ကရင်ပြည်နယ်၊ ကြာအင်းဆိပ်ကြီးမြို့နယ်အတွင်းစစ်ကောင်စီတပ်နဲ့ KNLAပူးပေါင်းတပ်ဖွဲ့များကြားထိတွေ့တိုက်ပွဲပြင်းထန်နေဆဲဖြစ်ပြီး စစ်ကောင်စီဘက်က လေကြောင်းတိုက်ခိုက်မှုတွေဆက်တိုက်လုပ်နေတယ်လို့ မြေပြင် တော်လှန်ရေးတပ်ဖွဲ့ဝင်တွေက DNA ကိုပြောပါတယ်။
” တိုက်ပွဲကတော့အတော်ကြမ်းနေတယ်၊မြေပြင်အခြေအနေကလှုပ်ရှားနေတုန်းပဲဆိုတော့တချို့အပိုင်းတွေပြောလို့မရသေးဘူး၊နေရာကသုံးနေရာခွဲတိုက်နေတာဆိုတော့အတော်ဖြစ်နေတယ်၊သူတို့ဖက်က လေကြောင်းပစ်နေတာတော့တောက်လျှောက်ပဲ”လို့ မြေပြင် စစ်ရေးလှုပ်ရှားမှုတွေမှာ လက်ရှိပါဝင်နေတဲ့KNLA ပူးပေါင်းတပ်ဖွဲ့ဝင်တဦးကပြောပါတယ်။
ကြာအင်းဆိပ်ကြီးမြို့နယ်အတွင်းက စစ်တပ်အ ခြေစိုက်စခန်းတွေဖြစ်တဲ့ခလရ (၂၈၃)၊ (၂၈၄)၊ အမှတ် (၃၂) ခြေမြန်တပ်ရင်းတွေကို KNLA ပူးပေါင်းတပ်တွေက တိုက်ခိုက်နေတာဖြစ်ပြီး ခလရ (၂၈၄) တပ် ရင်းကိုသိမ်းပိုက်နိုင်ပြီလို့သတင်းတွေထွက်နေပေမယ့် မြေပြင်သတင်းရင်းမြစ်တွေကတော့ အတည်မပြုပေးသေးပါဘူး။
လက်ရှိမှာ အဲ့ဒီ တပ်ရင်းတွေကနေ (၁၂၀) မမလက် နက်ကြီးတွေနဲ့ပစ်ခတ်နေသလို လေကြောင်းကပစ် ခတ်မှုတွေလည်း ပိုလုပ်လာတယ်လို့ မြေပြင်သတင်းရင်းမြစ်တွေကပြောပါတယ်။
ဒီကနေ့မနက်ပိုင်းကစလို့ စစ်ကောင်စီဖက်က လေ ကြောင်းတိုက်ခိုက်တာတွေအကြိမ်ရေများလာသလို လက်နက်ကြီးလက်နက်ငယ် ပစ်ခတ်မှုတွေဆက်တိုက်ရှိနေလို့ နို့တကော၊တဂေး၊တခါခီး၊ကရာနီး၊ ဆိပ်ကြီး စတဲ့ ကျေးရွာတွေကဒေသခံတွေဗုံးခိုကျင်းတွေထဲပုံးအောင်းနေရတယ်လို့သိရပါတယ်။
ကြာအင်းဆိပ်ကြီးမြို့နယ်ပြည်သူ့အုပ်ချုပ်ရေးအဖွဲ့ကလည်း ဒီကနေ့မနက်အစောပိုင်းကစပြီး တိုက်ပွဲ ပြင်းထန်နေလို့ လေကြောင်းတိုက်ခိုက်မှုအန္တရာယ်ကို သတိပြုကြဖို့ ထုတ်ပြန်အသိပေးထားပါတယ်။
လက်ရှိတိုက်ပွဲအတွင်း နှစ်ဘက် ထိခိုက်ကျဆုံးမှုတွေလည်းရှိနေပြီး စစ်ကောင်စီဘက်က အထိနာနေတယ်လို့ မြေပြင်သတင်းတွေကဆိုပါတယ်။ စစ်ကောင်စီ (၂၈၄)တပ်ရင်းကို KNLA ပူးပေါင်းတပ်တွေ သိမ်းပိုက်လိုက်နိုင်သလို တပ်ရင်းမှူးဇနီးကိုလည်းဖမ်းမိတယ်လို့ လူမှုကွန်ရက်ပေါ်မှာရေးသားမှုတွေရှိနေပေမယ့် မြေပြင်အတည်ပြုချက်တော့မရသေးပါဘူး။
လက်ရှီတိုက်ပွဲအတွင်းပြည်သူ့ကာကွယ်ရေးတပ်ဖွဲ့တွေဘက်က နဂါးဖြူစစ်ကြောင်း၊ကော်ဘရာစစ် ကြောင်း၊ဖက်ဒရယ်လေကြောင်းတပ်ဖွဲ့တွေKNUနဲ့ပူးပေါင်းတိုက်ခိုက်နေသလိုနဂါးဖြူစစ်ကြောင်းကတဦးကျဆုံးပြီး ကော်ဘရာစစ်ကြောင်းက နှစ်ဦးဒဏ်ရာရ ရတယ်လို့ DNAရဲ့ မြေပြင်သတင်းရင်း မြစ်တွေဆီကအတည်ပြုချက်ရရှိထားပါတယ်။
