ဧပြီ၊ ၃၀
မန္တလေးတိုင်း ၊မတ္တရာမြို့အရှေ့ဖက်နဲ့ ပုသိမ်ကြီးမြို့နယ်အစပ်ရှိ ကျေးရွာပေါင်း ၁၀ ရွာလောက်က နေအိမ်ပေါင်း ၅၀၀ လောက်ကို စစ်အုပ်စုက စစ်ကြောင်းထိုးဝင်ရောက်ပြီး မီးရှို့ဖျက်ဆီးခဲ့တယ်လို့ ဒေသခံတွေကပြောပါတယ်။
မတ္တရာမြို့အရှေ့ဖက်က ကျေးရွာတွေကို စစ်အုပ်စုက ဧပြီလ ၂၂ ရက်နေ့မှာ စတင်ပြီး စစ်ကြောင်းထိုးဝင်ရောက်ခဲ့သလို တချို့ကျေးရွာတွေမှာ အထိုင်ချနားတာတွေ လုပ်ဆောင်ပြီး နေအိမ်တွေကို မီးရှိ့နေတာလို့ ဒေသခံတဦးက ပြောပါတယ်။
” စစ်ကြောင်း ကရွာထဲဝင်မယ်ဆိုရင် နေခင်းဖက်မဝင်ဘူး။ ညဖက်ကြီးမှာ ဝင်တာပေါ့။ အဲတော့ ညဆိုရင်ကို လန့်နေရတယ်။ ဘာမှမမြင်ရတော့ ပြေးချိန်လည်း သိပ်မရဘူးလေ။ ရွာတွေ တရွာဝင်တရွာထွက်လုပ်ပြီး မီးရှို့နေတာပါ။ အခုလောလောဆယ်တော့ စစ်ကြောင်းကပြန်ထွက်သွားပြီ။ ဒါပေမယ့် စိတ်မချရသေးဘူး။ သူတို့က ကားတွေနဲ့ ရောက်ရောက်လာတတ်တယ် ” လို့ သူကပြောပါတယ်။
စစ်အုပ်စုက မတ္တရာမြို့အရှေ့ဖက်ရှိ ကင်းရွာ၊ ယုံပင်၊ ဇီးတပင်၊ ရွာသာရွာ၊ လက်ဝဲကြီး၊ ရှမ်းရွာ၊ ကျပ်ပြင်၊ ရှားစေချက်၊ အုတ်ဖို ၊ ကျောက်တံတား စတဲ့ကျေးရွာတွေက နေအိမ် ၅၀၀ လောက်ကို မီးရှို့ဖျက်ဆီးခဲ့တယ်လို့ ဆိုပါတယ်။ လက်ရှိမှာ အဲဒီကျေးရွာတွေက လူဦးရေထောင်နဲ့ချီတဲ့ ဒေသခံတွေဟာ စစ်ရှောင်ရတာတွေ လုပ်နေရတယ်လို့ သိရပါတယ်။
ဒါ့အပြင် စစ်ကြောင်းဝင်ရောက်လာချိန် ပိတ်မိပြီး အဖမ်းခံရတဲ့ ဒေသခံတွေကို ပိုက်ဆံတောင်းပြီး ပြန်ရွေးခိုင်းတာတွေ လုပ်ဆောင်ခဲ့သလို သေနတ်နဲ့ ပစ်သတ်ခံရတဲ့လူတွေလည်း ရှိတယ်လို့ ဒေသခံတွေက ဆိုကြပါတယ်။
” ကင်းရွာဆို ရွာကြီးဆိုတော့ ၁၇၉ လုံးလောက်မီးရှို့ခံရတယ်။ စစ်ကြောင်းက မပြတ်ဘူးဗျ။ ဟိုရွာထိုင်လိုက် ဒီရွာထိုင်လိုက် အဲဒါ့မျိုးတော့ ရှိတာပေါ့။ ဒီလထဲ စီးနင်းဝင်ရောက်တာတော့ အဆိုးဆုံးပေါ့ဗျ။ အဖမ်းခံရတာတွေလည်း ရှိတယ်၊ တချို့ကျတော့ ပြန်လွှတ်လာသလို တချို့ကျလည်း ငွေညစ်နေတာတွေရှိတယ်။ စာရင်းအတိအကျတော့ ပြောဖို့ခက်တာပေါ့ဗျ။ ကာကွယ်ရေးအဖွဲ့တွေကလူတွေ သတ်ဖြတ်ခံရတာလည်း ရှိတယ်။ ကင်းပုန်းနဲ့မိပြီး အသတ်ခံရတာတွေပါ ” လို့ ဒေသခံတဦးက ပြောပါတယ်။
မတ္တရာမြို့မှာ ပတ်မွှေနေတဲ့ စစ်အုပ်စုကို ဒေသကာကွယ်ရေးအဖွဲ့များက လက်နက်အင်အား မမျှတလို့ ရင်ဆိုင်တိုက်ခိုက်တာမျိုး မရှိပေမယ့် ဒရုန်းနဲ့ ဗုံးသီးချတာ၊ မိုင်းဆွဲတိုက်ခိုက်တာတွေနဲ့ လက်လုပ်လက်နက်ကြီးတွေနဲ့ ပစ်ခတ်တာတွေ လုပ်လေ့ရှိတယ်လို့ နဂါးညီနောင်ပြည်သူကာကွယ်ရေးအဖွဲ့ တာဝန်ခံတဦးက ပြောပါတယ်။
” အောက်ဖက်ကနေ သူတို့က ပိတ်ထိုင်တာဗျ။ ရုန်းပင်ထိုင်တယ်။ ရှမ်းရွာ၊ ကျပ်ပြင်၊ ကင်းရွာထိုင်ပြီး ပိတ်လိုက်တာဗျ။ သူတို့က ဖြတ်လေးဖြတ်စီစဉ်တာပေါ့ဗျ။ ကျနော်တို့က အထက်ကနေ တတ်နိုင်တဲ့အားနဲ့ လုပ်ရတာပေါ့။ သူတို့လက်နက်အားသာတော့ ရင်ဆိုင်လို့တော့ မရဘူးပေါ့။ မိုင်းဆွဲတာတို့ ဒရုန်းနဲ့ တိုက်ခိုက်တာတို့ကြောင့် သူတို့ဖက်လည်း ထိခိုက်တာလေးတွေရှိပါတယ် ” လို့ သူကပြောပါတယ်။
ဓာတ်ပုံ – CJ
