စစ်ကိုင်းတိုင်း၊ ကလေးမြို့နယ်၊ မှန်တောရွာဘက် ထိုးစစ်ဆင်လာတဲ့ အကြမ်းဖက်စစ်တပ်ဟာ ဒေသခံတော်လှန်ရေးအင်အားစုတွေရဲ့ ခုခံမှုကြောင့် ပြန်လည်ဆုတ်ခွာသွားတယ်လို့ သိရပါတယ် စစ်ကိုင်းတိုင်း၊ ကလေးမြို့နယ်၊ မှန်တောရွာဘက် ထိုးစစ်ဆင်လာတဲ့ အကြမ်းဖက်စစ်တပ်ဟာ ဒေသခံတော် လှန်ရေးအင်အားစုတွေရဲ့ ခုခံမှုကြောင့် ပြန်လည်ဆုတ်ခွာသွားတယ်လို့သိရပါတယ်။
ကလေးမြို့နယ်တောင်ပိုင်း ကြံသာရွာနဲ့ ဂန့်ဂေါမြို့နယ် ဟံသာဝတီရွာတို့မှာ တပ်စွဲထားတဲ့ အကြမ်းဖက်စစ်တပ်နဲ့ ပျူစောထီးစုစုပေါင်းအင်အား ၇၀ လောက်ဟာ စစ်ကြောင်းနှစ်ကြောင်းခွဲပြီး မှန်တောရွာဘက် ထိုးစစ်ဆင်လာကြရာ CDF – KKG၊ CDF – Thantlang၊ PDF – Kalay ၊ RKDF၊ ပကဖ ပူးပေါင်းတပ်ဖွဲ့တို့နဲ့ ယမန်နေ့မနက် ၁၀ နာရီခွဲလောက်က စတင်ကာ ၂ နာရီလောက်ကြာ ထိတွေ့ တိုက်ပွဲဖြစ်ပွားခဲ့ကြောင်း CDF – KKG က ထုတ်ပြန်ပါတယ်။
အကြမ်းဖက်စစ်တပ်ဟာ အရင်စစ်ကြောင်းထိုးရာမှာ အသုံးပြုနေကျ ပြည်ထောင်စုလမ်းမကြီးအတိုင်း မလာဘဲ တောလမ်းအတိုင်း မှန်တောရွာ အနောက်ဘက်ကနေ ရွာတွင်းဝင်ရောက်လာခြင်းဖြစ်ပြီး CDF – KKG တပ်ဖွဲ့ဝင်တွေထောင်ထားတဲ့ တိုက်မိုင်းနဲ့တိုက်မိခြင်း ၊ ပူးပေါင်းအဖွဲ့က လက်နက်ကြီး/ငယ်တွေနဲ့ ပြန်လည်ပစ်ခတ်ခြင်းတို့ကြောင့် ပြန်လည်ဆုတ်ခွာသွားခဲ့ကြောင်း သိရပါတယ်။
အဲဒီတိုက်ပွဲမှာ အကြမ်းဖက်စစ်တပ်ဘက်က (၆) ဦးထက်မနည်း ပြင်းထန်ဒဏ်ရာရနိုင်ပြီး ပူးပေါင်းတပ်ဖွဲ့ဘက်က ထိခိုက်ကျဆုံးမှု မရှိဘူးလို့ ဆိုပါတယ်။
ကလေးမြို့နယ် ရန်ကြီးအောင် ကျေးရွာမှာ တပ်စွဲထားတဲ့အကြမ်းဖက် စစ်တပ်ဟာ ဖေဖော်ဝါရီ ၂၃ ရက်နေ့မှာ သံဖိုကျေးရွာထဲက ပြည်သူတွေရဲ့ နေအိမ်၊ ဆန်စက်နဲ့ ဆိုင်ကယ် တို့ကို မီးရှို့ဖျက်ဆီးခဲ့ပါတယ်။ CDF-KKG တပ်ရင်း (၃) ရဲဘော်တွေနဲ့ ဒေသခံပြည်သူတွေ ကြိုးစားငြှိမ်းသတ်ခဲ့ရာ ဆန်စက်မီးကို ငြှိမ်းသတ်နိုင်ခဲ့ပေမဲ့ နေအိမ် ၂ လုံးနဲ့ ဆိုင်ကယ်တစ်စီး မီးလောင်ပြာကျခဲ့တယ်လို့ သိရပါတယ်။
