“ယာဥ်လိုင်းတွေက အဆင်မပြေတိုင်း ခရီးသည်က ပေးရတာ သိပ်တော့ မဟုတ်သေးဘူး။ သူတို့မှာ တခြားနည်းလမ်း မရှာတတ်တော့ဘူးလားလို့ မေးခွန်းထုတ်ရမလို ဖြစ်နေပြီ ”
၁၆၊ဩဂုတ်
ရန်ကုန်မြို့မှာ ပြေးဆွဲနေတဲ့ YBSကားတွေရဲ့ ယာဥ်စီးခကို ထပ်တိုးဖို့ ရှိနေတဲ့အပေါ် ခရီးသည်တွေကြားမှာ ဝေဖန်မှုတွေ ထွက်ပေါ် နေပါတယ်။
စက်တင်ဘာလကစပြီး လက်ရှိ ၂၀၀ ကျပ်ခရီးကို ၃၀၀ ကျပ်၊ ၄၀၀ကျပ် ခရီးကို ၆၀၀ ကျပ် တိုးမြင့်ပြင်ဆင်သွားဖို့ ရှိတယ်ဆိုပြီး ရန်ကုန်တိုင်း ပုဂ္ဂလိက သယ်ယူပို့ဆောင်ရေး ကြီးကြပ်မှု ကော်မတီ (YRTC) က အသိပေးလာတာ ဖြစ်ပါတယ်။
“ကားခတိုးမဲ့ကိစ္စက ယုတ္တိကို မရှိဘူး။ ပိုက်ဆံကို ပုံးထဲမထည့်ရပဲ ယာဥ်မောင်းကို ပေးနေရတာ အရင်မရှင်းပဲနဲ့ ။ ခရီးသည်တွေဖက်ကို ငဲ့မကြည့်တာ “ကုမ္ပဏီဝန်ထမ်း ခရီးသည် တဦးက ပြောပါတယ်။
လက်ရှိ ပြေးဆွဲနေတဲ့ ကားတွေရဲ့ ပြင်ဆင်စရိတ် မြင့်မားလာတဲ့အတွက် ယာဥ်စီးခ တိုးသတ်မှတ်ပေးဖို့ အများပိုင် ဘတ်စ်ကားကုမ္ပဏီတွေက တင်ပြတဲ့အပေါ် ခွင့်ပြုလိုက်တာလို့ ဆိုပါတယ်။
YBS ကားတွေအနေနဲ့ ဝန်ဆောင်မှု တိုးမြင့်မပေးနိုင်ပဲ ယာဥ်စီးခ ပိုတိုးယူနေတာကြောင့် အရင် မထသ စနစ်ထက် အခြေအနေ ပိုဆိုးလာတယ်လို့ ခရီးသွားတွေက ဝေဖန်ပါတယ်။
YBS ဘတ်စ်ကားစနစ် ကျင့်သုံးတဲ့ သက်တမ်း ၁၀ နှစ်တာမှာ အာဏာသိမ်း စစ်အုပ်စုရဲ့ စီမံကြီးကြပ်မှုအောက် ရောက်ခဲ့တာ ၆ နှစ်နီးပါး ရှိနေခဲ့တာဖြစ်ပြီး ဝန်ဆောင်မှုပိုင်း ကောင်းမလာတာကြောင့် ထောက်ပြ ဝေဖန်ခံနေရတာ ဖြစ်ပါတယ်။
“ယာဥ်လိုင်းတွေက အဆင်မပြေတိုင်း ခရီးသည်က ပေးရတာ သိပ်တော့ မဟုတ်သေးဘူး။ သူတို့မှာ တခြားနည်းလမ်း မရှာတတ်တော့ဘူးလားလို့ မေးခွန်းထုတ်ရမလို ဖြစ်နေပြီ ” လို့ ရန်ကုန်တိုင်း လွှတ်တော်အမတ်ဟောင်း တဦးက ပြောပါတယ်။
YBS ဘတ်စ်ကားစီးခမှာ အာဏာသိမ်းပြီးမှ မြင့်တက်လာတာ ဖြစ်ပြီး ၂၀၂၁ မတိုင်ခင်က ပုံမှန် ၂၀၀ ကျပ်ပဲ ရှိခဲ့တာဖြစ်ပါတယ်။
လက်ရှိရန်ကုန်မြို့မှာ YBSကားစီးသူ ၁ ဒဿမ ၈ သန်းနီးပါးရှိပြီး ကားစီးရေ ၃,၃၀၀ပြေးဆွဲပေးနေတာလို့ YRTCစာရင်းတွေအရ သိရပါတယ်။
#YBS #ရန်ကုန် #ယာဉ်လိုင်း #ယာဉ်စီးခ #တိုးကောက်
#DeltaNewsAgency #DNA