ရန်ကုန်မြို့၊ လှိုင်မြို့နယ်၊ ၁၆ရပ်ကွက်၊တပ်မတော်ချည်မျှင်အရှေ့နဲ့ အုတ်ကျင်းဘူတာရုံလမ်းအနီးက မိုးရေသန့်စက်ရုံမှာ အမိုးနီးယာဓာတ်ငွေ့ယိုစိမ့်မှုဖြစ်ပွားတာကြောင့် အမိုးနီးယားဓါတ်ငွေ့ဘေးသင့်သူ သုံးဆယ်နီးပါးရှိခဲ့တယ်လို့ မီးသတ်တပ်ဖွဲ့နဲ့ ဒေသခံပြည်သူတွေဆီက သိရပါတယ်။
“ဓာတ်ငွေ့သင့်တဲ့သူတွေကတော့အများကြီးပေါ့၊ အဓိကက ဆေးရုံကိုပို့တာကျတော့ သက်ကြီးရွယ်အိုတွေကို ပိုဂရုစိုက်ရတာပေါ့၊ ၂၀ကျော် ၃၀နီးပါးရှိတယ်၊ ဒီမနက်တော့ ဆေးရုံပြန်ဆင်းကြမှာပါ”လို့ အရှေ့ပေ ၅၀ လမ်းနေ ဒေသခံတဦးက ပြောပါတယ်။
အမိုးနီးယားဓာတ်ငွေ့သင့်ပြည်သူတွေကို အင်းစိန်ဆေးရုံ၊မြောက်ဥက္ကလာပ ဆေးရုံနဲ့ ရန်ကုန်ဆေးရုံကြီးတွေကို တင်ပို့ခဲ့တာဖြစ်တယ်လို့ လှိုင်မြို့နယ်ကြက်ခြေနီသူနာပြုတပ်ရင်းရဲ့တပ်ဖွဲ့ဝင်တဦးက ပြောပါတယ်။
“အင်းစိန် ဆေးရုံမှာ အားလုံး ၁၆ ယောက်ပေါ့၊ဒီကနေ တင်ပို့လိုက်တာ၊အားလုံးအခြေအနေကောင်းပါတယ်၊ဒီနေ့ပြန်ဆင်းကြမယ်တော့ သိရတယ်”လို့ လှိုင်မြို့နယ်ကြက်ခြေနီသူနာပြုတပ်ရင်းရဲ့တပ်ဖွဲ့ဝင်တဦးက ပြောပါတယ်။
မြန်မာနိုင်ငံမီးသတ်တပ်ဖွဲ့ကတော့ အမိုးနီးယားဓာတ်ငွေ့ယိုစိမ်မှုကြောင့် ဓာတ်ငွေ့ဘေးသင့်သူ ၂၉ ဦးရှိခဲ့တယ်လို့ သတင်းထုတ်ပြန်ထားပါတယ်။
ဇန်နဝါရီ ၁၂ရက် ည ၉နာရီအချိန်က မိုးသောက်ရေသန့်စက်ရုံအနီး ဖြတ်သန်းသွားလာတဲ့ ဒေသခံပြည်သူအချို့ဟာ မျက်လုံးတွေစပ်တာ၊အသက်ရှူကြပ်တာတွေ ဖြစ်ပွားရာက အမိုးနီးယားဓာတ်ငွေ့ပိုက် ပေါက်ပြီးယိုစိမ့်တာကို သိရှိခဲ့တာဖြစ်တယ်လို့ ဒေသခံတွေက ဆိုပါတယ်။
