Nissan ရဲ့ အကြီးဆုံး စျေးကွက်တွေဖြစ်တဲ့ တရုတ်မှာ ရောင်းအားကျဆင်းတာနဲ့ အမေရိကန်မှာ လျှော့စျေးတွေကြောင့် ကုမ္ပဏီရဲ့ဝင်ငွေ အကြီးအကျယ် ထိခိုက်စေခဲ့တယ်လို့ သိရပါတယ်။
၁၄၊ မေ
ဂျပန်ကားထုတ်လုပ်ရေးကုမ္ပဏီ Nissan ဟာ ရောင်းအားကျဆင်းနေပြီး လုပ်ငန်းကို ရိုက်ခတ်မှုရှိလာတာကြောင့် ကမ္ဘာတဝန်းက အလုပ်သမား ၁၁,၀၀၀ ကို လျှော့ချပြီး စက်ရုံ ခုနစ်ရုံကိုလည်း ပိတ်သိမ်းသွားမယ်လို့ ထုတ်ပြန်လိုက်ပါတယ်။
Nissan ရဲ့ အကြီးဆုံး စျေးကွက်တွေဖြစ်တဲ့ တရုတ်မှာ ရောင်းအားကျဆင်းတာနဲ့ အမေရိကန်မှာ လျှော့စျေးတွေကြောင့် ကုမ္ပဏီရဲ့ဝင်ငွေ အကြီးအကျယ် ထိခိုက်စေခဲ့တယ်လို့ သိရပါတယ်။
ကုမ္ပဏီဟာ ပြီးခဲ့တဲ့နှစ် ကနဦး ထုတ်ပြန်ချက်အရ အလုပ်ထုတ်ပယ်ခံရနိုင်တဲ့ စုစုပေါင်း အရေအတွက်ဟာ ၂၀,၀၀၀ ခန့် ရှိလာမယ်လို့ အသိပေးခဲ့တာဖြစ်ပြီး ဒါဟာ Nissan ရဲ့ အလုပ်သမား အင်အား ၁၅ ရာခိုင်နှုန်းခန့် ရှိပါတယ်။
လက်ရှိမှာတော့ ဘယ်နေရာတွေမှာ လျှော့ချသွားမယ်ဆိုတာနဲ့ အင်္ဂလန် အရှေ့မြောက်ပိုင်းမှာရှိတဲ့ စက်ရုံအပေါ် သက်ရောက်မှု ရှိမလးဆိုတာကိုတော့ ကုမ္ပဏီဘက်က တိတိကျကျ မပြောသေးပါဘူး။ Sunderland မြို့မှာ ရှိတဲ့ Nissan ကားကုမ္ပဏီဟာ အလွန်အရေးကြီးတဲ့ စက်ရုံတစ်ခုဖြစ်တာကြောင့် အစိုးရအနေနဲ့လည်း ကုမ္ပဏီနဲ့ နီးနီးကပ်ကပ် ဆွေးနွေး ဖော်ဆောင်သွားမယ့် လုပ်ငန်းတွေ ရှိနေတယ်လို့ ဆိုပါတယ်။
ကုမ္ပဏီဟာ ကမ္ဘာတဝန်းမှာ ဝန်ထမ်း ၁၃၃,၅၀၀ ဝန်းကျင် ခန့်ထားပြီး အင်္ဂလန်နိုင်ငံ Sunderland မြို့က ကုမ္ပဏီမှာတော့ ဝန်ထမ်း ၆,၀၀၀ ဝန်းကျင် ခန့်ရှိပါတယ်။ အလုပ်လျှော့ချမှုရဲ့ သုံးပုံနှစ်ပုံက စက်ရုံအလုပ်သမားတွေပါ။ ကျန်တဲ့ တစ်ပုံကတော့ အရောင်း၊ စာရင်း၊ သုတေသနနဲ့ စာချုပ်ဝန်ထမ်းတွေထဲက ဖြစ်တယ်တယ်လို့ Nissan ရဲ့ အမှုဆောင်အရာရှိချုပ် အိုင်ဗန်အက်စပင်နိုဆာက ပြောပါတယ်။
ဒီလျှော့မှုတွေဟာ ကုန်ကျစရိတ်သက်သာအောင် စီစဉ်ခဲ့တာဖြစ်ပြီး ပြီးခဲ့တဲ့နှစ် နိုဝင်ဘာလက ကြေညာထားတဲ့ အလုပ်သမား ၉,၀၀၀ လျှော့ချမှုအပေါ် ထပ်ပေါင်းလိုက်တာလည်းဖြစ်တယ်လို့ ဆိုပါတယ်။ ကုမ္ပဏီဟာ ကမ္ဘာတဝန်း ထုတ်လုပ်မှုရဲ့ ၂၀ ရာခိုင်နှုန်းကို လျှော့ချဖို့ ရည်ရွယ်ထားတာပါ။
အခုနှစ် ဖေဖော်ဝါရီလက Nissan အပါအဝင် ပြိုင်ဘက် Honda ကုမ္ပဏီတို့ကြား ဒေါ်လာဘီလီယံပေါင်းများစွာ ပေါင်းစည်းလုပ်ဆောင်ပြီး တရုတ်နိုင်ငံအတွင်းက ပြိုက်ဘက် ကုမ္ပဏီတွေကို ပြိုင်ဆိုင်ဖို့ ဆွေးနွေးခဲ့ကြပေမယ့် ဒီပေါင်းစည်းမှုက မအောင်မြင်ခဲ့ပါဘူး။
Nissan ကုမ္ပဏီဟာ နှစ်စဉ် ဒေါ်လာ ၄ ဒဿမ ၅ ဘီလီယံ ဆုံးရှုံးနေပြီး အမေရိကန်သမ္မတ ဒေါ်နယ်ထရမ့် အစိုးရလက်ထက်မှာ အခွန်စည်းကျပ်မှုတွေကြောင့် ဖိအား ပိုမိုဖြစ်စေခဲ့ပါတယ်။
ကုမ္ပဏီရဲ့ လက်ရှိ အခြေအနေကြောင့် ဂျပန်နိုင်ငံအတွင်း ဘက်ထရီနဲ့ လျှပ်စစ်ကားစက်ရုံ တည်ဆောက်မယ့် အစီအစဉ်ကိုလည်း ဖျက်သိမ်းလိုက်တယ်လို့ ပြီးခဲ့တဲ့ သီတင်းပတ်က ကြေညာခဲ့ပါတယ်။
Ref – BBC