“ဒီနှစ်က ဈေးပိုရတယ် ဒေသတွင်းပြန်ဝယ် သုံးတဲ့ သူတွေ က ဈေးကြီးပေး ဝယ်သုံးရတာပေါ့ အုန်းပင် စိုက်တဲ့ တောင်သူတွေ အုန်းပင်ကနေ ရွှေသီးတယ် ပြောလို့ရတယ် ကြွက်မြိးတံ ကောင်းတဲ့ အုန်သီးစိမ်း အရင့်တွေကတော့ ဈေးပိုကောင်းတယ်”လို့ မြောင်းမြမြို့က အုန်းသီးရောင်းဝယ်ရေးလုပ်ငန်းရှင်တဦး က DNA ကိုပြောပါတယ်။
ဩဂုတ် ၂၉
ဧရာဝတီတိုင်း မြောင်းမြ ၊ ပုသိမ်၊ မအူပင်၊ ဖျာပုံ၊ လပွတ္တာနဲ့ကျုံပျော်ခရိုင်ဒေသအသီးသီးက စိုက်ပျိုးထုတ်လုပ်တဲ့ အုန်းသီးတွေအရောင်းအဝယ် သွက်ပြီး ဈေးကောင်းရရှိနေပါတယ်။
အုန်သီး အစိမ်း တလုံး ကို ၂၀၀၀ကျပ် ဝန်းကျင်ရှိခဲ့ရာ အခု ဩဂုတ်လမှာ ဒိုင်ကောက်ဈေး တလုံး ကျပ် ၅၀၀၀ ဖြစ်ပြီး ဒေသတွင်း ပြန်ရောင်းဈေး တလုံး ကျပ် ၇၀၀၀ ဖြစ်ကာ သီတင်းတပတ်အတွင်း အုန်းသီးအစိမ်းအလုံး အရေအတွက် နှစ်သောင်းဝန်းကျင် အရောင်းအဝယ်ဖြစ်နေတယ်လို့ မြောင်းမြ မြို့ရှိ အုန်းသီးဈေးကွက် က သိရပါတယ်။
“ဒီနှစ်က ဈေးပိုရတယ် ဒေသတွင်းပြန်ဝယ် သုံးတဲ့ သူတွေက ဈေးကြီးပေး ဝယ်သုံးရတာပေါ့ အုန်းပင် စိုက်တဲ့ တောင်သူတွေ အုန်းပင်ကနေ ရွှေသီးတယ် ပြောလို့ရတယ် ကြွက်မြီးတံ ကောင်းတဲ့ အုန်းသီးစိမ်းအရင့်တွေကတော့ ဈေးပိုကောင်းတယ်” လို့ မြောင်းမြမြို့ရှိ အုန်းသီးရောင်းဝယ်ရေး လုပ်ငန်းရှင်တဦး က DNA ကိုပြောပါတယ်။
ဧရာဝတီတိုင်း နဲ့ရခိုင်ပြည်နယ်က ထွက်တဲ့ အုန်းသီး တွေကို တရုတ်နိုင်ငံ၊ထိုင်းနိုင်ငံ နဲ့ ဘင်္ဂလားဒေ့ရှ် တို့ကို တင်ပို့ခဲ့ပေမယ့် စစ်တပ်အာဏာသိမ်းပြီး နောက် ဘင်္ဂလားဒေ့ရှ်နိုင်ငံက မဝယ်ယူတော့တာရယ် ရခိုင်ပြည်နယ်အတွင်း ဖြစ်ပေါ်နေတဲ့ နိုင်ငံရေး စစ်ရေး အခြေအနေတွေကြောင့် ရခိုင်ပြည်နယ်ထွက် အုန်းသီးတွေ ပြည်မဖက်ကို တင်ပို့ ရောင်းလို အားကျလာပြီး ဧရာဝတီတိုင်းကထွက်တဲ့ အုန်းသီး တွေ ဝယ်လိုအား မြင့်တက်လာပြီးဈေးကောင်း ရလာတာပါ။
ပုသိမ် နဲ့ မြောင်းမြ အုန်းသီး ဈေးကွက် မှာ အုန်းသီး အစိမ်း အရင့် နဲ့ အခြောက်တွေကို အဓိကထားရောင်းဝယ်ကြပေမယ့် ဘိုကလေး၊ ကျိုက်လတ် ၊မော်လမြိုင်ကျွန်း၊ ဒေးဒရဲ ၊ဖျာပုံ အုန်းသီး ဈေး ကွက်ကတော့ အရည်သောက်အုန်းသီးနုတွေကို အဓိကထားခူးဆွတ်ပြီး ရန်ကုန် နဲ့ မန္တလေး ဈေးကွက်ကို တင်ပို့ရောင်းချကြပါတယ်။
“အရည်သောက် အုန်းသီး ခူးရောင်းတာက လုပ်ငန်းထဲ ငွေ နဲ့ ကုန် လည်ပတ် အားကောင်းတယ် များများ ရောင်းရပြီး အရင်းအမြတ် မြန်မြန်ပေါ်တယ် နေ့စဉ်ဝင်ငွေရှိတယ်၊ အရည်သောက် အနုတလုံးကို လိုက်ဝယ်တာ ၁၅၀၀ ကျပ် ပြန်ရောင်းတော့ ၃၀၀၀ ကျပ်လောက်ရောင်းပါတယ်၊ အုန်းသီး အရင့်ကို ခူးရောင်းတာကြတော့ အချိန်စောင့်ရတယ်လေ၊ နေ့စဉ်ပုံမှန်ဝင်ငွေ မရှိတော့ဘူး” လို့ အုန်းသီးနု အရည်သောက် ရောင်းချသူကပြောပါ တယ်။
အုန်းသီးကနေ အုန်းသားထုတ်ပြီး မြန်မာမုန့် နဲ့ တရုတ်မုန့် မျိုးစုံတွေ လုပ်ရာမှာ ထည့်သွင်း အသုံး ပြုပြီး စားသုံးကုန် အဖြစ်သာမက အုန်းသီး ရဲ့ကျန်အစိတ်အပိုင်းတွေကလည်း လူသုံးကုန် ပစ္စည်းအမျိုးမျိုး ထုတ်လုပ်ရာမှာ ကုန်ကြမ်း ကုန်ချော အဖြစ် အသုံးပြုကြပါတယ်။
ဧရာဝတီတိုင်းက မြို့နယ်အားလုံးနီးပါးမှာ အုန်းခြံစိုက်ပျိုးရေးကို လုပ်ကိုင်ကြပေမယ့် ပင်လယ် ကမ်းခြေ နဲ့ နီးတဲ့ ပုသိမ်ခရိုင်၊မြောင်း မြ ခရိုင် ၊ ဖျာပုံခရိုင် နဲ့ လပွတ္တာ ခရိုင်တို့ဟာ အုန်းခြံစိုက်ပျိုးရေး လုပ်ငန်း အများဆုံး လုပ်ကိုင်တဲ့ခရိုင်တွေ ဖြစ်ပါတယ်။
စိုက်ပျိုးရေး ဦးစီးဌာန ရဲ့ မှတ်တမ်းတွေအရ ဧရာဝတီတိုင်း အတွင်းရှိ အုန်းခြံစိုက်ပျိုးရေး လုပ်ငန်းကနေ တနှစ်ကို အုန်းသီးအလုံးပေါင်း သန်း ၁၃၀ ကျော် ထွက်ရှိပါတယ်။ရန်ကုန် မန္တလေး ဈေး ကွက် မှတဆင့် အထက် မြန်မာပြည် ရှမ်းပြည်နယ် အထိ တင်ပို့ ရောင်းချပြီး ပြည်တွင်းသုံးစွဲမှု ၅၀ ရာခိုင်နှုန်းဖြစ်ကာ တရုတ်၊ ထိုင်း၊ ဘင်္ဂလားဒေ့ရှ် နိုင်ငံတို့ကို ၅၀ ရာခိုင်နှုန်းတင်ပို့ ရောင်းချတယ် လို့
ဆိုပါတယ်။