ဘားအံတက္ကသိုလ် ကျောင်းသားတစ်ဦးကို စစ်တပ်က အသက်သေတဲ့အထိ ညှင်းပန်းနှိပ်စက်

ဘားအံတက္ကသိုလ် ကျောင်းသားတစ်ဦးကို စစ်တပ်က ဖမ်းဆီးကာ အသက်သေဆုံးတဲ့အထိ ညှင်းပန်းသတ်ခဲ့ကြောင်း ဘားအံတက္ကသိုလ် ကျောင်းသားသမဂ္ဂက ဒီကနေ့ထုတ်ပြန်ပါတယ်။
တတိယနှစ် သင်္ချာအထူးပြု CDM ကျောင်းသားတစ်ဦးဖြစ်သူ မောင်ဥာဏ်ကိုဝင်းကို အကြမ်းဖက် စစ်တပ်က ပစ်ခတ် ဖမ်းဆီးပြီးနောက် နေရာမှာပင် အသက်သေဆုံးတဲ့အထိ နှိပ်စက်ခဲ့တယ်လို့ ကျဆုံးကျောင်းသားရဲ့ သူငယ်ချင်းတွေက သတင်းပေးပို့လို့ သိရကြောင်း ဘားအံတက္ကသိုလ်ကျောင်းသားသမဂ္ဂက ဆိုပါတယ်။
ဘယ်နေရာမှာ ပစ်ခတ်ဖမ်းဆီးခဲ့သလဲဆိုတာနဲ့ အသေးစိတ်အချက်အလက်တွေကိုတော့ ထုတ်ပြန်ထားခြင်း မရှိပါဘူး။
ဘားအံတက္ကသိုလ် ကျောင်းသားတွေထဲ ထောင်ဒဏ်နှစ်ရှည်ကျခံထားရသူတွေ၊ ဖမ်းဆီးနှိပ်စက် သတ်ဖြတ်ခံရတာတွေနဲ့ တောတွင်းရောက် လက်နက်ကိုင် တော်လှန်နေချိန်မှာ ကျောင်းသားတွေအနေနဲ့ CDM လှုပ်ရှားမှုကို ဆက်လက်ထိန်းသိမ်းထားပေးသင့်တယ်လို့လည်း ထုတ်ပြန်ထားပါတယ်။
ကျောင်းသားသမဂ္ဂအနေနဲ့ အခုလို စစ်တပ်ရဲ့ ကျူးလွန်မှုကို အမျိုးသားညီညွတ်ရေးအစိုးရ တရားရေးရာဝန်ကြီးဌာန၊ ပညာရေးဝန်ကြီးဌာန၊ လူ့အခွင့်အရေးဝန်ကြီးဌာန တို့အပြင် နိုင်ငံရေးအကျဉ်းသားများ ကူညီစောင့်ရှောက်ရေးအသင်း ( AAPP) နဲ့ ကုလသမဂ္ဂ ဌာနေကိုယ်စားလှယ်တို့ထံ တိုင်ကြားထားပါတယ်။