ICJ စီရင်ချက်ချပြီးနောက် ယူကေအစိုးရက မြန်မာစစ်သံမှူးကို နှင်ထုတ်

မြန်မာသံရုံး ယာယီတာဝန်ခံကိုလည်း ဆင့်ခေါ်ထားပြီးကုလသမဂ္ဂ လုံခြုံရေးကောင်စီ အစည်းအဝေး အရေးပေါ်ခေါ်ယူဖို့ပါ တောင်းဆိုလိုက်တာ ဖြစ်ပါတယ်။

 

၁၉၊ နိုဝင်ဘာ။

 

ရိုဟင်ဂျာတွေအပေါ် ဂျီနိုဆိုက် ကျူးလွန်ခဲ့ကြောင်း အပြည်ပြည်ဆိုင်ရာတရားရုံး (ICJ) ရဲ့ သမိုင်းဝင် စီရင်ချက်ကိုမြန်မာနိုင်ငံအနေနဲ့ အပြည့်အဝ လိုက်နာရမယ်လို့ ယူကေနိုင်ငံခြားရေးဝန်ကြီး အက်ဒ် မီလီဘန်းက နိုဝင်ဘာ ၁၉ ရက်ဒီနေ့မှာ သတိပေးပြောကြားလိုက်ပြီး လာမယ့်ရက်ပိုင်းအတွင်း နောက်ထပ် အရေးယူဆောင်ရွက်မှုတွေကို ထပ်မံထုတ်ပြန်သွားမယ်လို့ ကြေညာလိုက်ပါတယ်။

 

အခုလို ရာဇဝတ်မှုတွေကို အပြစ်ပေးအရေးယူခံရတာ မရှိဘဲ ကျူးလွန်လို့ မရနိုင်ဘူးဆိုတာ ပြသဖို့ ယူကေအစိုးရကမြန်မာစစ်သံမှူးကို နိုင်ငံအတွင်းကနေ နှင်ထုတ်လိုက်သလိုမြန်မာသံရုံး ယာယီတာဝန်ခံကိုလည်း ဆင့်ခေါ်ထားပြီးကုလသမဂ္ဂ လုံခြုံရေးကောင်စီ အစည်းအဝေး အရေးပေါ်ခေါ်ယူဖို့ပါ တောင်းဆိုလိုက်တာ ဖြစ်ပါတယ်။

 

ရိုဟင်ဂျာပြည်သူတွေအပေါ်  စစ်တပ်ရဲ့ ထိတ်လန့်ဖွယ်ရာဆက်ဆံပြုမူမှုတွေကို ပြင်းထန်စွာ ရှုတ်ချကြောင်းနဲ့ နှစ်ပေါင်းများစွာ ခါးစည်းခံခဲ့ရတဲ့ အကြမ်းဖက်မှု၊ နေရပ်စွန့်ခွာရမှုနဲ့ ညှဉ်းပန်းနှိပ်စက်ခံရမှုတွေအတွက် တာဝန်ခံမှု ရှိစေရေးလုပ်ဆောင်သွားဖို့ ယူကေက သန္နိဋ္ဌာန်ချထားတယ်လို့ ထုတ်ပြန်ချက်မှာ ဖော်ပြထားပါတယ်။

 

ဒါ့အပြင် ICJ စီရင်ချက် အကောင်အထည်ဖော်ရေး၊ တာဝန်ခံမှု ရှိစေရေးနဲ့ ရိုဟင်ဂျာတွေအတွက် တရားမျှတမှု ရရှိရေးတို့မှာ နိုင်ငံတကာ အသိုင်းအဝိုင်းကလည်း ပါဝင်ပံ့ပိုးရမယ့်အချိန်ဖြစ်တယ်လို့ ဝန်ကြီး အက်ဒ် မီလီဘန်းက တိုက်တွန်းထားပြီး ငြိမ်းချမ်းပြီး ဒီမိုကရေစီနည်းကျကာ အားလုံးပါဝင်နိုင်တဲ့ မြန်မာနိုင်ငံရဲ့ အနာဂတ်အတွက် ယူကေရဲ့ ထောက်ခံရပ်တည်မှုဟာ ခိုင်မြဲနေမှာ ဖြစ်တယ်လို့ ဆိုပါတယ်။

 

၂၀၁၉ ခုနှစ်၊ နိုဝင်ဘာလမှာ ဂမ်ဘီယာနိုင်ငံက OIC ကိုယ်စားပြုပြီး ၁၉၄၈ လူမျိုးတုံးသတ်ဖြတ်မှု တားဆီးရေးစာချုပ် ချိုးဖောက်မှုနဲ့ မြန်မာနိုင်ငံကို ICJ မှာ တရားစွဲဆိုခဲ့ပြီးနောက် ဒီနေ့ နိုဝင်ဘာ ၁၉ ရက်မှာ မြန်မာ ဂျီနိုဆိုက်ကျူးလွန်ကြောင်း တရားသူကြီး ၁၅ ဦးထဲက ၉ ဦး မဲခွဲဆုံးဖြတ်ကာနစ်နာသူတွေကို ၂ နှစ်အတွင်း လျော်ကြေးပေးဖို့ အမိန့်ချမှတ်ခဲ့တာ ဖြစ်ပါတယ်။