၂၀၂၅ ခုနှစ် ဒီဇင်ဘာလ ၂၈ ရက်နဲ့ ၂၀၂၆ ခုနှစ် ဇန်နဝါရီလ ၁၁ ရက်နေ့တို့မှာ ကျင်းပဖို့ စီစဉ်ထားတဲ့ စစ်ကော်မရှင်ရဲ့ အဆင့်လိုက် ရွေးကောက်ပွဲတွေကို အတိအလင်း ပယ်ချထားပါတယ်။
၂၈၊ နိုဝင်ဘာ။
ဥရောပပါလီမန်က မြန်မာနိုင်ငံ စစ်အာဏာသိမ်းမှုကို ပြင်းပြင်းထန်ထန် ရှုတ်ချပြီး စစ်ကော်မရှင်က ကျင်းပဖို့ ပြင်ဆင်နေတဲ့ အထွေထွေရွေးကောက်ပွဲကို တရားမဝင်ကြောင်း ပယ်ချလိုက်ပါတယ်။
နိုဝင်ဘာ ၂၇ ရက်နေ့က ဆုံးဖြတ်ချက်အတွင်း စနစ်တကျ ဖိနှိပ်မှုတွေနဲ့ ဆိုးရွားတဲ့ လူ့အခွင့်အရေး ချိုးဖောက်မှုတွေကို ထောက်ပြထားသလို အီးယူအနေနဲ့ အမျိုးသားညီညွတ်ရေးအစိုးရ (NUG) ကို ထောက်ခံထားပါတယ်။
၂၀၂၅ ခုနှစ် ဒီဇင်ဘာလ ၂၈ ရက်နဲ့ ၂၀၂၆ ခုနှစ် ဇန်နဝါရီလ ၁၁ ရက်နေ့တို့မှာ ကျင်းပဖို့ စီစဉ်ထားတဲ့ စစ်ကော်မရှင်ရဲ့ အဆင့်လိုက် ရွေးကောက်ပွဲတွေကို အတိအလင်း ပယ်ချထားပါတယ်။
ကြောက်ရွံ့မှုတွေ၊ လူထုအိုးအိမ်စွန့်ခွာ ထွက်ပြေးရမှုတွေနဲ့ အတိုက်အခံခေါင်းဆောင်တွေ ဖမ်းဆီးခံထားရတဲ့ လက်ရှိအခြေအနေမှာ ယုံကြည်စိတ်ချရတဲ့ ရွေးကောက်ပွဲ လုပ်ငန်းစဉ်တစ်ခု ဖြစ်လာနိုင်စရာ အကြောင်းမရှိဘူးလို့ ဥရောပပါလီမန် က ဖော်ပြထားပါတယ်။
ဒါ့အပြင် ၂၀၂၅ ခုနှစ် ဇူလိုင်လ ၂၉ ရက်နေ့မှာ ပြဋ္ဌာန်းခဲ့တဲ့ “ပါတီစုံဒီမိုကရေစီ အထွေထွေရွေးကောက်ပွဲများအား နှောင့်ယှက်ခြင်း၊ ဟန့်တားခြင်းနှင့် ဖျက်ဆီးခြင်းများမှ ကာကွယ်သည့် ဥပဒေ” ကိုလည်း အစီရင်ခံစာမှာ မီးမောင်းထိုးပြထားပါတယ်။
ရွေးကောက်ပွဲလုပ်ငန်းစဉ်ကို ဝေဖန်တာဟာ ရာဇဝတ်မှုဖြစ်ပြီး ထောင်ဒဏ် နှစ် ၂၀ အထိ ဒါမှမဟုတ် သေဒဏ်အထိ ပြစ်ဒဏ်ချမှတ်နိုင်တဲ့ အခြေအနေတွေရှိနေပြီး Facebook ပေါ်မှာ မှတ်ချက်တင်ရုံနဲ့ ထောင်ဒဏ်ချမှတ်ခံရတဲ့ အခြေအနေတွေကိုလည်း ဥရောပပါလီမန်က ဖော်ပြထားပါတယ်။
နိုင်ငံတကာ တာဝန်ယူမှုနဲ့ ပိတ်ဆို့အရေးယူမှုအတွက် အီးယူက စစ်အုပ်စုနဲ့ သူတို့ရဲ့ စီးပွားရေးလုပ်ငန်းတွေအပြင် လက်နက်ရောင်းချသူတွေကို ပစ်မှတ်ထား ပိတ်ဆို့အရေးယူမှုတွေကို ဆက်လက်လုပ်ဆောင် တိုးချဲ့ဖို့ တိုက်တွန်းထားပါတယ်။
ဥရောပပါလီမန်ဟာ မြန်မာနိုင်ငံအပေါ် ကမ္ဘာလုံးဆိုင်ရာ လက်နက်ပိတ်ဆို့မှု အရေးပေါ် ချမှတ်ဖို့ ကုလသမဂ္ဂ လုံခြုံရေးကောင်စီကို တောင်းဆိုထားပြီး စစ်အုပ်စုဘက်ကနေ ဆက်လက်ထောက်ခံနေကြတဲ့ ရုရှားနဲ့ တရုတ်နိုင်ငံတွေကိုတော့ ရှုတ်ချထားပါတယ်။
ဒါ့အပြင် အာဆီယံရဲ့ ပူးပေါင်းဆောင်ရွက်မှုတွေမှာ အားလုံးပါဝင်နိုင်တဲ့ နိုင်ငံရေးလုပ်ငန်းစဉ် ဖြစ်ပေါ်လာစေဖို့ ကုလသမဂ္ဂ၊ NUG တို့နဲ့ နီးကပ်စွာ ပူးပေါင်းဆောင်ရွက်ဖို့ အီးယူက အာဆီယံကို တိုက်တွန်းထားပါတယ်။
ဥရောပပါလီမန် အနေနဲ့ မြန်မာပြည်သူတွေနဲ့ တသားတည်းရှိကြောင်းနဲ့ ပြည်ထောင်စုလွှတ်တော် ကိုယ်စားပြုကော်မတီ (CRPH) နဲ့ အမျိုးသားညီညွတ်ရေးအစိုးရ (NUG) တို့ကို နိုင်ငံရဲ့ ဒီမိုကရေစီဆန္ဒကို ကိုယ်စားပြုတဲ့ တရားဝင် ကိုယ်စားလှယ်တွေအဖြစ် အသိအမှတ်ပြုတယ်လို့ ဖော်ပြထားပါတယ်။