“အဓိကတော့ မဲပေးခိုင်းတာပေ့ါဗျာ၊ အားလုံးမဲပေးရမယ်ဆိုတာမျိုး ပြောတယ်လို့ သိရတယ်။ နောက် ကာကွယ်ရေး အမြင်ရှိတယ်တို့၊ ဒိုတာဝန်အရေးသုံးပါးကို ကာကွယ်တယ်တို့ဆိုတာကလည်း သူတို့လူတွေပေ့ါ။ ကြံ့ခိုင်ရေးကို မဲ ထည့်ခိုင်းတာပါပဲ၊ အဲဒီလိုပဲ နားလည်တယ် ကျနော်တို့ကတော့”
၂၄၊ နိုဝင်ဘာ။
လာမယ့်ရွေးကောက်ပွဲမှာ မဲပေးခွင့်ရှိသူတိုင်း မဲပေးကြဖို့နဲ့ မဲပေးတဲ့အခါမှာလည်း ဒိုတာဝန်အရေးသုံးပါးကို ကာ ကွယ်ထိန်းသိမ်းစောင့်ရှောက်နိုင်သူ၊ ကာကွယ်ရေးအမြင်ရှိသူတွေကို ရွေးချယ်မဲပေးကြဖို့ အာဏာသိမ်းစစ်ခေါင်း ဆောင် ဗိုလ်ချုပ်မှူးကြီး မင်းအောင်လှိုင်က ဧရာ၀တီတိုင်း မအူပင်ခရီးစဉ်မှာ ပြောဆိုခဲ့ပါတယ်။
စစ်ခေါင်းဆောင်ဟာ မနေ့က နိုဝင်ဘာ ၂၃ ရက်နေ့မှာ ကျင်းပခဲ့တဲ့ မအူပင် စိုက်ပျိုးရေးနဲ့ မွေးမြူရေးတက္ကသုလ်ဖွင့် ပွဲအခမ်းသို့ သွားရောက်ခဲ့ပြီး အဲဒီဖွင့်ပွဲပြီးနောက် နေ့လယ်ပိုင်းမှာ ဌာနဆိုင်ရာတာဝန်ရှိသူတွေ၊ မြို့ခံတွေနဲ့ ထပ်မံ တွေ့ဆုံခဲ့ကာ အဲဒီလို ပြောခဲ့တာပါ။
“အဓိကတော့ မဲပေးခိုင်းတာပေ့ါဗျာ၊ အားလုံးမဲပေးရမယ်ဆိုတာမျိုး ပြောတယ်လို့ သိရတယ်။ နောက် ကာကွယ်ရေး အမြင်ရှိတယ်တို့၊ ဒိုတာဝန်အရေးသုံးပါးကို ကာကွယ်တယ်တို့ဆိုတာကလည်း သူတို့လူတွေပေ့ါ။ ကြံ့ခိုင်ရေးကို မဲ ထည့်ခိုင်းတာပါပဲ၊ အဲဒီလိုပဲ နားလည်တယ် ကျနော်တို့ကတော့” လို့ မအူပင်မြို့ခံတဦးက ပြောပါတယ်။
စစ်ခေါင်းဆောင်ဟာ ရွေးကောက်ပွဲနဲ့ ပက်သက်ပြီး “အဓိကအားဖြင့် တိုင်းပြည်နှင့် ဒေသအကျိုးကို စေတနာထား၍ ဆောင်ရွက်နိုင်သူ၊ ဒိုတာဝန်ရေးသုံးပါးကို ကာကွယ်ထိန်းသိမ်း စောင့်ရှောက်နိုင်သူ၊ နိုင်ငံရေး၊ စီပွားရေးနှင့် ကာကွယ်ရေးအမြင်ရှိသူများကို ဦးစားပေးရွေးချယ်၍ ဆန္ဒမဲပေးကြစေလိုကြောင်း” ပြောခဲ့တယ်လို့ အစိုးရပိုင် သတင်းစာတွေမှာ ဖေါ်ပြထားပါတယ်။
အရင်က ကွန်ပျူတာတက္ကသိုလ်ကျောင်းဆောင်ဟောင်းကို ပြန်လည်ဆောက်လုပ်ကာ စိုက်ပျိုးရေးနဲ့ မွေးမြူရေး တက္ကသိုလ်အဖြစ် ဖွင့်လှစ်ခဲ့တာဖြစ်ပြီး အဲဒီတက္ကသိုလ်ဖွင့်ပွဲအတွက် ကျောင်းသူ၊ ကျောင်းသားတွေကို အတင်းအကြပ် မလာမနေရ ခေါ်ထားခဲ့တယ်လို့ မအူပင်ဒေသခံတွေက ပြောကြပါတယ်။
“ကျောင်းသားတွေကို အတင်းခေါ်ထားတာ၊ အဲဒီပွဲအတွက် စီစဉ်နေကြတာ ကြာပြီ။ တလနီးပါးလောက် ကတည်းက ကြိုလုပ်နေကြတာ” လို့ အထက်ပါ မအူပင်မြို့ခံက ပြောပါတယ်။
အရပ်သားအစိုးရလက်ထဲကနေ တိုင်းပြည်အာဏာတွေကို သိမ်းယူခဲ့တဲ့ စစ်ခေါင်းဆောင်ဟာ ၂၀၂၀ ရွေးကောက်ပွဲမှာ မသမာမှုတွေ ဖြစ်ခဲ့ပြီး အဲဒီတုန်းက တာဝန်ရှိသူတွေ ဥပဒေနဲ့အညီ ဖြေရှင်းဆောင်ရွက်မှု မရှိခဲ့တာကြောင့် ဖွဲ့စည်းပုံအခြေခံဥပဒေနဲ့အညီ နိုင်ငံတော်တာဝန်ကို ထမ်းဆောင်ခဲ့ရတာဖြစ်တယ်လို့လည်း မအူပင် တက္ကသိုလ်ဖွင့်ပွဲမှာလည်း အရင်ပြောဆိုနေကျအတိုင်း အရပ်သားအစိုးရကို အပြစ်ဖို့ခဲ့ပါသေးတယ်။
တိုင်းပြည်အာဏာကို သိမ်းယူပြီး ငါးနှစ်နီးပါးကြာတဲ့ထိ လက်မလွှတ်တဲ့ စစ်ခေါင်းဆောင်ဟာ စစ်တပ်ဦးစီး ကျင်းပမယ့် ရွေးကောက်ပွဲကိုတော့ လွတ်လွပ်မျှတတဲ့ ပါတီစုံဒီမိုကရေစီ အထွေထွေရွေးကောက်ပွဲလို့ သုံးနှုန်းပြောဆိုကာ မဲပေးကြဖို့ ပြောဆိုတိုက်တွန်းနေတာပါ။
“ဘယ်လိုလုပ်ပြီးပြီး မျှတမလဲ စဉ်းစားကြည့်ပေ့ါ၊ ကြံ့ခိုင်ရေးက မဲဆွယ်ရင်လည်း အသာစီးရနေတာ။ တခြားပါတီ တွေက ဘာမှ လွတ်လပ်ခွင့်မရှိဘူး၊ မဲစာရင်းကလည်း အမှားကြီးတွေ” လို့ ဧရာ၀တီတိုင်းအတွင်းမှ ပြည်သူ့ပါတီ ဝင်တဦးက ပြောပါတယ်။
လာမယ့် ဒီဇင်ဘာ ၂၈ ရက်နေ့မှာ ရွေးကောက်ပွဲ ပထမအသုတ်ကို ကျင်းပမယ်လို့ ကြေငြာထားပြီး အဲဒီပထမသုတ်ထဲမှာ မအူပင်မြို့နယ်လည်း ပါဝင်ပါတယ်။
မအူပင်မြို့နယ်မှာ စစ်တပ်ကျောထောက်နောက်ခံ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ ပြည်သူ့ရှေ့ဆောင်ပါတီ၊ ပြည်သူ့ပါတီ၊ မြန်မာနိုင်ငံတောင်သူလယ်သမားဖွံ့ဖြိုးတိုးတက် ရေးပါတီ၊ တိုင်းရင်းသားစည်းလုံးညီညွတ်ရေရးပါတီ၊ ရှမ်းနှင့် တိုင်းရင်းသားများဒီမိုကရက်တစ်ပါတီတို့ ဝင်ပြိုင်ကြမှာ ဖြစ်ပါတယ်။
စစ်ခေါင်းဆောင်ဟာ မအူပင်ခရီးစဉ်မှာ မအူပင်မြို့တွင်းရှိ အခြားတက္ကသိုလ်၊ သင်တန်းကျောင်းတွေကိုလည်း လှည့်ပတ်ကြည့်ခဲ့ပြီး သူရောက်နေချိန် နေ့လည်ပိုင်းမှာ မအူပင်မြို့ အမှတ်(၁)ရပ်ကွက်၊ ဇောတိကစက်ဝန်းအတွင်းရှိ လျှော်သိုလှောင်ရုံနှစ်ရုံ မီးလောင်ခဲ့ပါတယ်။