ဇွန်၊ ၃၀
ရခိုင်ပြည်နယ်၊ စစ်တွေမြို့မှာ ဇွန်လ ၂၈ ရက်က ဖိုင်ဘာလှေငယ်တစီး နစ်မြုပ်လို့ သင်္ဘောသား တဦးသေဆုံးပြီး နှစ်ဦးပျောက်ဆုံးနေဆဲဖြစ်တယ်လို့ မြို့ခံလူမှုကူညီရေးအသင်းတွေနဲ့ မြို့ခံတွေက DNA သတင်းဌာနကို ပြောကြားပါတယ်။
” ရှာနေတာက ရေနစ်တဲ့ နေ့ထဲပါ။ ညဘက် အလင်းအားမရှိတဲ့ အချိန်ဆိုရင်တော့ နားတာပေါ့။ မနေ့ကလည်း တနေကုန် ရှာတာပါ။ ဒီနေ့မနက် ပိုက်နဲ့ညိနေတဲ့ အလောင်း တလောင်း တွေ့တယ်ဆိုပြီး လှေသမားတွေက ဆက်သွယ်လို့ ဆယ်ခဲ့တယ်။ နောက်ထက် နှစ်လောင်းကိုလည်း ရှာပေးနေပါတယ်ဗျ ” လို့ ရွှေရောင်ဖောင်ဒေးရှင်းအသင်း တာဝန်ရှိသူမှ DNA ကိုပြောပါတယ်။
ရန်ကုန်မြို့ကနေ စစ်တွေမြိုကို ကုန်ပစ္စည်းလာပို့တဲ့ အင်ဗွီရာဇာမင်း သင်္ဘော ဟာဇွန်လ ၂၈ ရက်မှာ ချောင်နွယ်မင်းဂံဆိပ်ကမ်း မှာ ရပ်နားပြီး သယ်ယူလာတဲ့ ကုန်ပစ္စည်းတွေ ဆိပ်ကမ်းမှာ ချခဲ့တယ်လို့ သိရပါတယ်။
အဲဒီနေ့ ညနေ ၅ နာရီဝန်းကျင်မှာ အလုပ်သမားတွေက ပစ္စည်းချနေစဉ် ရိက္ခာဝယ်ဖို့အတွက် အဲဒီသင်္ဘောသားလေးဦးဟာ စစ်တွေမြို့ပေါ်သို့ လှေငယ်နဲ့ သွားရောက်စဉ် အပြန်မှာ လှေနစ်မြုပ်ခဲ့ပြီး အဲ့ဒီထဲက ဦးမျိုးလွင် တဦးသာ အသက်ရှင်ကျန်ရစ်တာလို့ သိရပါတယ်။
အဲဒီအတွက် ရှာဖွေကယ်ဆယ်ရေးလုပ်ရာမှာ ဇွန်လ ၃၀ ရက် ဒီကနေ့ မနက်ပိုင်းမှာ သင်္ဘောသားတဦးရဲ့ ရုပ်အလောင်းကို ဆယ်ယူရရှိပြီး ကျန်နှစ်ဦးကတော့ ပျောက်ဆုံးနေဆဲဖြစ်တယ်လို့ ဒေသခံ လူမှုရေးအသင်းတွေက ဆိုပါတယ်။
ရေနစ်သေဆုံးသူများမှာ ရန်ကုန်တိုင်း ဒလမြို့နယ်တွင် နေထိုင်ကြသူတွေဖြစ်ပြီး အဲဒီထဲက ကိုသက်ပိုင်ဦး ရုပ်အလောင်းကို ချောင်နွယ်မင်းဂံရွာ အနီးရှိ ချောင်းအတွင်း ကျားပိုက်နဲ့ ညိနေပြီး ရှာဖွေတွေ့ရှိခဲ့တာလို့ သိရပါတယ်။
ရေနှစ်ပျောက်ဆုံးသူများမှာ အသက်သုံးဆယ်နှစ်အထက် ရှိသူများဖြစ်ကြပြီး ကျန်ရှိနေတဲ့ ကိုချစ်မင်းပိုင် နဲ့ ကိုသန့်ဇင် တို့ အလောင်းများကိုလည်း မြို့ခံ လူမှုကယ်ဆယ်ရေးအဖွဲ့တွေမှ ရှာဖွေမှုများ ဆက်လက်လုပ်ဆောင်နေတယ်လို့ ပြောပါတယ်။
ဒီကနေ့ မနက်ပိုင်းက တွေ့ရှိထားသော ကိုသက်ပိုင်ဦး ရုပ်အလောင်းကို မေတ္တာရောင်ခြည် လူမှုကူညီရေးအသင်းမှ သွားရောက်ဆယ်ယူပြီး စစ်တွေမြို့ ဆေးရုံကြီးရင်ခွဲရုံသို့ ပို့ဆောင်ပေးထားပါတယ်။
ရေနစ်သေဆုံးသူတွေရဲ့ မိသားစုဝင်တွေဟာလည်း ရန်ကုန်မြို့ကနေ စစ်တွေမြို့သို့ လာရောက်နေပြီလို့ သိရပါတယ်။
ဓာတ်ပုံ – လူမှုကူညီရေးအသင်း
