“စက်တင်ဘာ ၁၈ မှာ မက်ဆင်ဂျာကနေ စကားလာပြောသေးတယ်။ ၂၃ ရက်နေ့ကျတော့ သူ အရက်မူးပြီးရန်ဖြစ်လို့ အချုပ်ချထားတယ်လို့ ရဲဘော်တယောက်က လာပြောတယ်။ သေချာတာကတော့ ကာချုပ် (တပ်စုမှူး တိုက်မောင်း) အသက်မရှင်တော့ဘူးဆိုတာတော့ ပြောလို့ရပါတယ်ဗျ
၂၁၊ နိုဝင်ဘာလ။
ဧရာဝတီတိုင်း၊ ဘိုကလေးမြို့နယ် ပညာရေး သပိတ်ဦးဆောင်သူ CDM ဖြစ်တဲ့ တပ်စုမှူးတိုက်မောင်း (ခ) ရဲဘော်ကာချုပ်နဲ့ ရဲဘော် ပလာတူး (ခ) သန်းဇော်တို့ ပျောက်ဆုံးနေမှုနဲ့ပတ်သက်ပြီး KNU/KNLA ရဲ့ သက်ဆိုင်ရာ စစ်ရေးနယ်မြေ တာဝန်ရှိသူတွေဘက်က နှစ်လနီးပါး ကြာမြင့်တဲ့ အထိ အခြေအနေ တစုံတရာကို ဖြေရှင်းပေးတာ မရှိသေးပါဘူး။
ဒီဖြစ်စဉ်နဲ့ ပါတ်သက်ပြီး မိသားစုဝင်တွေဘက်က ဒီလဆန်းပိုင်း ဖြစ်တဲ့ နိုဝင်ဘာ ၁ ရက်နေ့ကတည်းက တရားဝင်စာပို့တောင်းဆိုတာတွေ လုပ်ခဲ့ပေမယ့် KNU/KNLA ဘက်ကတော့ ဒီနေ့အထိ တစုံတရာ တုန့်ပြန်တာ မရှိသေးဘူးလို့ သိရပါတယ်။
“ကျွန်တော်တို့ သတင်းတွေကြားကတည်းက ဗိုလ်သာလောကို မေးတယ်။ မဖြေဘူး။ အခုချိန်ထိလည်း မဖြေဘူး အဆက်သွယ်လည်း မရဘူး။ ကျွန်တော်တို့က ရဲဘော်ကာချုပ်ရဲ့တော်လှန်ရေးခရီးဟာ ဂုဏ်သိက္ခာရှိရှိ ဖြတ်သန်းခဲ့တာမို့ သူ့အတွက်တရားမျှတမှုလိုချင်ရုံပါပဲ ခင်ဗျာ ” လို့ ရဲဘော်ကာချုပ်ရဲ့ ညီဖြစ်သူ ရဲဘော် မင်းဘုဏ်းလူက DNA ကို ပြောပါတယ်။
NUG ကာကွယ်ရေးဝန်ကြီးဌာနရဲ့ အထူးတိုင်း စစ်ဌာန၊ စစ်သုံ့ပန်း ထိန်းသိမ်းရေးမှာ သင်တန်းနည်းပြအဖြစ် တာဝန်ထမ်းဆောင်ခဲ့တဲ့ တပ်စုမှူးတိုက်မောင်းနဲ့ ရဲဘော် ပလာတူးတို့ပါဝင်တဲ့ တပ်ခွဲကို KNU/KNLA တပ်ရင်း ၁၈ ရဲ့ ဗိုလ်သာလောက ကော့ကရိတ်တိုက်ပွဲမှာ ပါဝင်ပေးဖို့ စက်တင်ဘာလက တာဝန်ပေးခဲ့တဲ့ အတွက် ရွှေ့ပြောင်းထွက်ခွာအပြီးမှာ အခုလို နှစ်လနီးပါးကြာအောင် ပျောက်ဆုံးနေခဲ့တာ ဖြစ်ပါတယ်။
ဒီလိုပျောက်ဆုံးသွားတဲ့ ဖြစ်စဉ်အတွက် ဒီနှစ်ဦးဟာ စစ်ကောင်စီတပ်တွေရဲ့ ဖမ်းဆီးခြင်းကို ခံလိုက်ရသလိုလို၊ ရှေ့တန်းမှာ အရက်မူးပြီး စစ်ကောင်စီနဲ့ ပူးပေါင်းသွားသလိုလို သတင်းတွေ ထွက်ပေါ် ခဲ့ပေမယ့် နောက်ဆုံး ရရှိတဲ့ သတင်းတွေ အရတော့ သူတို့နှစ်ဦးကို ရှေ့တန်းမှာ အရက်သောက်တဲ့ အတွက် ဗိုလ်သာလော အမိန့်နဲ့ ဖမ်းဆီး ထိပ်တုံးခတ်ခံရပြီး KNLA အဖွဲ့ဝင်တွေက စစ်ဆေးမေးမြန်းအပြီး လက်လွန် သေဆုံးသွားခဲ့ပြီလို့လည်း ပြောဆိုမှုတွေ ရှိနေပါတယ်။
ရဲဘော်ကာချုပ် (ခ) တပ်စုမှူး တိုက်မောင်း တို့တပ်ခွဲ အနေနဲ့ ဗိုလ်သာလောဆီကို မသွားခင် နောက်ဆုံးရှိနေခဲ့တဲ့ အထူးတိုင်း စစ်ဌာန၊ စစ်သုံ့ပန်း ထိန်းသိမ်းရေး တာဝန်ခံဖြစ်သူ သားနတ်သျှင်နောင်ကတော့ စက်တင်ဘာ ၁၈ ရက်နေ့ထိ သူနဲ့ အဆက်သွယ်ရရှိခဲ့တယ်လို့ ဆိုပါတယ်။
“စက်တင်ဘာ ၁၈ မှာ မက်ဆင်ဂျာကနေ စကားလာပြောသေးတယ်။ ၂၃ ရက်နေ့ကျတော့ သူ အရက်မူးပြီးရန်ဖြစ်လို့ အချုပ်ချထားတယ်လို့ ရဲဘော်တယောက်က လာပြောတယ်။ သေချာတာကတော့ ကာချုပ် (တပ်စုမှူး တိုက်မောင်း) အသက်မရှင်တော့ဘူးဆိုတာတော့ ပြောလို့ရပါတယ်ဗျ ” လို့ သားနတ်သျှင်နောင်က DNA ကိုပြောပါတယ်။
ရဲဘော်ကာချုပ် (ခ) တပ်စုမှူး တိုက်မောင်းဟာ တော်လှန်ရေးအပေါ် သစ္စာရှိသူဖြစ်ပြီး စစ်အာဏာရှင် တော်လှန်ရေးမှာ တက်ကြွစွာ ပါဝင်ခဲ့သူဖြစ်တာကြောင့် စစ်ကောင်စီ လက်အောက်ကို ဝင်ရောက်ခိုလှုံသွားတယ်ဆိုတဲ့ ပုံစံမျိုး နာမည်ဖျက်တာမျိုးနဲ့ မတရားသဖြင့် သေဆုံးရတဲ့ ဖြစ်စဉ်မျိုးတွေ သတင်းထွက်နေတာဟာ တော်လှန်ရေးအတွက် မကောင်းတဲ့ သက်ရောက်မှုတွေ ဖြစ်စေတယ်လို့ အမည်မဖော်လိုတဲ့ တပ်ရင်းမှူးတဦးက မှတ်ချက်ပေးပါတယ်။
လက်ရှိ ရဲဘော်ကာချုပ် (ခ) တပ်စုမှူး တိုက်မောင်းနဲ့ ရဲဘော် ပလာတူးတို့အတွက် တောင်းဆိုနေကြတဲ့ တောင်းဆိုချက်တွေထဲမှာ ဒီနှစ်ဦးနဲ့ ပတ်သက်တဲ့ သတင်းတွေကို တိတိကျကျ ထုတ်ပြန်ပေးဖို့၊ အကယ်၍ ကျဆုံးသွားခဲ့တယ်ဆိုရင် ဘယ်တိုက်ပွဲမှာ ကျဆုံးခဲ့ခြင်းဖြစ်ကြောင်း ထုတ်ပြန်ပေးဖို့၊ အချိန်နဲ့ တပြေးညီ မိသားစုကို အသိမပေး မထုတ်ပြန်ခဲ့ခြင်းဟာ ဘာကြောင့်ဆိုတာကို ဖြေရှင်းပေးဖို့တွေ ပါဝင်ပါတယ်။
ဒါအပြင် အရက်မူးခြင်းကနေ အစပြု၍ သေဆုံးသည်ထိဖြစ်ရသော ဖြစ်စဉ်မျိုး ဖြစ်ပေါ်ခဲ့တာမျိုး ဆိုပါက တာဝန်ရှိသူများက တာဝန်ယူမှု တာဝန်ခံမှုရှိရှိနဲ့ ယခု ကိစ္စကို ပွင့်လင်းမြင်သာစွာ စစ်ဆေးပေးဖို့၊ တာဝန်ခံမှုရှိဖို့ လိုအပ်တယ်လို့လည်း ထည့်သွင်း ဖော်ပြထားပါတယ်။
“ရဲဘော်ကာချုပ်ဆိုတာ တောင်ပိုင်းတိုင်းအတွက် အများကြီး အလုပ်လုပ်ပေးခဲ့သူပါ။ စာရေးပြီးငွေရှာပေးတယ်။ videoရိုက်ပြီးငွေရှာပေးတယ်။ သူ့လိုလူမျိုးရဲ့ သေဆုံးခြင်းကိုတောင် သတင်းထုတ်ပြန်မပေးနိုင်ဘူးဆိုတာ အရမ်းဝမ်းနည်းဖို့ကောင်းပါတယ် ” လို့ ရဲဘော်မင်းဘုဏ်းလူက ပြောပါတယ်။
တပ်စုမှူး တိုက်မောင်းတို့ အခုလို ပျောက်ဆုံးနေတဲ့ ကိစ္စနဲ့ပါတ်သက်ပြီး ဖြေရှင်းပေးဖို့ မိသားစုဝင်တွေ အပြင် အခြေခံပညာရေးလုပ်သား သမဂ္ဂများ အဖွဲ့ချုပ် တိုက်ပွဲဦးဆောင် ကော်မတီ(FBEWU) ကလည်း နိုဝင်ဘာ ၁၆ ရက်နေ့က ကြေညာချက်ထုတ်ပြန်ခဲ့ပေမယ့် ဒီနေ့အထိ တစုံတရာ တုန့်ပြန်ဖြေရှင်းခြင်း မရှိသေးတာပါ။
ဒီကိစ္စနဲ့ ပတ်သက်လို့ DNA က ဗိုလ်သာလောနဲ့ KNU/KNLA က ပြောရေးဆိုခွင့်ရှိသူတချို့ကို ဆက်သွယ်မေးမြန်းခဲ့ပေမယ့် ပြန်လည်ဖြေကြားခဲ့ခြင်း မရှိပါဘူး။ KNU ရဲ့ ထောက်လှမ်းရေးဌာနကို ဆက်သွယ် မေးမြန်းရာမှာလည်း ထောက်လှမ်းရေး ဂရုထဲမှာ ဗိုလ်သာလော မရှိတော့တာ တနှစ်ကျော်လောက် ကြပြီဖြစ်ပြီး ဆက်သွယ်လို့ရတဲ့ ဖုန်းနံပါတ်တွေလည်း သူတို့မှာ မရှိကြောင်း အကြောင်းပြန်ခဲ့ပါတယ်။