ကုလသမဂ္ဂနဲ့ ပုဂ္ဂလိကကုမ္ပဏီတွေရဲ့ အစီရင်ခံစာများအရ၊ မြောက်ကိုရီးယား ဟက်ကာတွေဟာ လွန်ခဲ့တဲ့ နှစ်အနည်းငယ်အတွင်း ဘဏ်တွေနဲ့ ခရစ်ပတိုငွေကြေးကုမ္ပဏီတွေဆီက ဒေါ်လာ ဘီလီယံချီ ခိုးယူခဲ့ကြပါတယ်။
၂၁၊ နိုဝင်ဘာ။
မြောက်ကိုရီးယားခေါင်းဆောင်ကင်ဂျုံအွန်းအစိုးရအတွက် အလုပ်လုပ်ပေးနေတဲ့ မြောက်ကိုရီးယား နည်းပညာကျွမ်းကျင်သူတွေဟာ အမေရိကန်ရဲ့ ဉာဏ်ရည်တုနည်းပညာ (AI)နဲ့ ခရစ်ပတိုငွေကြေးကုမ္ပဏီကြီးတွေဆီ အလုပ်လျှောက်ထားသူတွေကို ပစ်မှတ်ထားကာ အလုပ်အကိုင် ပလက်ဖောင်းအတု တခုကို ဖန်တီးခဲ့တယ်လို့ သုတေသီတွေက နိုဝင်ဘာ ၂၀ရက်နေ့မှာ ပြောပါတယ်။
ဒါဟာ ကမ္ဘာ့အကြီးဆုံး စီးပွားရေးလုပ်ငန်း ၅၀၀ စာရင်းဝင် ကုမ္ပဏီကြီးတွေကို ထိုးဖောက်ဝင်ရောက်ဖို့ နှစ်ပေါင်းများစွာ လှုပ်ရှားမှုရဲ့ ပုံစံအသစ်တစ်ခု ဖြစ်ပါတယ်။
အဆိုပါ လှုပ်ရှားမှုကို ရှာဖွေတွေ့ရှိခဲ့တဲ့ လုံခြုံရေးဆိုင်ရာကုမ္ပဏီ Validinရဲ့ အဆိုအရ မြောက်ကိုရီးယား နည်းပညာအဖွဲ့ဟာ ကုမ္ပဏီဝန်ထမ်းတွေအဖြစ် ရိုးရိုးရှင်းရှင်း ဟန်ဆောင်မယ့်အစား အလုပ်လျှောက်ထားသူတွေ ကုမ္ပဏီဆီ မဝင်ရောက်မီ သူတို့ရဲ့ ကွန်ပျူတာတွေကို ရေရှည်ဝင်ရောက်ထိန်းချုပ်ခွင့် ရရှိဖို့ ကြိုးပမ်းလာကြတာ ဖြစ်တယ်လို့ ဆိုပါတယ်။
“အလုပ်ရှာဖွေနေသူတွေကို ပစ်မှတ်ထားလိုက်တာက မြောက်ကိုရီးယားတွေအတွက် ကြီးမားတဲ့ အားသာချက်တစ်ခု ရစေပါတယ်။ အလုပ်ရှင်ဘက်က ချထားတဲ့ ကာကွယ်ရေးစည်းတွေကို ကျော်ဖြတ်ဖို့ ကြိုးစားမယ့်အစား အလုပ်ခန့်အပ်တဲ့ လုပ်ငန်းစဉ်တစ်ခုလုံးကို သူတို့က လွှမ်းမိုးထိန်းချုပ်လိုက်ပြီး တဦးတယောက်ချင်းအတွက်တော့ ဒါက တကယ့်တရားဝင်ကိစ္စတစ်ခုလို့ ခံစားရအောင် လုပ်ဆောင်ကြပါတယ်”လို့ Validin ကုမ္ပဏီရဲ့ အမှုဆောင်အရာရှိချုပ် ကဲနက် ကင်နီယွန်က CNN သတင်းဌာနကို ပြောပါတယ်။
“လူတွေကတော့ ပုံမှန် Coding စစ်ဆေးမှုတစ်ခု ဒါမှမဟုတ် အလားအလာကောင်းတဲ့ အလုပ်အကိုင် အခွင့်အလမ်းတစ်ခုအတွက် လုပ်ရိုးလုပ်စဉ် အဆင့်တွေအတိုင်း လုပ်ဆောင်နေတယ်လို့ပဲ ထင်မြင်ယူဆကြတာကြောင့် အင်တာဗျူးသူက ပေးပို့လိုက်တဲ့ ဘယ်ဖိုင်ကိုမဆို ဖွင့်ကြည့်ဖို့ အလားအလာ ပိုများသွားပါတယ်”လို့ သူက ဆက်ပြောပါတယ်။
မြောက်ကိုရီးယားတွေ ဖန်တီးထားတဲ့ အတုအယောင်ပလက်ဖောင်းပေါ်မှာ ဆန်ဖရန်စစ္စကိုအခြေစိုက် Anthropic ကုမ္ပဏီရဲ့ လူကြိုက်များ AI မော်ဒယ် Claude နဲ့ သက်ဆိုင်တဲ့ Product Manager ရာထူးလည်း ပါဝင်နေပါတယ်။
CNN သတင်းဌာနအနေကတော့ Lever ၊ Anthropic နဲ့ အမည်ဟန်ဆောင် အသုံးချခံခဲ့ရတဲ့ တခြားကုမ္ပဏီအားလုံးဆီက မှတ်ချက်ပေးဖို့ တောင်းဆိုထားပါပါတယ်။ လန်ဒန်မြို့ရှိ မြောက်ကိုရီးယား သံရုံး မှတ်ချက်ပေးဖို့ တောင်းဆိုမှုကို ချက်ချင်း မတုံ့ပြန်သေးပါဘူး။
“အလုပ်လျှောက်ထားသူ အများစုက သူတို့ တခြားအလုပ်ရှာနေတာကို လက်ရှိအလုပ်ရှင်ကို အသိမခံချင်ကြပါဘူး။ ဒါကြောင့် သံသယဖြစ်စရာ တစ်ခုခုတွေ့ရင်တောင် တိုင်ကြားဖို့ ဝန်လေးတတ်ကြပါတယ်။ ဒါက တိုက်ခိုက်သူတွေအတွက် ဘယ်သူမှ သတိမထားမိဘဲ ထိုးဖောက်ဝင်ရောက်နိုင်ဖို့ ပိုပြီး လွယ်ကူသွားစေပါတယ်”လို့ ကဲနက် ကင်နီယွန်က မှတ်ချက်ပြုပါတယ်။
အလုပ်အကိုင်ရှာဖွေရေး ပလက်ဖောင်းအတုကို ရှာဖွေတွေ့ရှိခဲ့တဲ့ အဖွဲ့ခေါင်းဆောင် ကဲနက် ကင်နီယွန်က မြောက်ကိုရီးယားရဲ့ အခုအစီအစဉ်ကြောင့် သားကောင်ဖြစ်ခဲ့ရသူ တယောက်တလေကိုမှ မတွေ့ရှိရသေးပေမဲ့ ပြုံယမ်းနဲ့ ဆက်နွယ်နေတဲ့ အရင် စက်မှုလုပ်ငန်းဆိုင်ရာ သူလျှိုလုပ်ငန်းတွေမှာတော့ အလိမ်ခံရသူ အများအပြား ရှိခဲ့တယ်လို့ အသိပေးထားပါတယ်။
ကုလသမဂ္ဂနဲ့ ပုဂ္ဂလိကကုမ္ပဏီတွေရဲ့ အစီရင်ခံစာများအရ၊ မြောက်ကိုရီးယား ဟက်ကာတွေဟာ လွန်ခဲ့တဲ့ နှစ်အနည်းငယ်အတွင်း ဘဏ်တွေနဲ့ ခရစ်ပတိုငွေကြေးကုမ္ပဏီတွေဆီက ဒေါ်လာ ဘီလီယံချီ ခိုးယူခဲ့ကြပါတယ်။
၂၀၂၃ ခုနှစ် အိမ်ဖြူတော်အရာရှိတစ်ဦးရဲ့ ခန့်မှန်းချက်အရ မြောက်ကိုရီးယား ဒုံးကျည်အစီအစဉ်အတွက် လိုအပ်တဲ့ ရန်ပုံငွေ ထက်ဝက်ကို ဆိုက်ဘာတိုက်ခိုက်မှုတွေ ခရစ်ပတိုငွေကြေး ခိုးယူမှုတွေကနေ ရရှိခဲ့တာလို့ သိရပါတယ်။
Ref – CNN