စက်တင်ဘာ၊ ၄
ကုန်ဈေးနှုန်း ကြီးမြင့်မှုတွေနဲ့ အထွေထွေ အကျပ်အတည်း တွေကြားမှာ အခြေခံလူတန်းစား တွေအတွက် အခြေခံစားကုန်တွေကို ငွေကျပ် ၁၀၀ နဲ့ ရောင်းချပေးတဲ့ လှူဒါန်းမှု အစီအစဉ်တွေ ပြန်လုပ်လာကြပါတယ်။
ဆန်တပြည်ကို ငွေကျပ် ၇၀၀၀ ပတ်ချာလည် ရှိနေချိန်မှာ အခြေခံလူတန်းစားတွေကို ကူညီလိုသူတွေက ငွေကျပ် ၁၀၀ နဲ့ ရောင်းချပေးတာကြောင့် လိုအပ်လိုသူတွေ များပြားပေမယ့် လှူဒါန်းပေးနိုင်သူတွေမှာလည်း အကန့်အသတ်တွေ ရှိနေပါတယ်။
ပြီးခဲ့တဲ့လထဲမှာလည်း ရန်ကုန်မြို့၊ စမ်းချောင်းမြို့နယ် ထဲမှာရှိတဲ့ အနှေးယာဉ်လုပ်သားတွေကို ဆန်တပြည် ငါးပိတဗူး ငွေတထောင်ကျပ်နဲ့ အလှူရှင်တချို့က ရောင်းချပေးခဲ့တာကို တွေ့ရပါတယ်။
ဒီကနေ့ စက်တင်ဘာ ၄ ရက်နေ့မှာလည်း ရန်ကုန်မြို့၊ သင်္ဃန်းမြို့နယ်မှာရှိတဲ့ Aladdin Men Fashion ဆိုင်က အသက် ၆၀ ကျော် အဖိုးအဖွားတွေကို ဆန်ပြည် ငွေတရာကျပ်၊ ကြက်ဥတကတ် ငွေတရာကျပ်နဲ့ အယောက် ၃၀၀ စာ ရောင်းချပေးခဲ့ပါတယ်။
ပြီးခဲ့တဲ့ ကိုဗစ် တတိယလှိုင်း ကာလမှာဆိုရင်လည်း အလှူရှင်တချို့က ရန်ကုန်မြို့က ဆင်ခြေဖုံး ရပ်ကွက်တွေမှာ အခြေခံစားကုန်တွေကို တန်ဖိုးနည်းငွေနဲ့ ရောင်းချပေးတဲ့ ပြည်သူမှ ပြည်သူသို့ ဆိုတဲ့ အစီအစဉ်တွေ ရှိခဲ့ပါတယ်။
စစ်အာဏာသိမ်းမှုအောက်မှာတော့ ငွေလဲလှယ်နှုန်းတွေ မြင့်တက်တာ၊ ငွေကြေးဖောင်းဖွတာတွေရဲ့ နောက်ဆက်တွဲ ရိုက်ခက်မှုတွေမှာ သက်ရောက်မှုများစွာ ရှိခဲ့သလို လူထု နေ့စဉ် စားသောက်ဝယ်ယူနေတဲ့ အခြေခံစားကုန်တွေဟာလည်း တရိပ်ရိပ် မြင့်တက်လာခဲ့ပါတယ်။
အာဏာသိမ်းစစ်ခေါင်းဆောင်တွေကတော့ စီးပွားရေး တိုးတက်နေကြောင်း မိန့်ခွန်းတိုင်းမှာ ထည့်ပြောနေသလို ကုန်ဈေးနှုန်းတက်တာ ဈေးကစားသူတွေကြောင့်လို့ အမြဲလိုလို စွပ်စွဲပြစ်တင်လေ့ ရှိကြပါတယ်။
ဓာတ်ပုံ – ခွန်ရိပ်ဟိန်း
