စစ်တပ်ဟာ ရခိုင်ပြည်နယ်အတွင်းက လက်လွှတ်ထားရတဲ့မြို့နယ်တွေရဲ့ အရပ်သားနေရာတွေကို လေကြောင်း၊ လက်နက်ကြီးပစ်ခတ်မှုတွေ ဆက်တိုက်လုပ်လာနေပြီး ပြီးခဲ့တဲ့ အောက်တိုဘာလ ၂၉၊ ၃၀ နဲ့ ၃၁ ရက်တို့ သုံးရက်အတွင်းမှာပဲ လေကြောင်း၊ လက်နက်ကြီးကြောင့် သေဆုံးရသူ ၁၂ ဦးနဲ့ ထိခိုက် ဒဏ်ရာရသူ ၃၁ ဦးရှိခဲ့ပါတယ်။
၂၁ ၊ နိုဝင်ဘာ။
အာရက္ခတပ်တော်(AA)ထိန်းချုပ်ထားတဲ့ ဂွမြို့နယ် ကျိန္တလီမြို့ပေါ်ကို စစ်ကော်မရှင်တပ်က ဒီနေ့ နေ့လယ်တနာရီ ကျော်အချိန်မှာ ဂျက်ဖိုက်တာနဲ့ ပေါင်ငါးရာဗုံးတလုံးကြဲချတိုက်ခိုက်ခဲ့တာကြောင့် မြို့ထဲနေထိုင်နေကြတဲ့ အရပ်သား ကလေးတဦး သေဆုံးပြီး နောက်ထပ်နှစ်ဦးမှာ ပြင်းထန်ဒဏ်ရာ
ရရှိသွားပါတယ်။
“လူနေအိမ်ကို တည့်တည့်ကျတာ၊ အိမ်မှာရှိတဲ့ တယောက် သေသွားတယ်။ အနားက နှစ်ယောက်က ဒဏ်ရာရ သွားတယ်။ အခုလူတွေ ရှောင်နေကြရပါတယ်။နေ့ခင်းဘက် လူတွေ အနားယူတုန်းအချိန်မှာ လာချတာ၊ အတော် ကြီးကို ယုတ်မာတယ်” လို့ ဂွမြို့ နယ်အတွင်း လူမှုကူညီရေးလုပ်နေသူ ဒေသခံတဦးက ပြောပါတယ်။
လေကြောင်းဗုံးကြဲမှုကြောင့် အသက် ၇ နှစ်အရွယ် မောင်ချမ်းဘုန်းသက် သေဆုံးပြီး မောင်ချမ်းဘုန်းသက်ရဲ့ဖခင်ဖြစ်သူ ကိုငြိမ်းချမ်းကျော်နဲ့ ကိုမြတ်သူရစိုးတို့ ထိခိုက်ဒဏ်ရာရခဲ့ကာ
နေအိမ်နှစ်လုံးလည်း ပျက်စီးသွားခဲ့တယ်လို့ သိရပါတယ်။
ကျိန္တလီမြို့ဟာ ဂွမြို့နဲ့ မိုင်သုံးဆယ်ဝန်းကျင်အကွာမှာ တည်ရှိပြီး အဲဒီဒေသမှာ တိုက်ပွဲမရှိတော့တာ တနှစ်နီးပါး ကြာ ပြီဖြစ်ပြီး အရပ်သားတွေနဲ့ စစ်ဘေးရှောင်ပြည်သူတွေနေထိုင်နေကြတာဖြစ်ပါတယ်။ AA ဟာ ဧရာ၀တီတိုင်းနဲ့ ထိစပ်နေတဲ့ ဂွမြို့နယ်တခုလုံးကို ပြီးခဲ့တဲ့ ၂၀၂၄ ခုနှစ် ဒီဇင်ဘာလကုန်ပိုင်းမှာ အပြီးပြတ်သိမ်းပိုက်ထိန်းချုပ်ထားခဲ့ တာဖြစ်ပြီး လက်ရှိမှာတော့ အုပ်ချုပ်ရေးယန္တရားတွေ စတင်လည်ပတ်နေပြီဖြစ်ပါတယ်။
ရခိုင်ပြည်နယ်အတွင်းက မြို့နယ်ပေါင်း ၁၄ ခုကို လက်လွှတ်ထားရတဲ့ စစ်ကော်မရှင်တပ်ဟာ မနေ့က နိုဝင်ဘာ ၂၀ ရက်နေ့ကလည်း ပြည်နယ်မြောက်ပိုင်းရှိ မြောက်ဦးမြို့နယ် ဘောင်းဒွတ်ရွာကိုလည်း လေကြောင်းကနေ ဗုံးကြဲခဲ့တာ ကြောင့် နွားနှစ်ကောင် သေဆုံးကာ နှစ်ကောင် ဒဏ်ရာရခဲ့ပါတယ်။
“မြောက်ဦးပတ်လည်၊ မင်းပြားဘက်တွေထိ ဝဲနေခဲ့တာ၊ အနီးကပ်ကို ဝဲနေခဲ့တယ်၊ ကံကောင်းလို့ပါ ရွာနားကိုပဲ ကျလို့ လူအထိအခိုက်မရှိခဲ့တာ” လို့ မြောက်ဦးမြို့ခံအမျိုးသမီးတဦးက ပြောပါတယ်။
စစ်တပ်ဟာ ရခိုင်ပြည်နယ်အတွင်းက လက်လွှတ်ထားရတဲ့မြို့နယ်တွေရဲ့ အရပ်သားနေရာတွေကို လေကြောင်း၊ လက်နက်ကြီးပစ်ခတ်မှုတွေ ဆက်တိုက်လုပ်လာနေပြီး ပြီးခဲ့တဲ့ အောက်တိုဘာလ ၂၉၊ ၃၀ နဲ့ ၃၁ ရက်တို့ သုံးရက်အတွင်းမှာပဲ လေကြောင်း၊ လက်နက်ကြီးကြောင့် သေဆုံးရသူ ၁၂ ဦးနဲ့ ထိခိုက် ဒဏ်ရာရသူ ၃၁ ဦးရှိခဲ့ပါတယ်။
ရခိုင်ပြည်နယ်မှာ ပြီးခဲ့တဲ့ ၂၀၂၃ နိုဝင်ဘာ ၁၃ ရက်ကနေ ၂၀၂၅ စက်တင်ဘာလ ၃၀ ရက်နေ့ထိ နှစ်နှစ်နီးပါးအတွင်း အာဏာသိမ်းစစ်ကော်မရှင်တပ်ရဲ့ လက်ချက်ကြောင့် သေဆုံးရသူ ၉၇၀ ဦးနဲ့ ထိခိုက်ဒဏ်ရာရသူ ၂၀၅၄ ဦးရှိခဲ့ ကြောင်း AA ရဲ့ လူသားချင်းစာနာထောက်ထားရေးနဲ့ ဖွံ့ဖြိုးရေးဆိုင်ရာပူးပေါင်းဆောင် ရွက်ရေးရုံး(HDCO)က ထုတ် ပြန်ထားတဲ့ အချက်အလက်တွေမှာ ဖော်ပြထားပါတယ်။
၁၀၂၇ စစ်ဆင်ရေးကို AA နဲ့အတူ ရှမ်းပြည်နယ်မြောက်ပိုင်းမှာ စတင်ခဲ့တဲ့ ညီနောင်မဟာမိတ်သုံးဖွဲ့ထဲက တအာင်း တပ်(TNLA)နဲ့ ကိုးကန့်တပ် (MNDAA)တို့ ကတော့ စစ်ကော်မရှင်နဲ့ အပစ်ရပ်ထားကြပါတယ်။
အဲဒီလိုရှမ်းမြောက် မှာ အပစ်ရပ်နေတာကြောင့် စစ်ကော်မရှင်အနေနဲ့ ရခိုင်ပြည်အတွင်း လေကြောင်းအားကိုးကာ အရပ်သားတွေကို ပစ်မှတ်ထားတိုက်ခိုက်၊ ဖိအားပေးမှုတွေ ဆက်ရှိလာနိုင်တယ်လို့ အကဲခတ်တွေက သုံးသပ်ထားကြပါတယ်။
ချင်းပြည်နယ် ပလက်၀မြို့နယ်နဲ့ ရခိုင်ပြည်နယ်အတွင်းက မြို့နယ် ၁၄ ခုကို အပြီးသတ်သိမ်းပိုက်ထားပြီး စစ်တွေ၊ ကျောက်ဖြူမြို့နယ်အပါအဝင် ရခိုင်ရိုးမတောင်ခြေ မကွေးတိုင်း၊ ပဲခူးတိုင်းနဲ့ ဧရာ၀တီတိုင်းတို့အတွင်း စစ်ကော် မတပ်ရှင်တပ်တွေနဲ့ တိုက်ပွဲဖြစ်နေတဲ့ AA ဟာ ရခိုင်ဒေသတခုလုံးကို အပြီးပြတ်သိမ်းပိုက်သွားမယ်လို့ မကြာခဏ ထုတ်ပြောကြေငြာထားပါတယ်။