Photo Credit – Dawei Fire Service Department
အောက်တိုဘာ၊ ၁၉
အလုပ်သမား ရှစ်ဦး သေဆုံးခဲ့ရတဲ့ မီးလောင်မှုဖြစ်ထားတဲ့ ထားဝယ်မြို့၊ ကြက်စားပြင်ရပ်ကွက်၊ ထားဝယ်မြစ်ထဲက ဆီသိုလှောင်သင်္ဘော ဒေသအခေါ် ဆီဘောမှာ မနေ့ ညနေ လေးနာရီကျော်လောက်က မီးလောင်မှု ထပ်ဖြစ်ခဲ့တယ်လို့ မြို့ခံတွေဆီကနေ သိရပါတယ်။
“ပေါက်ကွဲသံလည်း တချက်ကြားလိုက်သေးတယ်၊ ရှေ့တခေါက်လောက်ကတော့ မကြမ်းဘူး၊ လူတွေတော့ မထိခိုက်ဘူးကြားတယ်” လို့ ထားဝယ်မြို့ခံ အမျိုးသမီးတဦးက DNA ကို ပြောပါတယ်။
ထားဝယ်ခရိုင်အတွင်း စက်သုံးဆီဖြန့်ဖြူးရောင်းချနေတဲ့ မီချီလီကုမ္ပဏီပိုင် ဆီသိုလှောင်သင်္ဘောမှာ မီးလောင်ကျွမ်းခဲ့တာဖြစ်ပြီး မိနစ်သုံးဆယ်ခန့်အကြာမှာတော့ မီးငြိမ်းသတ်နိုင်ခဲ့တယ်လို့ သိရပါတယ်။
ထားဝယ်မြို့နယ် မီးသတ်တပ်ဖွဲ့ကတော့ အဲဒီ ဆီ သိုလှောင်သင်္ဘောထဲရှိ ဆီအကျွင်းအ ကျန်အနည်းငယ် နေအပူရှိန်ကြောင့် အပူလွန်ကဲပြီး မီးပြန်လောင်တာလို့ ထုတ်ပြန်ထားပါတယ်။
အခုတခေါက် မီးလောင်မှုမှာတော့ သေဆုံးထိခိုက်တဲ့သူ မရှိဘူးလို့ သိရပါတယ်။
အဲဒီ ဆီသိုလှောင်သင်္ဘောပေါ်မှာပဲ အောက်တိုဘာ ၁၄ ရက် ညနေပိုင်းက ပေါက်ကွဲမီးလှောင်မှုဖြစ်ခဲ့ပြီး အသက် ၁၇ နှစ်ကနေ ၂၄ နှစ်ကြားရှိ အလုပ်သမား အမျိုးသား ခုနစ်ဦးနဲ့ အမျိုးသမီးတဦး သေဆုံးခဲ့ပါတယ်။
အဲဒီ ပထမအကြိမ်မီးလောင်မှုကတော့ ဘာလို့ မီးလောင်တာလဲဆိုတာ အတိအကျ မသိရပါဘူး။
