ပညာအရည်အချင်း အုပ်စုတွေထဲမှာတော့ တက္ကသိုလ်ဘွဲ့ရထားသူတွေဟာ အလုပ်လက်မဲ့နှုန်း ၁.၇၀ ရာခိုင်နှုန်းနဲ့ အမြင့်ဆုံး ဖြစ်နေပါတယ်။
၂၅ ၊ ဩဂုတ်
ထိုင်းနိုင်ငံမှာ အလုပ်လုပ်ကိုင်သူ စုစုပေါင်းအရေအတွက် တိုးတက်လာပေမဲ့ ၂၀၂၆ ခုနှစ်ရဲ့ ဒုတိယသုံးလပတ်မှာ အလုပ်လက်မဲ့ဦးရေဟာ ၄ သိန်းနီးပါးအထိ မြင့်တက်လာခဲ့ပါတယ်။ ထိုင်းနိုင်ငံ အမျိုးသား စီးပွားရေးနှင့် လူမှုရေးဖွံ့ဖြိုးတိုးတက်ရေးကောင်စီ (NESDC) ရဲ့ ထုတ်ပြန်ချက်အရ အလုပ်လက်မဲ့နှုန်းဟာ ၀.၉၅ ရာခိုင်နှုန်းအထိ ရောက်ရှိခဲ့ပါတယ်။
အားလပ်ရက်ရှည် ရာသီအတွင်း စိုက်ပျိုးရေးနဲ့ ဝန်ဆောင်မှုကဏ္ဍတွေကြောင့် စုစုပေါင်း အလုပ်လုပ်ကိုင်သူဦးရေဟာ လွန်ခဲ့တဲ့နှစ် စာရင်းထက် ၅.၁ ရာခိုင်နှုန်း တိုးတက်လာပြီး ၄၁.၅ သန်းအထိ ရှိခဲ့ပါတယ်။ ဒါပေမဲ့ အဲဒီကိန်းဂဏန်းတွေရဲ့ နောက်ကွယ်က လုပ်သားဈေးကွက်ဟာ ဖိအားပေးခံနေရတဲ့ လက္ခဏာတွေ အထင်အရှား ပြသနေတယ်လို့ တာဝန်ရှိသူတွေက ပြောပါတယ်။
အလုပ်အတွေ့အကြုံရှိပြီး လက်ရှိမှာအလုပ်လက်မဲ့ဖြစ်နေတဲ့ အရေအတွက်ဟာ ၇၁,၀၀၀ အထိ တိုးတက်လာခဲ့ပါတယ်။ အဲဒီအထဲက ထက်ဝက်နီးပါးက သူတို့သဘောဆန္ဒအတိုင်း အလုပ်ကနေ နှုတ်ထွက်ခဲ့ကြတာဖြစ်ပြီး အများအားဖြင့် လက်လီနဲ့ လက်ကားကုန်ထုတ်လုပ်ငန်းတွေမှာ လုပ်ကိုင်ကြသူတွေ ဖြစ်ပါတယ်။
ပညာအရည်အချင်း အုပ်စုတွေထဲမှာတော့ တက္ကသိုလ်ဘွဲ့ရထားသူတွေဟာ အလုပ်လက်မဲ့နှုန်း ၁.၇၀ ရာခိုင်နှုန်းနဲ့ အမြင့်ဆုံး ဖြစ်နေပါတယ်။
လူမှုဖူလုံရေးစနစ်အောက်မှာ အလုပ်လက်မဲ့ထောက်ပံ့ကြေး လျှောက်ထားသူ အရေအတွက်ဟာ ၂၉၀,၀၀၀ အထိ မြင့်တက်လာခဲ့ပါတယ်။ ၂၀၂၆ ခုနှစ်ရဲ့ ပထမခြောက်လအတွင်း စီးပွားရေးလုပ်ငန်းတွေ ပိတ်သိမ်းမှုဟာလည်း ၇,၀၂၄ ခုအထိ ရှိခဲ့ပြီး လွန်ခဲ့တဲ့နှစ်ထက် ၁၂.၅ ရာခိုင်နှုန်း မြင့်တက်လာခဲ့ပါတယ်။
အလုပ်ချိန် ပြည့်ပြည့်ဝဝ မရရှိသူ အလုပ်လက်မဲ့နီးပါး အရေအတွက်ဟာ ၈ ရာခိုင်နှုန်း မြင့်တက်လာပြီး ၂.၂ သန်းအထိ ရှိလာခဲ့ပါတယ်။ ဒါ့အပြင် ၁ နှစ်ထက်မက အလုပ်မရတဲ့ ကာလရှည်အလုပ်လက်မဲ့ဦးရေကတော့ ၈၁,၀၀၀ အထိ မြင့်တက်လာပါတယ်။
တရားဝင် မှတ်ပုံတင်ထားတဲ့ အလုပ်အကိုင်တွေမှာ လုပ်ကိုင်သူတွေရဲ့ လစာကတော့ ၀.၉၀ ရာခိုင်နှုန်း အနည်းငယ် တိုးလာပြီး ၁၅,၈၅၃ ဘတ် ရှိခဲ့ပါတယ်။
မြင့်တက်လာတဲ့ ကုန်ကျစရိတ်တွေကို ကာမိစေဖို့ လုပ်သားတွေအနေနဲ့ ပိုမို အလုပ်လုပ်နေကြရတာလို့ တာဝန်ရှိသူတွေက ဆိုပါတယ်။
ထိုင်းနိုင်ငံ အလုပ်သမား အကာအကွယ်ပေးရေး အက်ဥပဒေ ပုဒ်မ ၁၂၆ အောက်မှာ ဝန်ထမ်း သက်သာချောင်ချိရေး ရန်ပုံငွေ ဥပဒေအသစ်ကို ၂၀၂၆ ခုနှစ် အောက်တိုဘာ ၁ ရက်နေ့မှာ စတင် အသက်ဝင်ဖို့ စီစဉ်ထားပါတယ်။ အဲဒီဥပဒေဟာ ဝန်ထမ်းတွေ အလုပ်က ထွက်တဲ့အခါ ငွေကြေး ထောက်ပံ့မှု ရရှိစေဖို့ ရည်ရွယ်တာ ဖြစ်ပါတယ်။
အလုပ်ရှင်နဲ့ အလုပ်သမားတွေဟာ ၂၀၂၆ ခုနှစ် အောက်တိုဘာလကနေ ၂၀၃၁ ခုနှစ် စက်တင်ဘာလအထိ လစာရဲ့ ၀.၂၅ ရာခိုင်နှုန်းစီကို ဒီရန်ပုံငွေထဲ ထည့်ဝင်ကြရမှာ ဖြစ်ပါတယ်။ အဲဒီနောက် ၂၀၃၁ ခုနှစ် အောက်တိုဘာလကစပြီး အဆိုပါနှုန်းထားကို ၀.၅ ရာခိုင်နှုန်းအထိ နှစ်ဆ တိုးမြှင့်သွားမှာပါ။
မှတ်ပုံတင်ဖို့ ပျက်ကွက်သူ ဒါမှမဟုတ် သတင်းအချက်အလက် အမှားပေးပို့သူ အလုပ်ရှင်တွေအနေနဲ့ ထောင်ဒဏ် ၆ လအထိ၊ ဒဏ်ငွေ ဘတ် ၁၀,၀၀၀ အထိ သို့မဟုတ် ပြစ်ဒဏ်နှစ်ရပ်လုံး ချမှတ်ခံရနိုင်ပါတယ်။ ထည့်ဝင်ကြေး ပေးသွင်းဖို့ ပျက်ကွက်သူ ဒါမှမဟုတ် လျှော့ပေးသူတွေကတော့ ပေးရန်ကျန်ရှိတဲ့ ပမာဏအပေါ် တလကို ၅ ရာခိုင်နှုန်း ဒဏ်ကြေး ပေးဆောင်ရမှာ ဖြစ်ပါတယ်။
အလုပ်သမားအများစုဟာ ဥပဒေအသစ်အောက်မှာ သူတို့ ရရှိနိုင်တဲ့ အခွင့်အရေးတွေကို နားမလည်ကြသေးဘူးလို့ တာဝန်ရှိသူတွေက ပြောပါတယ်။ ဒါကြောင့် အောက်တိုဘာလမှာ ဥပဒေမစတင်မီ ပြည်သူတွေကို အသိပညာပေး လှုပ်ရှားမှုတွေ လုပ်ဆောင်သွားဖို့ တောင်းဆိုထားပါတယ်။
Ref – thethaiger
#ထိုင်း #အလုပ်လက်မဲ့ #မြင့်တက်
#DeltaNewsAgency #DNA
#နိုင်ငံတကာသတင်း