မတ်၊ ၃၁
ဘက်ခ်မတ်မြို့သာ ကျဆုံးသွားမယ်ဆိုရင် ရုရှား သမ္မတ ဗလာဒီမာ ပူတင်အတွက် အောင်ပွဲကြီးတခု ခွင့်ပြုပေးလိုက်သလို ဖြစ်သွားမယ်လို့ ယူကရိန်း သမ္မတ ဗိုလိုဒီမာ ဇီလန်စကီးက သတိပေးခဲ့ပါတယ်။
လောလောဆယ် ရုရှားနဲ့ ယူကရိန်းတို့ကြားက စစ်ပွဲဟာ ယူကရိန်းနိုင်ငံ အရှေ့ဖျား၊ ဒွန်းညက်စ်ခ် ပြည်နယ်က ဘက်ခ်မတ်မြို့မှာ အပြင်းထန်ဆုံး ဆက်လက် ဖြစ်ပွားနေပါတယ်။ ကြေးစားစစ်တပ် Wagner ဦးဆောင်တဲ့ ရုရှား တပ်တွေဟာ ဘက်ခ်မတ်ကို ဝန်းရံ ပိတ်ဆို့ပြီး လက်နက်ကြီးတွေနဲ့ ပစ်ခတ်နေသလို မြို့ကို သိမ်းယူဖို့ ကြိုးစားနေပါတယ်။ ဒါပေမဲ့ ယူကရိန်း ခုခံရေး တပ်တွေရဲ့ ကြံ့ကြံ့ခံမှုကြောင့် ရုရှားတပ်တွေဟာ လပေါင်းအတော်ကြာလာပေမယ့် ဘက်ခ်မတ်ကို မသိမ်းယူနိုင်သေးပါဘူး။
ဇီလန်စကီးက ယူကရိန်းရဲ့ မဟာမိတ် အနောက်နိုင်ငံတွေ အနေနဲ့ ဘက်ခ်မတ် ကျဆုံးမသွားအောင် အစွမ်းကုန် ဝိုင်းဝန်း ပံ့ပိုး ကူညီပေးဖို့လိုကြောင်း ပြောကြားခဲ့ပါတယ်။ တကယ်လို့ ဘက်ခ်မတ်မြို့သာ ရုရှားလက်ထဲ ရောက်သွားရင် ပူတင်အတွက် ကြီးမားတဲ့ အောင်ပွဲ ဖြစ်သွားပြီး ရုရှားတပ်တွေလည်း စိတ်ဓာတ် တက်ကြွလာနိုင်တယ်လို့ သူက သတိပေးခဲ့ပါတယ်။
ဘက်ခ်မတ်မြို့ ကျဆုံးသွားရင် နိုင်ငံတကာ အသိုက်အဝန်းက စစ်ပွဲကို စေ့စပ်ဆွေးနွေးမှု နည်းလမ်းနဲ့ ရပ်ဆိုင်းဖို့ ပိုပြီး ဖိအားပေးလာဖွယ် ရှိနေပြီး အဲဒီအခါမှာ ယူကရိန်း အနေနဲ့ အတော်ကြီးကြီးမားမား နစ်နာမယ့် လိုက်လျောမှုတွေကို လက်ခံရမှာ ဖြစ်တယ်လို့လည်း ဇီလန်စကီးက ဆိုပါတယ်။
ဘက်ခ်မတ်ဟာ ရုရှားကျူးကျော်မှုကို ခုခံတဲ့ ယူကရိန်းရဲ့ စစ်ပွဲမှာ စံပြုရတဲ့ မြို့တမြို့ ဖြစ်လာခဲ့ပါတယ်။ ရုရှားတပ်တွေ ယူကရိန်းကို စတင် ကျူးကျော်လာချိန်နောက်ပိုင်း ဘက်ခ်မတ်မှာလောက် ဘယ်နေရာမှ တိုက်ပွဲတွေ ရှည်ရှည်ကြာကြာ မဖြစ်ပွားခဲ့ဖူးပါဘူး။ မြို့တမြို့လုံးနီးပါး ပျက်စီးနေပြီ ဖြစ်တဲ့တိုင် ယူကရိန်း တပ်တွေက ခြေကုပ်နေရာကို မစွန့်ခွာဘဲ ရွပ်ရွပ်ချွံချွံ ဆက်လက် ခုခံနေဆဲ ဖြစ်ပါတယ်။
အဲဒီမြို့ဟာ မဟာဗျူဟာ တန်ဖိုး သိပ်မရှိနိုင်တော့ဘူးလို့ စစ်ရေး သုတေသီတွေက သုံးသပ်ကြပေမယ့် နှစ်ဖက်စလုံးကတော့ မြို့ကို ထိန်းချုပ်ရေးအတွက် မဆုတ်မနစ် တိုက်ခိုက်နေသလို အကျအဆုံးလည်း အရမ်းများနေပါတယ်။
ရှေ့တန်း စစ်မြေပြင်ဆီ သွားရောက်စစ်ဆေး လေ့လာတဲ့ ရထားတစီးပေါ်မှာ သတင်းထောက်တွေနဲ့ စကားပြောတဲ့ အချိန်မှာတော့ ဇီလန်စကီးက ဘက်ခ်မတ်ကိုသာ အပြည့်အဝ ထိန်းချုပ်ခွင့် ရသွားမယ်ဆိုရင် ရုရှားအတွက် ကြီးမားတဲ့ စစ်ရေး အောင်မြင်မှု ဖြစ်သွားလိမ့်မယ်လို့ ထောက်ပြသွားခဲ့ပါတယ်။
အဲဒီလိုသာ ဖြစ်သွားရင် ပူတင်အတွက် အောင်ပွဲတခု ရသွားပြီး သူကလည်း အနောက်နိုင်ငံတွေကို အကျပ်ကိုင်ဖို့အတွက် အဲဒီအောင်ပွဲကို သေချာပေါက် ထုတ်သုံးမှာ ဖြစ်ကြောင်း၊ ဘက်ခ်မတ်ကို ရုရှား ရသွားမယ်ဆိုရင် ကရင်မလင်က ရုရှား အစိုးရအတွက် သိပ်အသုံးဝင်တဲ့ အောင်ပွဲတခု ဖြစ်သွားမှာကို မမေ့သင့်ကြောင်း ဇီလန်စကီးက ဆက်ပြောပါတယ်။
လက်ရှိ အခြေအနေမှာတော့ စစ်ပွဲကို စေ့စပ်ဆွေးနွေးရေး လမ်းကြောင်းနဲ့ အဆုံးသတ်ဖို့ ဖြစ်နိုင်ခြေ အလားအလာ လုံးဝနီးပါး မရှိသေးဘူးလို့လည်း ဇီလန်စကီးက မှတ်ချက် ပေးသွားခဲ့ပါတယ်။
