အမေရိကန်ရေတပ် လေယာဉ် ပြေးလမ်းကျော်ထွက်သွားပြီး ပင်လယ်ထဲပြုတ်ကျ

နိုဝင်ဘာ၊ ၂၁

ဟာဝိုင်ယီမှာ ဆင်းသက်ချိန် ပြေးလမ်းကို ကျော်ထွက်သွားတဲ့ အမေရိကန် စစ်လေယာဉ်တစီး ပင်လယ်ထဲ ပြုတ်ကျသွားခဲ့ကြောင်း သိရပါတယ်။

အမေရိကန် ရေတပ်ရဲ့ ကင်းထောက် လေယာဉ်ဟာ နိုဝင်ဘာ ၂၀ ရက်နေ့က ဟာ​ဝိုင်ယီ ကျွန်းစုမှာရှိတဲ့ အိုယာဟူ ကျွန်းပေါ်ကို ဆင်းသက်ရင်း မတော်တဆ အခြေအနေနဲ့ ကြုံခဲ့တာ ဖြစ်ပါတယ်။ 

ကျွန်းပေါ်မှာ ရှိနေတဲ့ မရိန်းတပ်ဖွဲ့ အခြေစိုက် စခန်းကို ဆင်းသက်ချိန် ရေတပ်ရဲ့ P-8A Poseidon လေယာဉ်ဟာ ပြေးလမ်းကို ကျော်ထွက်ပြီး ပင်လယ်ထဲမှာ တဝက်တပိုင်း နစ်မြုပ်သွားခဲ့ပါတယ်။ Boeing 737 ခရီးသည်တင် လေယာဉ်ရဲ့ ကိုယ်ထည် အခြေခံကို အသုံးပြု တည်ဆောက်ထားပြီး အင်ဂျင်နှစ်လုံး တပ်ထားတဲ့ လေယာဉ်မှာ လိုက်ပါလာသူတွေ ထိခိုက်ဒဏ်ရာရတာတော့ မရှိခဲ့ပါဘူး။

မရိန်းတပ်ဖွဲ့ ပြောရေးဆိုခွင့်ရ အရာရှိ ဟိုင်လီဟမ်းစ်က လေယာဉ်ပေါ် ပါလာသူ ၉ ဦးစလုံးကို ကယ်ဆယ်နိုင်ခဲ့တယ်လို့ အတည်ပြုပါတယ်။

ခါညွန်ဟီ ပင်လယ်အော် ရေပြင်မှာ နစ်မြုပ်နေတဲ့ လေယာဉ်ကို ပြန်လည် ဆယ်ယူဖို့ စတင် စီစဉ်နေပါတယ်။

P-8Aတွေဟာ အမေရိကန် ရေတပ်ရဲ့ ဘက်စုံသုံး ကင်းထောက် လေယာဉ်တွေလို့ သတ်မှတ်နိုင်ပြီး တိုက်ခိုက်ရေး ကဏ္ဍအတွက် တော်ပီဒိုတွေ၊ ခရုစ်ဒုံးကျည်တွေကိုပါ တပ်ဆင်နိုင်ပါတယ်။ ရေတပ်ဟာ ရန်သူ့ ရေပေါ်နဲ့ ရေအောက် သင်္ဘောတွေကို ထောက်လှမ်းတဲ့ မစ်ရှင်တွေအတွက် အဲဒီလေယာဉ်တွေကို ကျယ်ကျယ်ပြန့်ပြန့် အသုံးပြုနေကြောင်းလည်း သိရပါတယ်။

Ref: CNN