မတ်၊ ၂၁
စစ်ကိုင်းတိုင်း ၊ကနီမြို့နယ်နဲ့ ခင်ဦးမြို့နယ်တွေမှာ မနေ့က မိုးရွာသွန်းမှုအားကောင်းခဲ့တာကြောင့် စစ်ရှောင်နေရတဲ့ သောင်းနဲ့ချီတဲ့ ဒေသခံပြည်သူတွေမှာ စားဝတ်နေရေး အခက်အခဲတွေရှိနေတယ်လို့ အဲဒီဒေသကလူတွေကပြောပါတယ်။
ခင်ဦးမြို့မှာ မနေ့ကညပိုင်းက လေနဲ့ မိုးနဲ့ကြမ်းခဲ့တာကြောင့် တောထဲမှာ စစ်ရှောင်နေရတဲ့ ပြည်သူတွေရဲ့ ယာယီတဲတချို့ပျက်ဆီးတာတွေရှိခဲ့သလို ဆန်နဲ့ အဝတ်အထည်တွေလည်း လိုအပ်နေတယ်လို့ ခင်ဦးဒေသခံ တဦးကပြောပါတယ်။
” မနေ့ညက မိုးကတအားကြီးရွာတာတော့မဟုတ်ဘူး လေတအားတိုက်သွားတာပေါ့။ တဲဆိုတာကလည်း ခိုင်ခိုင်မာမာ ဆောက်ထားတာမျိုးမဟုတ်ဘူးလေ။ မိုးကာလေးအဖြစ်ဆောက်တာဆိုတော့ လေကြမ်းကြမ်းလိုက်တော့ အကုန်လွင့်ကုန်တာပေါ့။ မီးလည်းမရှိတော့ မိုးထဲလေထဲ ဒီအတိုင်းထိုင်နေတယ်။ အခုတော့ မိုးမရွာတော့ပါဘူး ” လို့ သူကပြောပါတယ်။
ခင်ဦးနယ်မှာ စစ်ကောင်စီတပ်က အထိုင်ချတပ်စွဲထားလို့ ရှောင်နေရတဲ့ ရွာ ၄ ရွာရှိပြီး စစ်ကြောင်းသွားတဲ့လမ်းနဲ့ နီးစပ်လို့ ရှောင်ပြေးနေရတဲ့ ရွာ ၂၇ ရွာနဲ့ နေအိမ်မီးလောင်ပျက်ဆီးသွားလို့ ရွာမပြန်နိုင်တဲ့ကျေးရွာ ၆၉ ရွာက ဒေသခံ သောင်းနဲ့ချီတဲ့လူထုဟ နီးစပ်ရာ စစ်ရှောင်စခန်းတွေနဲ့ တောတွေထဲမှာ အဆင်ပြေသလို နေထိုင်ကြရတယ်လို့ ခင်ဦးသတင်းမှန်ပြန်ကြားရေးက တာဝန်ရှိသူ တဦးကဆိုပါတယ်။
” လေက တော်တော်ကြမ်းသွားတာပေါ့။ အဲတော့ တချို့တလေရဲ့ စစ်ရှောင်အိမ်တွေပျက်ကုန်တယ်။ တအားကြီး ဆိုးဆိုးဝါးဝါးတော့ မကြားမိသေးဘူး။ စစ်ရှောင်က အိမ်မရှိတဲ့လူက တောထဲနေရတာလေ။ စစ်ကြောင်းတွေကတော့ မရှိတော့ဘူး ဒါပေမယ့် အခုထိ အကြောင်းအမျိုးမျိုးနဲ့ စစ်ရှောင်နေရတဲ့လူတွေရှိနေသေးတယ် ” လို့ သူကပြောပါတယ်။
အလာတူးပဲ ကနီနယ်မှာလည်း မိုးရွာသွန်းမှုအားကောင်းနေတာ သုံးရက်လောက်ရှိပြီးဖြစ်တာကြောင့် စစ်ရှောင်ပြည်သူတွေရဲ့ နေအိမ်တွေနဲ့ ဆန်အပါအဝင် စားနပ်ရိက္ခတွေလည်းရေစိုပျက်ဆီးတာတွေရှိတယ်လို့ ကနီဒေသခံ တဦးကပြောပါတယ်။
” ယင်းမာပင်ဖက်က စစ်ရှောင်တွေလည်းဒီဖက်ရောက်နေတာဆိုတော့ တချို့ကအမိုးအကာတွေလည်း မပါတာတွေရှိတယ်။ ဖြစ်သလိုပဲ ခိုခပ်နေရတယ် ။သူများတဲတွေအိမ်တွေနဲ့နေရတာပေါ့။ မိုးတင်ရွာတာမဟုတ်ဘဲ အခုကမိုးကောလေကောဆိုတော့လအဆင်မပြေကြတာပါ။ စစ်ရှောင်စခန်းဆိုတာကလည်း ဒီဖက်မှာ အတည်တကျဖွင့်မရတော့ အခက်အခဲတွေအများကြီးပဲ ” လို့ သူကပြောပါတယ်။
ခင်ဦးနဲ့ ကနီနယ်တွေမှာ စစ်ကောင်စီက သစ်ကြောင်းထိုးရင် ကျေးရွာတွေကို မီးရှို့ဖျက်ဆီးတာတွေလုပ်ခဲ့တာကြောင့် အခုအချိန်အထိ ဒေသခံတွေက နေစရာအိမ်မရှိတော့ဘဲ ဖြစ်သလိုနေကြရတယ်လို့ ဒေသခံတွေကပြောပါတယ်။
စစ်အာဏာသိမ်းပြီးနောက် မြန်မာနိုင်ငံမှာ စစ်ရှောင်ဦးရေ ၁ ဒဿမ ၇ သန်းကျော်အထိမြင့်တက်လာပြီးလူသားချင်းစာနာမှုအကူအညီလိုအပ်နေတဲ့ လူပေါင်းဟာ နိုင်ငံလူဦးရေရဲ့ သုံးပုံတပုံဖြစ်တဲ့ ၁၇ သန်းကျော်ဖြစ်တယ်လို့ ကုလသမဂ္ဂက ထုတ်ပြန်ထားပါတယ်။
ဘာသာရေးအဆောက်အအုံအပါအဝင် နေအိမ်တွေမီးရှို့ဖျက်ဆီးခံရတာဟာ အိမ်ခြေ ၆၀၄၅၉ ရှိပြီး စစ်ကိုင်းတိုင်းက ၄၇၇၇၈ နဲ့ တိုင်းနဲ့ပြည်နယ်တွေမှာ အများဆုံးလည်းဖြစ်သလို လူဦးရေရဲ့ ၁၅ ရာခိုင်နှုန်းဖြစ်တဲ့ လူရှစ်သိန်းနီးပါးဟာ စစ်ရှောင်နေရပါတယ်။
စစ်ကောင်စီဟာ မြို့နယ်ပေါင်း ၄၇ မြို့နယ်ကိုစစ်အုပ်ချုပ်ရေးကြေညာထားပြီး အာဏာသိ်မ်းမှုကိုဆန့်ကျင်မှုအားကောင်းတဲ့စစ်ကိုင်းတိုင်းက ၁၄ မြို့နယ်အထိပါဝင်နေတာပါ။
ဓာတ်ပုံ – ခင်ဦးမြို့နယ်သတင်းမှန်ပြန်ကြားရေး (ပုံဟောင်း)
