သြဂုတ်၊ ၂၄
တာချီလိတ်မြို့၊ ဟောင်လိတ်လေဆိပ်မှာ ခရီးသည်တဦး လေယာဉ်ပေါ်မှာပဲ ကလေးမီးဖွားခဲ့ပြီး ကလေးရော မိခင်ပါ ကျန်းမာရေးကောင်းတယ်လို့ အဲ့ဒီမြို့အခြေစိုက် ဦးလှမိုး လူမှုကူညီရေးအသင်းက ဖော်ပြထားပါတယ်။
တာချီလိတ်မြို့ကနေ ရန်ကုန်ကို ဒီကနေ့ညနေပိုင်းမှာ ထွက်ခွာခဲ့တဲ့ Air KBZ ခရီးသည်တင်လေယာဉ်ပေါ်က ကိုယ်ဝန်ဆောင်မိခင်တဦးဟာ လေယာဉ်ထွက်ခွာပျံသန်းချိန်အတွင်း ရေမွှာပေါက်သွားတာလို့ အဲ့ဒီအသင်း တာဝန်ရှိသူတဦးက DNA ကိုပြောပါတယ်။
“ လေယာဉ်ပေါ်မှာ ကလေးရေမွှာပေါက်တော့ လေယာဉ်က နောက်ပြန်လှည့်လာတယ်၊ လေယာဉ်ပေါ်မှာပဲ မွေးသွားတာ ” လို့ သူကပြောပါတယ်။
မွေးလူနာတဦး လေယာဉ်ပေါ်မှာ ရေမွှာပေါက်သွားတာကြောင့် အကူအညီတောင်းခံလာလို့ ဦးလှမိုး လူမှုကူညီရေး အဖွဲ့ဝင်တွေ သွားရောက်ခဲ့ကြပေမယ့် သူတို့ရောက်သွားချိန်မှာ မီးဖွားပြီးပြီလို့ သိရပါတယ်။
ဒါကြောင့် မိခင်နဲ့ လေယာဉ်ပေါ်မှာမွေးဖွားခဲ့တဲ့ သမီးငယ်ဖြစ်သူတို့ကို နီးစပ်ရာ ဆေးခန်းကို ကူညီပို့ဆောင်ပေးခဲ့တယ်လို့ ဦးလှမိုး လူမှုကူညီရေးအသင်းက ဖော်ပြထားပါတယ်။
“ လေကြောင်းလိုင်းဘက်က လေယာဉ်စီးခွင့်ပေးလားဆိုတာ နောက်ဆက်တွဲတွေ ကျွန်တော်တို့ မသိရသေးပါဘူး၊ ကျွန်တော်တို့က သွားကူညီခဲ့တာပါပဲ ” လို့ အဲ့ဒီအသင်း တာဝန်ရှိသူတဦးက ပြောပါတယ်။
ဓာတ်ပုံ – ဦးလှမိုး တာချီလိတ်လူမှုကူညီရေးအသင်း
