ပေါ်တူဂီ တိုက်စစ်မှူး ခရစ္စတီယာနို ရော်နယ်လ်ဒိုဟာ ဆော်ဒီအာရေးဘီးယား ဘောလုံးကလပ် အယ်လ်နာဆာဆီ ကမ္ဘာ့စံချိန်တင် လုပ်ခလစာနဲ့ ပြောင်းရွှေ့ဖို့ ကနဦး သဘောတူညီမှု ရထားကြောင်း သတင်းတွေ ထွက်ပေါ်နေပါတယ်။
ရော်နယ်လ်ဒိုဟာ ကမ္ဘာ့ဖလား ကျင်းပနေတဲ့ ကာလအတောအတွင်း အင်္ဂလန်ကလပ် မန်ချက်စတာ ယူနိုက်တက်နဲ့ နှစ်ဦးသဘောတူ စာချုပ် ဖျက်သိမ်းလိုက်တဲ့နောက် ပြိုင်ပွဲရဲ့ တစ်ဦးတည်းသော ကလပ်လက်မဲ့ ကစားသမား ဖြစ်နေပါတယ်။ ဒါပေမဲ့ အခုအခါမှာတော့ စပိန်သတင်းဌာန Marcaက ရော်နယ်လ်ဒိုဟာ ပြိုင်ပွဲပြီးတာနဲ့ အယ်လ်နာဆာ အသင်းဆီ ပြောင်းရွှေ့ဖို့ အသင့်ရှိနေကြောင်း ဖော်ပြခဲ့ပါတယ်။
ကြွယ်ဝချမ်းသာတဲ့ အာရပ်နိုင်ငံက ကလပ်အသင်းဟာ ရော်နယ်လ်ဒိုအတွက် တစ်နှစ်လုပ်ခ ယူရို သန်း ၂၀၀ ထိ ပေးချေဖို့ သဘောတူခဲ့ကြောင်း သိရပါတယ်။ ဒါဟာ ပရော်ဖက်ရှင်နယ် ဘောလုံးလောကမှာတော့ ကစားသမား တစ်ဦးအတွက် အမြင့်ဆုံး လုပ်ခလစာအဖြစ် ပြတ်ပြတ်သားသား ရပ်တည်မယ့် ငွေပမာဏ ဖြစ်ပါတယ်။
အယ်လ်နာဆာဟာ လောလောဆယ်မှာ ဆော်ဒီ ပရိုဂလိဂ်ရဲ့ အမှတ်ပေးဇယား ဒုတိယ နေရာမှာ ရပ်တည်နေပါတယ်။ ရော်နယ်လ်ဒိုလို အထင်ကရ ဘောလုံး ကြယ်ပွင့်ကို စာချုပ် ခေါ်ယူနိုင်ခြင်းက အယ်လ်နာဆာ အတွက်သာ မကဘဲ ဆော်ဒီ ဘောလုံးလောက တစ်ခုလုံးရဲ့ ပုံရိပ်ကို မြှင့်တင်နိုင်တဲ့ အကျိုးကျေးဇူးမျိုး ရရှိမယ်လို့ ကလပ်အသင်း တာဝန်ရှိသူတွေက ယုံကြည်နေပါတယ်။
အစောပိုင်းမှာ ရော်နယ်လ်ဒို ကိုယ်တိုင်က ဥရောပမှာ ဆက်ပြီး အခြေချဖို့ ဆန္ဒရှိနေကြောင်း သတင်းတွေ ထွက်ပေါ်ခဲ့သေးပေမယ့် သူ့ကို လက်တွေ့ ခေါ်ယူမယ့် အသင်းမျိုး မရှိခဲ့ဘူးလို့ ယူဆရပါတယ်။ အသက် ၃၇ နှစ်အရွယ် ရော်နယ်လ်ဒိုဟာ ယူနိုက်တက်ရဲ့ မန်နေဂျာ အဲရစ်တန်ဟက်ဂ် အပါအဝင် အသင်းနဲ့ ဆက်နွှယ်သူ တော်တော်များများကို အပြင်းအထန် ဝေဖန်ခဲ့တဲ့ အင်တာဗျူး တစ်ခုအပြီး အင်္ဂလန် ကလပ်အသင်းနဲ့ စာချုပ် ဖျက်သိမ်းခဲ့တာ ဖြစ်ပါတယ်။
