လယ်တန်ငယ်ကျေးရွာအထိစစ်တပ်အရာရှိတချို့ကိုလိုက်ပါပို့ဆောင်ပေးခဲ့ရတဲ့ အရပ်သားတဦးကတော့ “ မကြည့်ရဲလို့ တဖက်လှည့်နေရတယ်”လို့ပြောပါတယ်။
၂၉၊သြဂုတ်။
ဧရာဝတီတိုင်း ၊ လေးမျက်နှာမြို့နယ် ၊ လယ်တန်ငယ်ကျေးရွာက ဒေသခံအရပ်သားတွေကို ဩဂုတ် လ ၂၇ ရက်ညပိုင်းမှာစစ်တပ်ကဝင်ရောက်ပြီး ရိုက်နှက်ပစ်သက်တာတွေ လုပ်ဆောင်ခဲ့တယ်လို့ ဒေသခံတွေက ပြောပါတယ်။
“AAမဟုတ်ဘူး။ ရွာသားတွေနဲ့ စစ်သားတွေ ဖြစ်ကြတာ။”လို့ လယ်တန်ငယ်ကျေးရွာနဲ့ ၃ မိုင်အကွာမှာ နေထိုင်တဲ့ အင်္ဂပူမြို့နယ်ထဲက သတင်းရင်းမြစ်က ပြောပါတယ်။
ဒါ့အပြင်ကျေးရွာထဲမှာလက်နက်ငယ်တွေတွေ့ရှိလို့ စစ်တပ်ကဝင်ရောက်စီးနင်းတာလို့ ပြောဆိုမှုတွေရှိပေမယ့်လည်း DNAက အတည်ပြုလို့မရသေးပါဘူး။
ရွာစောင့်အနေနဲ့ ကျန်ရစ်နေသူတွေလို့ ယူဆရတဲ့ လယ်တန်ငယ်ကျေးရွာက အရပ်သားပြည်သူတွေကို စစ်တပ်က သေနက်ဒင်တွေနဲ့ ထုရိုက်နေတဲ့အပြင် မသေမရှင်ဖြစ်နေတဲ့ အရပ်သားပြည်သူတွေနဲ့ သေ ဆုံးပြီးသား အရပ်သားတွေကို ရောနှောပြီး ကားပေါ်တင်ဆောင်နေတာကို မြင်ခဲ့ရတယ်လို့ မျက်မြင်တွေ့ရှိသူတဦးကဆက်ပြောပါတယ်။
လယ်တန်ငယ်ကျေးရွာအထိစစ်တပ်အရာရှိတချို့ကိုလိုက်ပါပို့ဆောင်ပေးခဲ့ရတဲ့ အရပ်သားတဦးကတော့”မကြည့်ရဲလို့ တဖက်လှည့်နေရတယ်”လို့ဆိုပါတယ်။
ဒါပေမဲ့ သေဆုံးသူအရေအတွက်ကို မခန့်မှန်းနိုင်ခဲ့တဲ့အပြင် ကားပေါ်တင်သွားတဲ့ အရပ်သားပြည်သူ တွေကို ဘယ်နေရာမှာ သွားရောက်မြှုပ်နှံတယ်ဆိုတာကိုလည်း မသိရှိဘူးလို့ မျက်မြင်တွေ့ရှိက ပြောပါတယ်။
လယ်တန်ငယ်ကျေးရွာဆိုတာက ပုသိမ် – မုံရွာကားလမ်းဘေးမှာ ကပ်လျပ်တည်ရှိပါတယ်။ ဒီကျေးရွာ အပါဝင် ဒေသတွင်းပတ်ချာလည်က ကျေးရွာတွေမှာ အာရက္ခတပ်တော် (AA )ပူးပေါင်းတပ်နဲ့ စစ်တပ် အ ကြား တိုက်ပွဲတွေမကြာခဏဖြစ်ပွားတဲ့အပြင် စစ်တပ်ဘက်ကလည်း လေကြောင်းတိုက်ခိုက်တာတွေ ၊ အမြောက်နဲ့ပစ်ခတ်တာတွေ မကြာခဏပြုလုပ်ပါတယ်။
ဒါ့အပြင်ဩဂုတ်လ ဒုတိယအပတ်မှာတော့ စစ် တပ်ဟာ လေးမျက်နှာမြို့နယ်နဲ့ ရေကြည့်မြို့နယ်ထဲကို အင်အား သုံးပြီး ထိုးစစ်ဆင်ခဲ့တယ်လို့ ဒေသခံတွေကပြောပါတယ်။ လက်ရှိအချိန်မှာဆိုရင်တော့ ဒီဒေသတွေမှာ အမြောက်ပစ်သံနဲ့ လေကြောင်းက ဗုံးကြဲသံတွေ နေ့စဉ်ကြားနေရတယ်လို့လည်းသူတို့က ဆက်ပြောပါတယ်။