စစ်ကိုင်းတိုင်းဒေသကြီး ကောလင်းမြို့နယ်မှာ ဒီကနေ့ နိုဝင်လာ ၁၁ ရက် မနက်ပိုင်းကကောလင်းမြို့နယ်တရားရုံးက တွဲဖက်မြို့နယ်တရားသူကြီးဖြစ်သူ ဦးဘရန်ဆိုင်းဆီကို ပေးပို့လာတဲ့လက်ဆောင်ပါဆယ်ထဲက ဗုံးပေါက်ကွဲပြီး တရားသူကြီးသေဆုံးတဲ့ဖြစ်စဉ်ဖြစ်ခဲ့ပါတယ်။
ဒီကနေ့မနက်ပိုင်းက ကောလင်းမြို့နယ်တရားရုံးမှာ တွဲဖက်မြို့နယ်တရားသူကြီးဖြစ်သူ ဦးဘရန်ဆိုင်းထံကို မြစ်ကြီးနားမြို့ကနေ လက်ဆောင်ပါဆယ်ထုပ်ရောက်ရှိတယ်ဆိုပြီး အမျိုးသားတစ်ဦးက လာရောက်ပို့ဆောင်ခဲ့ တာဖြစ်တယ်လို့ ဒေသခံတွေဆီက သိရပါတယ်။
‘’ တရားရုံးထဲလက်ဆောင်ရောက်တယ်ဆိုပြီးဖွင့်ကြည့်လိုက်တာ။ ပေါက်ကွဲမှုဖြစ်ပြီးတရားသူကြီးကသေပြီး တရားရုံးဝန်ထမ်းကတော့ ဒဏ်ရာရသွားတယ်။ ကောလင်းမြို့ပေါ်မှာလည်းစစ်သားတွေ အစစ်အဆေးကြမ်းနေတယ်’’ လို့ ဒေသခံတဦးက DNA ကိုပြောပါတယ်။
စစ်ကောင်စီရဲ့သတင်းတွေကို ဝါဒဖြန့်နေတဲ့ တယ်လီဂရမ်ချယ်နယ်တွေမှာလည်း ကောလင်းမြို့နယ်တရားရုံးမှာ ပေါက်ကွဲမှုဖြစ်တဲ့သတင်းနဲ့ တရားသူကြီးသေဆုံးတဲ့ သတင်းကိုထုတ်ပြန်ထားပြီး ပါဆယ်လာပို့သူကတော့ ဆိုင်ကယ်နဲ့ ထွက်ပြေးသွားတယ်လို့ ပြောထားကြပါတယ်။
ကောလင်းမြို့နယ်တရားရုံးကို ပါဆယ်ဗုံးနဲ့ ဖောက်ခွဲတိုက်ခိုက်ခဲ့တဲ့ဖြစ်စဥ်နဲ့ပတ်သက်ပြီး မည်သည့်အဖွဲ့အစည်းက လုပ်ဆောင်တယ်ဆိုတာကိုတော့ လတ်တလော မသိရသေးလို့ ထုတ်ပြန်ပြောဆိုတာလည်းမရှိသေးပါဘူး။
ကောလင်းမြို့နယ်အတွင်းမှာ တော့စစ် ကောင်စီတပ်တွေနဲ့ ဒေသကာကွယ်ရေးတပ်တွေ၊ KIA/PDFs ပူးပေါင်းတပ်တွေအကြား မကြာခဏတိုက်ပွဲတွေ ဖြစ်ပွားနေသလို စစ်ကောင်စီဘက်က ကျေးရွာနေအိမ်တွေကို မီးရှို့တာ၊ ဒေသခံပြည်သူတွေကိုဖမ်းဆီးပစ်ခတ်တာတွေ ဆက်ဖြစ်နေပါတယ်။
ဒါ့အပြင် ကောလင်းမြို့နယ်အတွင်း အင်တာနက်လိုင်းနဲ့ ဖုန်းလိုင်းတွေကိုလည်း စစ်ကောင်စီက ဖြတ်တောက်ထားတာလည်း လပေါင်းများစွာကြာမြင့်နေပြီလို့ ဒေသခံတွေကပြောပါတယ်။
