ဧပြီ ၊ ၂၆
ချင်းပြည်နယ် မင်းတပ်မြို့နယ်၊ ဝမ္မသူးရွာရှိ ပြည်သူဆေးရုံကို စစ်တပ်က မနေ့က ည ၈ နာရီလောက်မှာ တိုက်လေယာဉ်နဲ့ ဗုံးကြဲ တိုက်ခိုက်တာကြောင့် ဆေးကုသမှုခံယူနေတဲ့ အရပ်သားလေးဦးသေဆုံးပြီး ဆယ်ဦးထက်မနည်း ထိခိုက်ဒဏ်ရာရခဲ့တယ်လို့ ချင်းတော်လှန်ရေးတပ် CDF-Mindat အဖွဲ့ တာဝန်ရှိသူတဦးက ပြောပါတယ်။
“သေဆုံးသူတွေရဲ့ အသေးစိတ်အချက်အလက်ကို လောလောဆယ် အတည်ပြုဖို့ ခက်နေသေးတယ်” လို့ သူကပြောပါတယ်။
မင်းတပ်မြို့နယ်၊တိုက်နယ် (၂)ရှိ ဝမ္မသူးဆေးရုံကို စစ်တပ်က တိုက်ပွဲမရှိဘဲ ဂျက်ဖိုက်တာလေယာဉ်နဲ့ မနေ့က တညလုံး ပစ်ခတ်တိုက်ခိုက်ခဲ့တာပါ။
အဲဒီပစ်ခတ်မှုကြောင့် ဆေးရုံ အဆောက်အဦးတခုအပါအဝင် ဝန်ထမ်းလိုင်းခန်းတခုလည်း ရစရာမရှိအောင် ပျက်ဆီးသွားတယ်လို့ သိရပါတယ်။
“ဝန်ထမ်းအိမ်ရာတွေလည်း မီးလောင်သွားပါတယ်။ အဲဒီကနေ တောမီးပါဆက် လောင်သွားတဲ့ အနေအထားပါ ၊ ဆေးရုံနဲ့ ဝန်ထမ်းအိမ်ရာကတော့ ဗုံးကြဲခံရတာကြောင့် ရစရာ မရှိလောက်အောင် ဖြစ်သွားတာပါ “ လို့ CDF-Mindat အဖွဲ့ တာဝန်ရှိသူကပြောပါတယ်။
စစ်တပ်က ဗုံးကြဲခဲ့တဲ့ ဝမ္မသူးဆေးရုံဟာ လက်တလောမှာ မင်းတပ်၊ ကန်ပက်လက် ၊ မတူပီ အပါအဝင် ယောဒေသ နဲ့ ပခုက္ကူ/ မြိုင်/ဒေသ က လူနာတွေကို ဆေးကုသပေးနေတဲ့ နေရာဖြစ်တယ်လို့ သူကဆိုပါတယ်။
အခုလို လေကြောင်းတိုက်ခိုက်မှုအပြီး ဒေသခံတွေဟာ ကျေးရွာအတွင်း မနေရဲတော့ဘဲ ထွက်ပြေးတိမ်းရှောင်နေရတယ်လို့ သူကဆက်ပြောပါတယ်။
“စစ်ရှောင်တွေ ရှိပါတယ် ည ၁၂ ကနေ ၁ ဝန်းကျင်အထိ ပတ်ကြဲနေလို့ ပြည်သူတွေတောထဲ ပြေးရတာရှိပါတယ်။ မင်းတပ်မြို့နယ် ၊ တိုက်နယ် အမှတ် (၁ /၂ /၃) ဝန်းကျင်က ကျေးရွာ တွေမှာရှိတဲ့ ပြည်သူတွေ အားလုံးနီးပါး ဖြစ်နိုင်ပါတယ် “ လို့ သူကပြောပါတယ်။
ဧပြီ ၂ရက်နေ့ကလည်း မင်းတပ်မြို့နယ် အောက်ချိုင်ရွာကို စစ်ကောင်စီတပ်က အခုလိုပဲ လေကြောင်းကနေ တဆင့် ဗုံးကြဲတိုက်ခိုက်ခဲ့လို့ ဒေသခံ ငါးဦး ထိခိုက်ဒဏ်ရာရခဲ့ပါသေးတယ်။
လက်တလောမင်းတပ်မြို့နယ်ရှိ ကျင်ဒွေးမြို့ကို ရခိုင်တပ်တော် AA နဲ့ အတူ ချင်းတော်လှန်ရေး တပ်တွေက တိုက်ခိုက်သိမ်းပိုက်နိုင်ဖို့ လုပ်ဆောင်နေပါတယ်။
Photo – CDF Mindat
