ဧပြီ၊ ၁၈
ရန်ကုန်မြို့၊သန်လျင်မြို့နယ်မှာ စစ်ကောင်စီရဲ့လေတပ်အရာရှိ ဆိုသူတဦးအပါအဝင် သုံးဦးကို သေနတ်သမားတွေက ပစ်ခတ်ခဲ့ပြီးနောက် စစ်ကောင်စီတပ်တွေက သန်လျင်တမြို့နယ်လုံးကို ပိုက်စိတ်တိုက်ရှာဖွေတာတွေ လုပ်ဆောင်နေတယ်လို့ ဒေသခံတွေကပြောပါတယ်။
” သန်လျင်တမြို့နယ်လုံးပေါ့။ ရန်ကုန်ဘက်ဆိုရင် ကျွန်တော်တို့ သန်လျင်တံတားပိတ်ထားတယ်၊ ကျောက်တန်းမြို့နယ်ဘက်နဲ့ ဆိပ်ကမ်းဘက်အခြမ်းတွေလည်း ပိတ်စစ်နေတာ။ ဘယ်ကားပဲဖြစ်ဖြစ် လူရှိအကုန်ဆင်းခိုင်းပြီး စစ်တာ။ DCကားတွေနဲ့လည်း တောက်လျှောက်ပတ်နေတယ် ” လို့ သန်လျင်အောင်ချမ်းသာရပ်ကွက်နေ ဒေသခံပြည်သူတဦးက ပြောပါတယ်။
သန်လျင်မြို့နယ်၊ ထန်းပင်ကုန်းရပ်ကွက်၊ ထန်းပင်ကုန်းလမ်း၊ အမှတ် ၃၆ နေအိမ်မှာ စစ်ကောင်စီရဲ့လေတပ်အရာရှိ ဒုတိယဗိုလ်မှူးကြီး ကျော်စွာထွန်းအပါအဝင် သုံးဦးရှိနေချိန် အမည်မသိ သေနတ်သမားသုံးဦးက သေနတ်နဲ့လာရောက်ပစ်ခတ်ခဲ့တာဖြစ်တယ်လို့ ဆိုပါတယ်။
ပစ်ခတ်မှုကြောင့် ဒုတိယဗိုလ်မှူးကြီး ကျော်စွာထွန်းက နေရာမှာပဲသေဆုံးခဲ့ပြီး လုံခြုံရေးတဦးနဲ့ ပစ်ခတ်ချိန်မှာ ခုခံတဲ့အမျိုးသားတဦးတို့ကတော့ ဆေးရုံမှာသေဆုံးသွားတယ်လို့ ရန်ကုန် မြို့ပြအထူးစစ်ဆင်ရေးအဖွဲ့က ထုတ်ပြန်ပါတယ်။
ပစ်ခတ်မှုအတွင်း နေရာမှာပဲသေဆုံးခဲ့သူဟာ မင်္ဂလာဒုံလေတပ် စစ်လက်နက်ပစ္စည်းထောက်ပံ့ရေးတပ် (လပစ) တပ်မှူး/ ဌာနခွဲမှူး ဒုတိယဗိုလ်မှူးကြီး ကျော်စွာထွန်းဆိုသူဖြစ်တယ်လို့ အဲ့ဒီအဖွဲ့က ထုတ်ပြန်ထားပြီး DNA အနေနဲ့ သီးခြားအတည်မပြုနိုင်သေးပါဘူး။
” လေတပ်အရာရှိလို့တော့ ပြောနေကြတာပဲ၊ ကျွန်တော်လည်း သေချာတော့မသိဘူး။ သူက ပြန်မလာတာကြာပြီ၊ သူတို့ကို ဒီမှာလည်း သိပ်မတွေ့ဖူးကြတော့ မသိကြဘူး ” လို့ ထန်းပင်ကုန်းရပ်ကွက်နေ ဒေသခံတဦးက ပြောပါတယ်။
လက်ရှိအချိန်အထိတော့ စစ်ကောင်စီက ပစ်ခတ်သူတွေကို ပိုက်စိပ်တိုက်ရှာဖွေတာတွေ လုပ်ဆောင်နေပြီး ပစ်ခတ်မှုဖြစ်ပြီးနောက် ငါးနာရီကျော်ကြာတဲ့အချိန်အထိ သန်လျင်တံတားကို ပြန်မဖွင့်ပေးသေးဘူးလို့လည်း အငှားယာဥ်မောင်းတွေက ပြောပါတယ်။
ပြီးခဲ့တဲ့မတ်လအတွင်းကလည်း လူသိများတဲ့ မူပိုင်ခွင့်ဥပဒေဆိုင်ရာကျွမ်းကျင်သူတဦးဖြစ်သလို စစ်အုပ်စုအတွက် အလုပ်လုပ်ပေးနေတယ်ဆိုတဲ့ ဦးမင်းတေဇညွန့်တင်ဟာ သန်လျင်မြို့နယ်အတွင်းမှာပဲ ပစ်ခတ်ခံရပြီး သေဆုံးခဲ့ပါတယ်။
ဓာတ်ပုံ – ပုံဟောင်း (google)
