သြဂုတ် ၊ ၁၅
စစ်ကိုင်းတိုင်း၊ယင်းမာပင်မြို့နယ်မှာစစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာကြောင့် ပေကုန်းရွာထဲကျရောက်ပေါက်ကွဲခဲ့ပြီး ကိုးနှစ်အရွယ်ကလေးငယ်တဦး သေဆုံးခဲ့ကာ ငါးဦးဒဏ်ရာရခဲ့တယ်လို့ ဒေသခံကာကွယ်ရေးအဖွဲ့တွေဆီက သိရပါတယ်။
“ မနေ့က ဓားစားခံတွေဖမ်းသွားတဲ့ဝမ်ပေါင်မှာ တပ်စွဲထားတဲ့ စကစတွေက ဂုဏ်တောမှာ အထိုင်ချပြီး ကျေးရွာတွေကို လက်နက်ကြီးနဲ့ပစ်လို့ သားအဖနှစ်ဦးထိတာမှာကလေးက သေသွားတာဗျ ။အဖေကတော့ ထိပဲထိသွားတာ။ ငါးယောက်ဒဏ်ရာရခဲ့တာပေါ့ဗျာ “ လို့ ယင်းမာပင် ခရိုင် ၊တပ်ရင်း (၁၆)တပ်ရင်းမှူး ဗိုလ်အောက်ဆွဲ က ပြောပါတယ်။
စစ်ကောင်စီတပ်ဟာသြဂုတ်လ ၁၅ ရက် ဒီနေ့နေ့လယ် ၂ နာရီမှာ ခြောက်ဆယ်မမ လက်နက်ကြီးတွေနဲ့ပစ်ခတ်ခဲ့တာကြောင့် ပေကုန်းရွာထဲက ကိုးနှစ်အရွယ် မောင်ကျာ်သီဟသေဆုံးခဲ့ပြီး ဖခင်ဖြစ်သူအပါအဝင် ငါးဦးဒဏ်ရာရတာလို့ သိရပါတယ်။
သြဂုတ်လ ၁၄ ရက်က မုံရွာ-ပုသိမ်လမ်းမကြီးတလျှောက်စစ်ကြောင်းထိုုးလာတဲ့ စစ်ကောင်စီတပ် အင်အားတရာ ကျော်ဟာ ဒေသခံငါးဦးကို လမ်းပြဓားစားခံအဖြစ်ဖမ်းဆီခဲ့ပြိး နှစ်ဦးကိုပြန်လွှတ်ပေးကာ ဂုဏ်တော ကျေးရွာဘုန်းကြီးကျောင်းမှာတပ်စွဲတဲ့ အချိန်မှာ အခုလိုပစ်ခတ်ခဲ့တာပါ။
လက်ရှိမှာ အဲ့ဒီစစ်ကြောင်းကြောင့် ဒုန်းတော၊ဂုဏ်တော၊ ကံကုန်း၊ရွာသာ၊ ဘိန်းနွယ်ချောင်းနဲ့က အောင်မိုးကျေးရွာအပါအဝင် အနီးအနားကျေးရွာတွေနဲ့ မုံရွာ-ပုသိမ်ကားလမ်းတလျှောက်ကျေးရွာတွေက ဒေသခံထောင်ကျော်စစ်ရှောင်နေရတယ်လို့သိရပါတယ်။
ဒါ့အပြင် ဒီနေ့နေ့လယ်၁၂ နာရီခွဲခန့်မှာ ယင်းမာပင်မြို့နယ် ၊အောင်ဇေယျ အကျိုးကုန်းမှာ တပ်စွဲထားတဲ့ စစ်ကောင်စီက လက်နက်ကြီးနဲ့ပစ်ခတ်ခဲ့တာကြောင့် နဘူတောတောပြင်ကျေးရွာဒေသခံ အသက် ခြောက်ဆယ်အရွယ် အမျိုးသမီးတဦးထိခိုက်ဒဏ်ရာရခဲ့ပါသေးတယ်။
၂၀၂၁ ခုနှစ်၊ ဖေဖော်ဝါရီလ ၁ ရက် စစ်တပ်ရဲ့ အာဏာသိမ်းတာကို ဆန့်ကျင်လို့ ကျဆုံးခဲ့ရသူ စုစုပေါင်း ၃,၉၃၃ ဦးရှိပြီး ကလေးသူငယ်၄၃၆ ဦးပါဝင်တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအဖွဲ့ (AAPP)က ဒီကနေ့ထုတ်ပြန်ထားပါတယ်။
