ဖေဖော်ဝါရီ၊ ၆
ရန်ကုန်မြို့ကို ရွှေ့ပြောင်းနေထိုင်သူတွေများလာတာကြောင့် အိမ်ငှားခတွေဟာလည်းဆက်တိုက်မြင့်တက်နေပြီး ပေါက်စျေးသက်မှတ်တဲ့စျေးကွက်ပျက်နေတယ်လို့ အိမ်ငှားတွေနဲ့ ပွဲစားတွေဆီကသိရပါတယ်။
အာဏာသိမ်းပြီးနောက်ပိုင်းရန်ကုန်မြို့ဆီ အနယ်နယ်အရပ်ရပ်ကစစ်ဘေးရှောင်သူတွေ၊ ရွှေ့ပြောင်းအလုပ်သမား တွေနဲ့ နိုင်ငံခြားသွားရောက်ဖို့ သင်တန်းလာတက်သူတွေများလာတာကြောင့်အငှားလိုက်ပြီးစျေးမြင့်တက်လာ တာ လို့သင်္ဃန်းကျွန်းမြို့နယ်က အိမ်၊ခြံ၊မြေပွဲစားတဦးကဆိုပါတယ်။
“အများဆုံးအငှားလိုက်တာက ရန်ကုန်မှာဂျပန်သွားဖို့သင်တန်းလာတက်သူတွေ၊ လူငါးယောက်၊ခြောက်ယောက် စုပြီးနေတာ၊သူတို့ကခေါ်စျေးလည်းပေးနိုင်တယ်၊တယောက်ချင်းစုပေးကြတာဆိုတော့လေ၊အဲဒီတော့အိမ်ရှင်နဲ့ပွဲစားတွေက စျေးမြှင့်ခေါ်ကြတော့တာပဲ”လို့ ပြောပါတယ်။
အဲဒီလို ကြိုက်စျေးခေါ်လို့ရနေတာကြောင့် တိုက်ခန်းအငှားစျေးကွက်က ပေါက်စျေးမရှိတော့ပဲ စျေးကွက်ပျက်နေ တယ်လို့ ဆိုပါတယ်။
“ဘယ်လမ်း၊ဘယ်အလွှာဆိုဘယ်စျေးဆိုတာအရင်က ခန့်မှန်းလို့ရတယ်၊ခန့်မှန်းတာနဲ့သိပ်မကွာဘူး၊အခုက အပေါ် ဆုံးအထပ်ကလည်း မြေညီထပ်နီးပါးနဲ့အငှားဖြစ်ရင်ဖြစ်နေတာ”လို့ အိမ်၊ခြံ၊မြေဝယ်/ရောင်းအကျိုးဆောင်လုပ်ငန်း ဖွင့်လှစ်လုပ်ကိုင်နေသူတဦးကပြောပါတယ်။
လက်ရှိ အိမ်နဲ့ တိုက်ခန်းအငှားစျေးဟာ အာဏာမသိမ်းခင်ကထက် ၅၀ ရာခိုင်နှုန်းထက်မနည်းမြင့်တက်သွားပြီး သုံးလတကြိမ်၊ ခြောက်လတကြိမ် စျေးထပ်တိုးတောင်းတာတွေပါရှိနေတယ်လို့ အိမ်ငှားနေထိုင်သူတွေက ဆိုပါ တယ်။
အာဏာမသိမ်းခင်က ရန်ကုန်မြို့စွန် ရပ်ကွက်တွေက တိုက်ခန်းတွေမှာ မြေညီထပ်အငှားစျေးတလကို ကျပ် နှစ် သိန်းနီးပါးရှိရာကနေ အခုဆို ကျပ်သုံးသိန်းအထက်ရှိပြီး အပေါ်ဆုံးအထပ်ဆိုရင် အရင်ကကျပ်တသိန်းနီးပါးရှိရာက အခု ကျပ်တသိန်းခွဲကနေ နှစ်သိန်းနီးပါးရှိနေတယ်လို့ သိရပါတယ်။
“အခန်းစုနေသမားတွေက ကိစ္စမရှိဘူး၊သူတို့က တယောက်မှဘယ်လောက်မှမကျဘူးစုလိုက်ရင်၊ မိသားစုသမား တွေကြဒုက္ခရောက်ရတယ်၊စုနေသမားတွေလောက်မှမပေးနိူင်တာ၊အိမ်ရှင်အများစုက စျေးပိုရတာကိုပဲလိုချင် ကြ တာ”လို့ တောင်ဥက္ကလာပမြို့နယ်မှာအိမ်ငှားနေထိုင်သူတဦးက ပြောပါတယ်။
အဲဒီလို အိမ်ငှားခစျေးတွေမြင့်တက်နေတာကြောင့် မိသားစုနဲ့နေထိုင်သူတွေကအခက်အခဲတွေဖြစ်နေကြရပြီး မိသား စုနည်းသူတွေက လူပိုထပ်ခေါ်တင်ပြီးစရိတ်ပြန်ကာမိအောင်နေထိုင်ရတာမျိုးတွေရှိလာနေတယ်လို့ ကိုယ် တိုင်ကြုံ တွေ့ရ သူတွေကပြောကြပါတယ်။
ရခိုင်ပြည်နယ်အပါအဝင် လက်ရှိတိုက်ပွဲတွေပြင်းထန်နေတာ၊စစ်ရေးတင်းမာနေတဲ့စတဲ့အခြေအနေတွေရှိနေတဲ့ ဒေသတချို့ကနေ ရန်ကုန်မြို့ကိုပြောင်းရွှေ့လာဖို့ စီစဉ်နေသူတချို့က ရန်ကုန်ကဆွေမျိုးမိတ်ဆွေတွေကို တိုက်ခန်းကြိုတင် ငှားရမ်းခိုင်းတာမျိုးတွေလည်း ရှိနေတယ်လို့လည်း သိရပါတယ်။
