“သူတို့က ဝင်ပြီး စစ်မှုထမ်းကြပေါ့။ ဒါမှသာ စစ်တပ်က အင်အားကြီးလာပြီးတော့ ဒေါ်အောင်ဆန်းစုကြည်ရဲ့ သူပုန်တွေကို နှိမ်နင်းနိုင်ပြီး တိုင်းပြည်ကအေးချမ်းမှာပေါ့ အဲ့လိုတွေပြောတာ။ ရွေးကောက်ပွဲမှာ မဲထည့်ဖို့ လာပြောတာဆိုပြီး ဒေါ်အောင်ဆန်းစုကြည် အကြောင်းကို အတင်းပြောသလိုတွေ ပြောသွားတာ”လို့ ဖိအားပေးမှုကြောင့် ကြံ့ခိုင်ရေးရဲ့ စည်းရုံးရေး အစည်းအဝေးကို တက်ရောက်ခဲ့ရသူ တဦးက ဆိုပါတယ်။
၂၉၊ ဩဂုတ်လ။
ဧရာဝတီတိုင်း၊ ဇလွန်မြို့နယ်မှာ ကြံ့ခိုင်ရေးပါတီက ရွေးကောက်ပွဲအတွက် မဲဆွယ်ရာမှာ လူငယ်တွေ စစ်မှုထမ်းမှ သူပုန်တွေ(တော်လှန်ရေး အင်အားစုတွေ)ကို နှိမ်နင်းနိုင်မှာ ဖြစ်တယ်လို့ ပြောဆိုမှုတွေ ရှိနေတယ်လို့ ဒေသခံတွေဆီက သိရပါတယ်။
“သူတို့က ဝင်ပြီး စစ်မှုထမ်းကြပေါ့။ ဒါမှသာ စစ်တပ်က အင်အားကြီးလာပြီးတော့ ဒေါ်အောင်ဆန်းစုကြည်ရဲ့ သူပုန်တွေကို နှိမ်နင်းနိုင်ပြီး တိုင်းပြည်ကအေးချမ်းမှာပေါ့ အဲ့လိုတွေပြောတာ။ ရွေးကောက်ပွဲမှာ မဲထည့်ဖို့ လာပြောတာဆိုပြီး ဒေါ်အောင်ဆန်းစုကြည် အကြောင်းကို အတင်းပြောသလိုတွေ ပြောသွားတာ”လို့ ဖိအားပေးမှုကြောင့် ကြံ့ခိုင်ရေးရဲ့ စည်းရုံးရေး အစည်းအဝေးကို တက်ရောက်ခဲ့ရသူ တဦးက ဆိုပါတယ်။
ကြံ့ခိုင်ရေးပါတီဟာ ဇလွန်မြို့နယ်ထဲမှာ ရွေးကောက်ပွဲမှာ မဲထည့်ဖို့၊ ကြံ့ခိုင်ရေးပါတီကိုမဲထည့်ဖို့ဆိုပြီး စည်းရုံးရေးတွေ လိုက်လံလုပ်ဆောင်ရာမှာ စစ်တပ်က အရာရှိတချို့ ပါဝင်နေသလို သက်ဆိုင်ရာ ရပ်/ကျေး အုပ်ချုပ်ရေးမှူးတွေ ပါဝင်တဲ့နေရာတွေလည်း ရှိနေတယ်လို့ သိရပါတယ်။
“အုပ်ကြီးကလာဆိုတော့ သွားရတာပေါ့။ ကျွန်တော်သိသလောက်တော့ စစ်တပ်ကလူပါလာရင် လူများများလာအောင် ဖိအားပေးတာတွေရှိတယ်။ မပါရင်တော့ ဒီတိုင်းပဲ သူတို့ပါတီဝင်တွေနဲ့တွေ့ပြီး ပြန်သွားတာမျိုးပဲလုပ်ကြတယ်”လို့ ဒေသခံ တဦးက ပြောပါတယ်။
ကြံ့ခိုင်ရေးပါတီက သူတို့တွေ့ဆုံပွဲကို လူများများလာဖို့ ဖိအားပေးတယ်ဆိုရာမှာ အုပ်ချုပ်ရေးမှူးတွေက တဆင့် ဒီတွေ့ဆုံပွဲကိုလာရင် စစ်မှုထမ်းထောက်ပံ့ကြေး ၁ လ ကင်းလွတ်ခွင့်ပေးမယ် ၊ စစ်မှုထမ်းရှောင်နေတယ်ဆိုတာကို စစ်တပ်ကို မပြောပါဘူး ဆိုတာမျိုးတွေနဲ့စည်းရုံးနေတာလို့ ဒေသခံတွေဆီက သိရပါတယ်။
လက်ရှိအချိန်မှာတော့ ဇလွန်မြို့နယ်ထဲမှာ ကြံ့ခိုင်ရေးရဲ့ မဲဆွယ်မှုတွေဟာ စတင်ခါစ အခြေအနေမှာပဲရှိနေသေးပြီး ကျေးရွာတချို့မှာပဲ တွေ့ဆုံပွဲတွေ၊ မဲဆွယ်ပွဲတွေ ပြုလုပ်နိုင်ပါသေးတယ်။
ကြံ့ခိုင်ရေးပါတီဟာ စစ်ကောင်စီက ပြုလုပ်မယ့် ရွေးကောက်ပွဲ နီးလာတာနဲ့အမျှ အချို့သော ဒေသတွေမှာ ကြံ့ခိုင်ရေးပါတီဝင်ရင် စစ်မှုထမ်းကင်းလွတ်ခွင့် ပေးမယ်ဆိုတဲ့ ပြောဆိုစည်းရုံးမှုတွေ ရှိနေချိန်မှာ ဇလွန်မြို့နယ်ထဲမှာတော့ စစ်မှုထမ်းကြဖို့ ထည့်သွင်းပြောကြားနေကြတာဖြစ်ပါတယ်။
ဇလွန်မြို့နယ်ဟာ လတ်တလောကာလမှာ တိုက်ပွဲတွေပြင်းထန်နေတဲ့ ဟင်္သာတခရိုင်ထဲက မြို့နယ်တခုဖြစ်ပါတယ်။
လာမယ့်ဒီဇင်ဘာလ၂၈ရက်မှာစပြုလုပ်မယ်. ရွေးကောက်ပွဲမှာ စစ်တပ်နောက်ခံ ကြံ့ခိုင်ရေးပါတီအပါအဝင်ပါတီ၉ခုက တနိုင်ငံလုံးအတိုင်းအတာဝင်ပြိုင်မှာဖြစ်ပြီး ပါတီ၅၂ခုကတော့ တိုင်းနဲ့ပြည်နယ်မှာ ဝင်ပြိုင်မှာဖြစ်ပါတယ်။