ရုရှားဘက်ကို အလွန်အမင်း ဘက်လိုက်ထားတယ်လို့ ယူကရိန်းနဲ့ သူ့ရဲ့ မဟာမိတ်တွေက ရှုမြင်ခဲ့ကြတာကြောင့် ထရမ့်အစိုးရအဖွဲ့ရဲ့ မူဘောင်ကြမ်းကို ပြင်ဆင်ခဲ့ပုံရတယ်လို့ သိရပါတယ်။
၂၄၊ နိုဝင်ဘာ။
ရုရှားနဲ့ ဖြစ်ပွားတဲ့ စစ်ပွဲကို အဆုံးရေးအတွက် ရေးဆွဲထားတဲ့ ငြိမ်းချမ်းရေးမူဘောင်ကို ပြန်လည်ပြင်ဆင်ထားတယ်လို့ အမေရိကန်နဲ့ ယူကရိန်းတို့က နိုဝင်ဘာ ၂၃ရက်နေ့မှာ ပြောပါတယ်။
ရုရှားဘက်ကို အလွန်အမင်း ဘက်လိုက်ထားတယ်လို့ ယူကရိန်းနဲ့ သူ့ရဲ့ မဟာမိတ်တွေက ရှုမြင်ခဲ့ကြတာကြောင့် ထရမ့်အစိုးရအဖွဲ့ရဲ့ မူဘောင်ကြမ်းကို ပြင်ဆင်ခဲ့ပုံရတယ်လို့ သိရပါတယ်။
ဂျီနီဗာမြို့မှာ အမေရိကန်နဲ့ ယူကရိန်း ကိုယ်စားလှယ်အဖွဲ့တွေ တွေ့ဆုံဆွေးနွေးပြီးတဲ့နောက် အခုလို ပူးတွဲကြေညာခဲ့တာပါ။
အဆိုပါ ကြေညာချက်ထဲမှာ သူတို့ရဲ့ ဆွေးနွေးမှုဟာ အလွန်အကျိုးရှိပြီး ခရီးရောက်ခဲ့တယ်လို့ ပြောထားသလို လာမယ့်ရက်ပိုင်းတွေမှာလည်း ဆက်လက်ဆွေးနွေးသွားဦးမယ်လို့ ဆိုပါတယ်။
ဒါပေမဲ့ ရုရှားဘက်က ခြိမ်းခြောက်လာမယ့် အန္တရာယ်ကနေ ယူကရိန်းရဲ့ လုံခြုံရေးကို ဘယ်လို အာမခံချက်ပေးမလဲဆိုတဲ့ ကိစ္စအပါအဝင် ဖြေရှင်းဖို့ လိုအပ်နေတဲ့ ကိစ္စရပ်အများအပြားနဲ့ ပတ်သက်ပြီး အသေးစိတ် ထုတ်ဖော်ပြောကြားတာတော့ မရှိခဲ့ပါဘူး။
အိမ်ဖြူတော်က သီးခြားထုတ်ပြန်ချက်တစောင်မှာတော့ ဒီမူကွဲအသစ်မှာ ပိုမိုခိုင်မာအားကောင်းတဲ့ လုံခြုံရေးအာမခံချက်တွေပါဝင်ပြီး ယူကရိန်းကိုယ်စားလှယ်အဖွဲ့ကလည်း ဒီအချက်ဟာ သူတို့ရဲ့ အမျိုးသားအကျိုးစီးပွားကို ထင်ဟပ်ကိုက်ညီတယ်လို့ မှတ်ချက်ပြုကြောင်း ဖော်ပြထားပါတယ်။
ယူကရိန်းတာဝန်ရှိသူတွေဘက်ကတော့ သူတို့ သဘောထားတွေပါဝင်တဲ့ သီးခြားထုတ်ပြန်ချက် ထုတ်ပြန်တာမျိုး မရှိသလို သတင်းထောက်တွေက မှတ်ချက်တောင်းဖို့ ဆက်သွယ်ရာမှာလည်း ချက်ချင်း အဆက်အသွယ် မရရှိခဲ့ပါဘူး။
ဆွေးနွေးပွဲတွေကို ဦးဆောင်ခဲ့သူ အမေရိကန် နိုင်ငံခြားရေးဝန်ကြီး မာကို ရူဘီယိုက နေတိုး (NATO) အဖွဲ့ရဲ့ အခန်းကဏ္ဍလိုမျိုး မေးခွန်းထုတ်စရာ ကိစ္စရပ်တွေမှာတော့ ဆက်ပြီးညှိနှိုင်းလုပ်ဆောင်စရာတွေ ကျန်နေသေးတယ်လို့ ပြောပါတယ်။
ဒါပေမဲ့ သမ္မတ ဒေါ်နယ်ထရမ့် လိုလားတဲ့ ယူကရိန်းအတွက် အချက် ၂၈ ချက်ပါ ငြိမ်းချမ်းရေးစီမံချက်ထဲက သဘောထားကွဲလွဲပြီး မပြေလည်သေးတဲ့ အချက်တွေကိုတော့ သူ့အဖွဲ့အနေနဲ့ အရေအတွက် လျှော့ချနိုင်ခဲ့သလို သဘောတူညီမှု ပိုရလာပြီလို့ ဆိုပါတယ်။
“ဒီနေ့မှာ ကျွန်တော်တို့အနေနဲ့ အဲဒီကိစ္စကို အတော်လေး သိသိသာသာကြီး ခရီးရောက်အောင်မြင်အောင် လုပ်ဆောင်နိုင်ခဲ့ပါတယ်”လို့ ရူဘီယိုက ဂျီနီဗာမြို့မှာ သတင်းထောက်တွေကို ပြောခဲ့ပါတယ်။
Ref – Reuters