စုစည်းဖော်ပြလိုက်ပါတယ်။
၃၀၊ဩဂုတ်လ
▪️ ပါတီ ၉ ခုသာ တနိုင်ငံလုံးဝင်ပြိုင်မယ့်ရွေးကောက်ပွဲ
▪️ အာဏာသိမ်းစစ်တပ်ကအမေရိကန်နဲ့ ဆက်ဆံဖို့ လော်ဘီကုမ္ပဏီထပ်မံငှားရမ်း
▪️ ငြိမ်းချမ်းမှုအနည်းဆုံးနိုင်ငံစာရင်းမှာမြန်မာနောက်ဆယ်နိုင်ငံသာကျန်ရှိ
▪️ အာဏာသိမ်းစစ်တပ်က KNU ကို မတရားအသင်း ကြေညာ
▪️ လူကြီးရောဂါနဲ့ကွယ်လွန်ခဲ့တဲ့အမျိုးသားစာပေဆုရှင်စာရေးဆရာ ချစ်စံဝင်း
▪️ အာဏာသိမ်းစစ်ခေါင်းဆောင် ဒုတိယအကြိမ် တရုတ်နိုင်ငံ သွားရောက်
▪️ ပါတီ ၉ ခုသာ တနိုင်ငံလုံးဝင်ပြိုင်မယ့်ရွေးကောက် ပွဲ
အာဏာသိမ်းစစ်တပ်က ဒီဇင်ဘာလ၂၈ရက်မှစပြု လုပ်မယ့် ရွေးကောက်ပွဲမှာ ပါတီ၆၁ပါတီဝင်ပြိုင်မှာဖြစ်ပေမယ့် တနိုင်ငံလုံးအတိုင်းအတာ ဝင်ပြိုင်မယ့်ပါတီ ၉ခုသာရှိပါတယ်။
ရွေးကောက်ပွဲကော်မရှင်ထုတ်ပြန်ချက်အရစစ်တပ် နောက်ခံ ပြည်ခိုင်ဖြိုးပါတီ (USDP)၊ တိုင်းရင်းသား စည်းလုံးညီညွတ်ရေးပါတီ (တစည)၊ဦးကိုကိုကြီးရဲ့ ပြည်သူ့ပါတီ၊ ဒေါက်တာသက်သက်ခိုင်ဦးဆောင်တဲ့ PPP ပါတီ ၊မြန်မာနိုင်ငံတောင်သူလယ်သမားဖွံ့ဖြိုးတိုးတက်ရေးပါတီ၊အမျိုးသားနိုင်ငံရေးဒီမိုကရက် တစ်ပါတီ (DNP)၊ ရှမ်းနှင့်တိုင်းရင်းသားများဒီမိုကရက်တစ်ပါတီ (ကျားဖြူပါတီ)၊ အမျိုးသမီးပါတီ (မွန်)၊ အမျိုးသားဒီမိုကရေစီအင်အားစုပါတီ (NDF) တို့ကတနိုင်ငံလုံးဝင်ပြိုင်မယ်လို့သိရပါတယ်။
ဒါ့အပြင်တိုင်းနဲ့ ပြည်နယ်အလိုက် ဝင်ပြိုင်မယ့် ပါတီ ၅၂ ခုရှိပြီးဒီမိုကရေစီပါတီသစ် (ကချင်)၊ ဖလုံ-စဝေါ်ဒီမိုကရက်တစ်ပါတီ၊ ရခိုင့်ဦးဆောင်ပါတီ၊ ရှမ်းနီ(တိုင်းလျန်) သွေးစည်းညီညွတ်ရေးပါတီ၊ပအိုဝ်းအမျိုးသားအဖွဲ့ချုပ်ပါတီစတဲ့ပါတီတွေပါဝင်ပါတယ်။
အာဏာသိမ်းစစ်ကောက်စီက ရွေးကောက်ပွဲ ကို ဒီဇင်ဘာ ၂၈ ရက်ကစလို့ အပိုင်းလိုက်ပြုလုပ်သွားမယ်လို့ ကြေညာထားတာပါ။
▪️ အာဏာသိမ်းစစ်တပ်ကအမေရိကန်နဲ့ ဆက်ဆံဖို့ လော်ဘီကုမ္ပဏီထပ်မံငှားရမ်း
အမေရိကန်နဲ့ဆက်ဆံရေး ပြေလည်စေရေး ဆောင် ရွက်ပေးဖို့လော်ဘီကုမ္ပဏီအဖြစ် McKeon Group ကို အာဏာသိမ်းစစ်တပ်က ထပ်မံငှားရမ်းခဲ့ပါတယ်။
အမေရိကန်ပြည်ထောင်စု အခြေစိုက် McKeon Group လော်ဘီကုမ္ပဏီကိုဩဂုတ်လ ၁ ရက်မှစတင်လို့၆ လစာ ချုပ် ချုပ်ဆိုခဲ့တာဖြစ်ပါတယ်။
McKeon Groupကိုအကျိုးဆောင်လုပ်ခ ၁ လအမေရိကန်ဒေါ်လာ ၆၀၀၀၀ ပေးရမယ်လို့လည်းသိရပါတယ်။
McKeon Group အနေနဲ့ အကျိုးဆောင်ခ ကို စစ်တပ်အရင်ငှားရမ်းထားတဲ့လော်ဘီကုမ္ပဏီ DCI Groupနဲ့ပူးတွဲ ရရှိမှာပါ။
အာဏာသိမ်းစစ်တပ်က အမေရိကန်နဲ့ဆက်ဆံရေး ပြေလည်စေရေး ဆောင်ရွက်ပေးရန် DCI Group ကို တနှစ်အမေရိကန်ဒေါ်လာ ၃ သန်းနဲ့စာချုပ်ချုပ်ထားတာလည်းဖြစ်ပါတယ်။
McKeon Group နဲ့ DCI Groupတို့အနေနဲ့ မြန်မာစစ်တပ်ကိုလော်ဘီလုပ်ပေးရုံနဲ့စွန်းထင်းနေတဲ့ သွေးကို ပြောင်စင်နိုင်မှာမဟုတ်ဘဲအာဏာသိမ်း စစ်တပ် ကို နိုင်ငံတကာက အရေးယူပေးဖို့ Justice For Myanmar (JFM)ကလည်း တိုက်တွန်းခဲ့ပါတယ်။
▪️ ငြိမ်းချမ်းမှုအနည်းဆုံးနိုင်ငံစာရင်းမှာမြန်မာနောက်ဆယ်နိုင်ငံသာကျန်ရှိ
၂၀၂၅ ခုနှစ် ကမ္ဘာ့ငြိမ်းချမ်းမှုညွှန်းကိန်း (GPI) ထုတ်ပြန်ချက်မှာမြန်မာနိုင်ငံဟာ ကမ္ဘာ့အဆင့် ၁၅၃ မှာ ရပ်တည်နေပါတယ်။
ဩစတြေးလျနိုင်ငံအခြေစိုက် စီးပွားရေးနဲ့ ငြိမ်း ချမ်းရေးအင်စတီကျု (IEP) ကနိုင်ငံပေါင်း ၁၆၃ နိုင်ငံကို စစ်မက်ဖြစ်ပွားမှု၊ နိုင်ငံရေးတည်ငြိမ်မှု၊ တိုင်းပြည် ဂျီဒီပီ၊ ပြည်သူများ ဘေးကင်းလုံခြုံမှု အပါအဝင် အညွှန်းကိန်း ၂၃ ခုကို အသုံးပြုလေ့လာစောင့်ကြည့်ပြီးထုတ်ပြန်ခဲ့တာပါ။
မြန်မာဟာ စစ်တပ်အာဏာသိမ်းမှုကြောင့်လက်နက် ကိုင်တိုက်ပွဲတွေဖြစ်ပွားနေပြီး နိုင်ငံရေးမတည်ငြိမ် မှုတွေအပြင်ကမ္ဘာပေါ်မှာ မူးယစ်ဆေးဝါး အများဆုံးထုတ်လုပ်တဲ့ နိုင်ငံဖြစ်လာကာရာဇဝတ်ကွန်ရက်တွေလည်း နိုင်ငံတွင်းမှာ ပိုမိုအားကောင်းလာနေတယ်လို့ ဆိုပါတယ်။
အညွှန်းကိန်းတွေအရတော့ ကမ္ဘာပေါ်မှာ ငြိမ်းချမ်းမှုမရှိဆုံးနိုင်ငံတွေအဖြစ် ရုရှား၊ ယူကရိန်း၊ ဆူဒန်နိုင်ငံတို့က ထိပ်ဆုံးမှာအစဉ်အတိုင်း ရပ်တည်နေပါတယ်။
ကမ္ဘာ့အငြိမ်းချမ်းဆုံးနိုင်ငံတွေမှာတော့ အိုက်စလန်၊အိုင်ယာလန်၊ နယူးဇီလန်၊ ဩစတြီးယားတို့ကအစဥ်လိုက်ရပ်တည်နေတာပါ။
▪️ အာဏာသိမ်းစစ်တပ်ကKNU ကို မတရားအသင်းကြေညာ
အာဏာသိမ်းစစ်အုပ်စုက အင်အားကြီးတိုင်းရင်း သားလက်နက်ကိုင်အဖွဲ့တခုဖြစ်တဲ့ ကရင်အမျိုး သားအစည်းအရုံး (KNU) ကို မတရားအသင်းအဖြစ်ကြေညာခဲ့ပြီး အကြမ်းဖက်အုပ်စု အဖြစ်လည်းသြဂုတ်လ၂၈ရက်မှာကြေညာခဲ့ပါတယ်။
KNUဟာ တနိုင်ငံလုံးအပစ်ရက်စာချုပ်(NCA)ကို အရင်က လက်မှတ်ရေးထိုးခဲ့တဲ့အဖွဲ့အစည်းတခုဖြစ်ပြီး စစ်တပ်အာဏာသိမ်းပြီးနောက်မှာလည်း တော်လှန်ရေးအင်အားစုတွေကို ပံ့ပိုးပူးပေါင်းဆောင်ရွက်နေတဲ့အဖွဲ့ဖြစ်ပါတယ်။
KNU က အာဏာသိမ်းစစ်တပ်က ဒီဇင်ဘာလမှာပြုလုပ်မယ့် အထွေထွေရွေးကောက်ပွဲကို လက်မခံကြောင်း ဩဂုတ် ၂၆ ရက်မှာ ကြေညာပြီးတဲ့နောက်မှာပဲ မတရားအသင်းအဖြစ်ကြေညာခံရတာလည်းဖြစ်ပါတယ်။
▪️ လူကြီးရောဂါနဲ့ကွယ်လွန်ခဲ့တဲ့အမျိုးသားစာပေဆုရှင်စာရေးဆရာ ချစ်စံဝင်း
ဆုပေါင်းများစွာရရှိခဲ့တဲ့စာရေးဆရာ ချစ်စံဝင်းဟာ သြဂုတ် ၂၆ ရက် မှာ ရန်ကုန်မြို့၊ ပုဇွန်တောင်မြို့နယ်က နေအိမ်မှာ လူကြီးရောဂါနဲ့ကွယ်လွန်ခဲ့ပါတယ်။
စာရေးဆရာ ချစ်စံဝင်းရဲ့ နာရေးအခမ်းအနားကိုတော့ ရေဝေးသုသာန်မှာ သြဂုတ် ၂၈ ရက်ကပြုလုပ်ခဲ့ပါတယ်။
ကွယ်လွန်ချိန်မှာ အသက် ၈၆ နှစ်ရှိပြီဖြစ်တဲ့စာရေး ဆရာချစ်စံဝင်းကို ၁၉၄၀ ပြည့်နှစ်မှာ ပဲခူးတိုင်း၊ ရစ်ကန်ကြီးကျေးရွာမှာ မွေးဖွားခဲ့တာပါ။
စာရေးဆရာချစ်စံဝင်းဟာ ဤခရီးနီးသလား (၁၉၈၆)၊ဆန်ဖွပ်သည့်အဖိုးအို (၁၉၉၀) စာအုပ်တို့နဲ့ အမျိုးသားစာပေဆုကို ရရှိခဲ့တာဖြစ်ပြီး တသက်တာ စာပေဆု၊ ပခုက္ကူဦးအုံးဖေစာပေဆု၊ သုတစွယ် စုံစာပေဆု၊ ထွန်းဖောင်ဒေးရှင်းစာပေဆုနဲ့ နိုင်ငံတကာဆုတွေကိုလည်းရှိခဲ့သူဖြစ်ပါတယ်။
▪️ အာဏာသိမ်းစစ်ခေါင်းဆောင် ဒုတိယအကြိမ်တရုတ်နိုင်ငံ သွားရောက်
အာဏာသိမ်းစစ်ခေါင်းဆောင် ဦးဆောင်တဲ့အဖွဲ့ကဒီကနေ့ သြဂုတ်လ ၃၀ရက်မှာနေပြည်တော်ကတဆင့် တရုတ်နိုင်ငံကိုထွက်ခွာသွားပါတယ်။
တရုတ်သမ္မတ ရှီကျင့်ဖျင်ရဲ့ ဖိတ်ကြားချက်လို့ဆိုပြီးအာဏာသိမ်းပြီး နောက်ပိုင်း ဒုတိယအကြိမ် တရုတ်ခရီးစဉ်လည်းဖြစ်ပါတယ်။
အခုခရီးစဥ်မှာ အာဏာသိမ်းစစ်ခေါင်းဆောင်ကဘေဂျင်းမြို့မှာ ကျင်းပမယ့်နှစ် ၈၀ပြည့် ဂျပန် ခုခံစစ်နဲ့ကမ္ဘာ့ဖက်စစ်ဆန့်ကျင်စစ်ပွဲအောင်နိုင်ခြင်း အထိမ်းအမှတ်အခမ်းအနားနဲ့တီယန်ကျင်းမြို့မှာ ကျင်းပမယ့် ရှန်ဟိုင်းပူးပေါင်းဆောင်ရွက်မှုအဖွဲ့ထိပ်သီးအစည်းအဝေး (SCO Summit 2025)ကို တက်ရောက်မယ်လို့ဆိုပါတယ်။
ခရီးစဉ်မှာ စစ်ခေါင်းဆောင်နဲ့အတူ စစ်ကော်မရှင် အတွင်းရေးမှူး ၊ နိုင်ငံခြားရေးဝန်ကြီး၊ ညှိနှိုင်းကွပ်ကဲရေးမှူး(ကြည်း၊ ရေ၊ လေ) နဲ့ဝန်ကြီးတချို့အပြင်ဧရာဝတီတိုင်းဒေသကြီးဝန်ကြီးချုပ်လည်းလိုက်ပါသွားတယ်လို့သိရပါတယ်။
အာဏာသိမ်းစစ်ခေါင်းဆောင်ဟာ ၂၀၂၄ နိုဝင်ဘာ လက ယူနန်ပြည်နယ် ကူမင်မြို့မှာ ပြုလုပ်တဲ့မဟာမဲခေါင် ဒေသခွဲ ထိပ်သီး အစည်းအဝေးကိုသွား ရောက်ခဲ့ပါသေးတယ်။