တမူးမြို့နဲ့ မြို့အနီးဝန်းကျင်မှာ သြဂုတ်လအတွင်း ဥပဒေမဲ့ သတ်ဖြတ်ခံရတဲ့ပြည်သူ (၇) ဦးအထိရှိလာပြီး ဖြစ်ပွားခဲ့တဲ့နေရာတွေဟာ ပျူစောထီးတွေ ကြီးစိုးတဲ့နေရာတွေဖြစ်တယ်လို့တမူးမြို့ခံတွေက DNA ကိုပြောပါတယ်။
“တမူးမှာ လူသတ်တာ ထမင်းစားရေသောက် အဆင့်ဖြစ်နေပြီ၊ လုယက်တာ၊ ရိုက်နှက်တာကတော့ သရေစာစားသလောက်ပဲ၊ တော်တော့ကို ဆိုးဝါးသွားပြီ” လို့ မြို့ခံတစ်ဦးကပြောပါတယ်။
သြဂုတ်လ ၂၂ ရက်တရက်တည်းမှာပဲ တမူးမြို့မှာ လူသုံးဦးအသတ်ခံခဲ့ရပါတယ်။ အဲ့ဒီနေ့မနက်ပိုင်းက မျက်နှာကိုအဝတ်စည်းထားတဲ့ ရုပ်အလောင်းတစ်လောင်း တမူးမြို့တောင်ဘက်အထွက် လမ်းမကြီးပေါ်မှာ တွေ့ရှိရပြီး ညပိုင်းမှာတော့ မင်းသာရွာသား ကိုမျိုးသက်နဲ့ လှည်းဆိပ်ရွာသားကိုနေဆန်းတို့ တမူးမြို့နဲ့(၁၅) မိုင်ဝန်းကျင်အကွာ မင်းသာရွာအနီးမှာ သတ်ဖြတ်ခံရပြီး ကားကိုလည်း မီးရိူ့သွားခဲ့တယ်လို့ ဒေသခံတွေကပြောပါတယ်။
အဲ့ဒီ သေဆုံးသူနှစ်ဦးကို သတ်ဖြတ်တဲ့တရားခံကို အတိအကျ မသိပေမယ့် အဲ့ဒီနေ့ညနေက မင်းသာရွာနားမှာ ပျူစောထီး (၆) ဦးလက်နက်ကိုယ်စီနဲ့ ရှိနေကြတာကို မြင်ခဲ့ရတယ်လို့ ဒေသခံတွေက ပြောပါတယ်။
ဒါ့အပြင်မိုရေးနဲ့ နန်းဖာလုံကြားမှာ ပျူစောထီးတွေက ရိုက်နက်ပြီး ဆိုင်ကယ်လုယူခံရတဲ့ ကိုမင်းလွင် (ခ) ကိုပိန်းပိန်း သြဂုတ်လ (၁၂) ရက်နေ့မှာ သေဆုံးခဲ့ပါတယ်။
သြဂုတ်လ ( ၇) ရက်နေ့ကလည်း ပါဟဲတံတားနားမှာ လူနှစ်ယောက်ယောက်သေနတ်နဲ့ပစ်သတ်ခံရပါတယ်။သေဆုံးသူနှစ်ဦးဟာ PDF တွေလို့ စစ်ကောင်စီ ဝါဒဖြန့်မီဒီယာတွေက ဖော်ပြကြပေမယ့် မြို့ခံတွေ ကတော့ တောလည်ပြီးပြန်လာတဲ့ တမူးမြို့ အောက်ကျင်းရပ်ကွက်သားနှစ်ဦးကို ပျူစောထီး တွေ ပစ်သတ်တာဖြစ်တယ်လို့ ဆိုပါတယ်။
သြဂုတ်လ ၂ ရက်နေ့ကလည်း တမူးမြို့ပေါ်မှာ စျေးရောင်းပြီးပြန်လာတဲ့ စစ်ဘေးရှောင် ဦးညီညီကို မန်းမော်ကျေးရွာအနီးမှာလက်ပြန်ကြိုးတုပ်ခံထားရပြီးသေနတ်ဒဏ်ရာနဲ့သေဆုံးနေတာကိုတွေ့ခဲ့ကြရပါတယ်။
အဲ့ဒီလိုဥပဒေမဲ့ သတ်ဖြတ်မူတွေကို ကျူးလွန်နေသူ တွေဟာ ဘယ်သူဘယ်ဝါတိတိကျကျ မသိရပေမယ့် အများစုကိုပျူစောထီးတွေကျူးလွန်ခဲ့ကြတာဖြစ်တယ်လို့ ဒေသခံတွေက ဆိုပါတယ်။
“တမူးကပျူစောထီးမြို့လိုဖြစ်နေပြီ၊သိရင်တောင် ဘယ်သူမှပြောရဲတဲ့ အနေအထားမရှိဘူး” လို့ မြို့ခံတစ်ဦးကပြောပါတယ်။
ဒါ့အပြင်တမူးမြို့မှာ နေ့စဥ်နဲ့အမျှ လုယက်မှုတွေလ ည်းရှိနေတယ်လို့ ဒေသခံတွေကဆိုပါတယ်။
အဲ့ဒီ လုယက်သတ်ဖြတ်မှုတွေနဲ့ ပတ်သက်လို့ အစောပိုင်းကာလတွေမှာ ရဲစခန်းကို တိုင်ကြားအမှုဖွင့်တာမျိုး ရှိပေမယ့် ရဲစခန်းကလည်း ဘာမှလုပ်ပေးတာမျိုးမရှိတဲ့အတွက် လက်ရှိမှာ မတိုင်ကြတော့ဘူးလို့ ဒေသခံတွေကပြောပါတယ်။
